រុស្ស៊ីនិងអ៊ុយក្រែន ដោះដូរអ្នកទោសសង្គ្រាម ជាថ្មីម្តងទៀត ប្រមាណជិត ២០០ នាក់
ថ្ងៃសៅរ៍ អ៊ុយក្រែន បានទទួលស្វាគមន៍ទាហានរបស់ខ្លួន ចំនួនជាង១០០នាក់ ដែលត្រូវកងទ័ពរុស្ស៊ីចាប់ឃុំ។ ចំណែក រុស្ស៊ី វិញ បានទទួលជាង៦០នាក់។ កាលដើមខែមករា កន្លងទៅ រុស្ស៊ីនិងអ៊ុយក្រែន ធ្លាប់បានដោះដូរអ្នកទោសសង្គ្រាមម្តងហើយ។ ចំពោះការដោះដូរអ្នកទោសលើកទី២ នៅដើមឆ្នាំ២០២៣នេះ គឺមានសាកសពពលរដ្ឋអង់គ្លេសពីររូបផង។
ចុះផ្សាយនៅថ្ងៃ៖
ស្តាប់ - ០២:០៣
គូសត្រូវទាំងពីរ រុស្ស៊ី និងអ៊ុយក្រែន សុទ្ធតែបានបញ្ជាក់ពីដំណឹងដោះដូរឈ្លើយសឹក នៅថ្ងៃសៅរ៍។ ភាគីអ៊ុយក្រែន ទទួលបានឈ្លើយសឹក ចំនួន ១១៦ នាក់។ នេះជាការបញ្ជាក់របស់ នាយកខុទ្ទកាល័យប្រធានាធិបតីអ៊ុយក្រែន លោក Andriy Yermak ដែលបានផ្សាយក្នុងប្រព័ន្ធតេលេក្រាមនិងធ្វីតធ័រ ដោយប្រកាសថា សូមស្វាគមន៍វីរបុរសយើង ត្រឡប់មកមាតុប្រទេសវិញ។ តាមរយៈសំណេររបស់នាយកខុទ្ទកាល័យប្រធានាធិបតីអ៊ុយក្រែន គឺអាចឲ្យដឹងថា ក្នុងចំណោមអ្នកទោសសង្គ្រាមដែលអ៊ុយក្រែនដោះដូរបានមកវិញនោះ គឺជាកម្លាំងតស៊ូប្រយុទ្ធនៅតំបន់ Marioupol និងកងទ័ពអ៊ុយក្រែននៅតំបន់ Kherson ហើយនិងអ្នកប្រយុទ្ធដៃឆើតនៅសមរភូមិមុខ នៅក្រុង Bakhmout ព្រមទាំង វីរជនក្លាហានជាច្រើនរូបផ្សេងទៀត។
ចំណែកភាគី រុស្ស៊ី វិញ ក្រសួងការពារជាតិរុស្ស៊ី បញ្ជាក់ថា ចំណាប់ថ្នូរទាហាន ដែលរុស្ស៊ីទទួលបានទៅវិញ មានចំនួន ៦៣ នាក់។ ក្រសួងការពារជាតិរុស្ស៊ី មិនបានបញ្ជាក់អ្វីច្បាស់លាស់ច្រើនទេ គឺគ្រាន់តែគូសបង្ហាញ អ្នកទោសសង្គ្រាមទាំងជាង៦០នាក់នេះ គឺជា «បុគ្គលឋិតក្នុងក្របខ័ណ្ឌពិសេស»។
ខ្លឹមសារនៅក្នុងសេចក្តីថ្លែងការណ៍ របស់ភាគី រុស្ស៊ី គឺ ឲ្យដឹងដែរថា ការដោះដូរឈ្លើយសឹកសង្គ្រាមលើកនេះ គឺអាចប្រព្រឹត្តទៅបាន អាស្រ័យនឹងការជួយចរចាសម្របសម្រួលអន្តរាគមន៍ពីសំណាក់ ប្រទេសអេមីរ៉ាត់អារ៉ាបរួម។ ក៏ប៉ុន្តែ គេពុំដឹងថា តើ អន្តការីនោះ ជានរណាទេ។
ដំណឹងមួយ គួរកត់សម្គាល់! ក្នុងចំណោមអ្នកទោសដែលរុស្ស៊ីផ្តល់ទៅឲ្យអ៊ុយក្រែន គឺ គេបានដឹងថា មានសាកសពបុរសជនជាតិ អង់គ្លេស ពីរនាក់ផង គឺ លោក Chris Parry និង លោក Andrew Bagshaw ដែលជាអ្នកស្មគ្រចិត្ត ទៅជួយផ្នែកមនុស្សធម៌ ខាងភាគីអ៊ុយក្រែន ហើយស្លាប់នៅក្នុងខែមករា។ គ្រួសាររបស់សពលោក Andrew Bagshaw ឲ្យកាសែតអង់គ្លេស ដឹងថា នៅថ្ងៃទី៦មករា លោកបានព្យាយាមជួយ ដូនចាស់ម្នាក់ ពីគំនរអគារបាក់បែក ដោយគ្រាប់បែករុស្ស៊ី៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ