នាយករដ្ឋមន្ត្រីអ៊ីស្រាអែលមកប៉ារីស ដើម្បីជជែកពីបញ្ហាអ៊ីរ៉ង់និងអំពើហិង្សាជាមួយប៉ាឡេស្ទីន
លោក នេតាន់យ៉ាហ៊ូ ត្រូវអញ្ជើញមកដល់ក្រុងប៉ារីស ថ្ងៃព្រហស្បតិ៍ទី២ កុម្ភៈ២០២៣នេះ ដើម្បីបំពេញទស្សនកិច្ចជាលើកទីមួយ គិតតាំងពីលោកត្រលប់មកកាន់តំណែងជានាយករដ្ឋមន្ត្រីអ៊ីស្រាអែលជាថ្មី។ គ្មានគម្រោងថ្លែងជាសាធារណៈ ជំនួបរវាងប្រធានាធិបតីបារាំង លោក អេម៉ានុយអែល ម៉ាក្រុង និងលោកនាយករដ្ឋមន្ត្រីអ៊ីស្រាអែល ផ្តោតសំខាន់ទៅលើសំណុំរឿងអ៊ីរ៉ង់ដែលកាន់តែតានតឹងខ្លាំង និងអំពើហិង្សារវាងអ៊ីស្រាអែល-ប៉ាឡេស្ទីន។
ចុះផ្សាយនៅថ្ងៃ៖
ស្តាប់ - ០១:៥៦
បើតាមវិមានអេលីហ្សេ ក្នុងពេលទទួលជួបលោកនេតាន់យ៉ាហ៊ូ លោកប្រធានាធិបតីម៉ាក្រុង នឹងបញ្ជាក់ជាថ្មីអំពីសាមគ្គីភាពរបស់បារាំង ជាមួយអ៊ីស្រាអែលក្នុងការប្រយុទ្ធប្រឆាំងនឹងភេរវនិយម តែលោកម៉ាក្រុងនឹងរំលឹកអំពីភាពសំខាន់នៃការបញ្ចៀសអំពើហិង្សា ដោយចង់ចូលរួមចំណែកបើកផ្លូវចរចាអ៊ីស្រាអែល-ប៉ាឡេស្ទីនឡើងវិញ។ តាំងពីប៉ុន្មានថ្ងៃចុងក្រោយមកនេះ អំពើហិង្សារវាងអ៊ីស្រាអែលប៉ាឡេស្ទីនបានបង្កឱ្យមានជនរងគ្រោះដល់ជីវិតជាច្រើននាក់ ៖ ១០នាក់កាលពីថ្ងៃព្រហស្បតិ៍សប្តាហ៍មុននៅក្នុងប្រតិបត្តិការយោធាអ៊ីស្រាអែលក្នុងជំរំជនភៀសខ្លួនប៉ាឡេស្ទីនហ្សេនីន។ ៧នាក់កាលពីថ្ងៃសុក្រ នៅក្នុងការវាយប្រហាររបស់ជនប៉ាឡេស្ទីននៅក្រុងហ្សេរុយសាឡិមខាងកើត។ រួចបន្តដោយការបាញ់រ៉ុកកែត និងមីស៊ីលដាក់គ្នាទៅវិញទៅមកលើតំបន់ហ្កាហ្សា នៅយប់មិញនេះ
ចំណែកខាងអ៊ីស្រាអែលចង់ជជែកអំពីបញ្ហាអ៊ីរ៉ង់ច្រើនជាង ក្នុងដំណើរទស្សនកិច្ចនៅប៉ារីសនេះ។ បើតាមស្ថានទូតអ៊ីស្រាអែលប្រចាំក្រុងប៉ារីស លោកនាយករដ្ឋមន្ត្រីនេតាន់យ៉ាហ៊ូមកប៉ារីសដើម្បីស្វែងការគាំទ្រពីសម្ព័ន្ធមិត្ត ឱ្យបញ្ចេញកិច្ចខិតខំប្រឹងប្រែងសង្កត់អ៊ីរ៉ង់ឱ្យបញ្ឈប់កម្មវិធីនុយក្លេអ៊ែរ និងរកមធ្យោបាយពង្រឹងពង្រីកកិច្ចព្រមព្រៀងជាមួយក្រុមបណ្តាប្រទេសអារ៉ាប់។ នាយករដ្ឋមន្ត្រីអ៊ីស្រាអែលចង់បង្កើតសម្ព័ន្ធយោធា ដែលមាន អាមេរិក បារាំង និងប្រទេសអារ៉ាប់ស្អប់អ៊ីរ៉ង់ចូលរួមដែរ ព្រោះចង់ធ្វើអ្វីម្នាក់ឯង។ អ៊ីស្រាអែលបានរៀបចំយុទ្ធសាស្ត្រ ជាលាយលក្ខណ៍អក្សររួចហើយ សម្រាប់បង្ក្រាបអ៊ីរ៉ង់។ នេះបើតាមប្រភពការទូតមួយ។
អាមេរិកនិងបារាំងប្រឆាំងដាច់ខាតនឹងផែនការបើកម្លាំងរបស់អ៊ីស្រាអែល ហើយផ្តល់អាទិភាពដល់ការចរចាជាមួយអ៊ីរ៉ង់ជានិច្ច គ្រាន់តែស្ថានការណ៍ហាក់ចាប់ប្តូរផ្លាស់។ កិច្ចព្រៀងនុយក្លេអ៊ែរអ៊ីរ៉ង់ទំនងងាប់ស្តូកគ្មានច្រកចេញ ឯអ៊ីស្រាអែលបានបង្ហាញជំហរងាកមកខាងបស្ចិមលោកសុខចិត្តគាំទ្រអ៊ុយក្រែន ដោយចង់បញ្ជូនជំនួយយោធាឱ្យក្រុងកៀវផង។ នេះជាសារមួយដែលលោកនេតាន់យ៉ាហ៊ូ ចង់បញ្ជាក់ថា អ៊ីស្រាអែលគាំទ្រសង្គ្រាមរបស់បស្ចិមលោក ដូច្នេះបស្ចិមលោកត្រូវគាំទ្រអ៊ីស្រាអែលប្រឆាំងនឹងអ៊ីរ៉ង់វិញ។ នេះហើយជាអ្វីនាយករដ្ឋមន្ត្រីអ៊ីស្រាអែលមកស្វែងរកនៅប៉ារីស៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ