ប៉ារីសម្ចាស់កម្មវិធីអូឡាំពិក២០២៤ ប្រកាន់ជំហរតឹងតែងដាក់កីឡាកររុស្ស៊ី
នៅថ្ងៃអង្គារទី ៧កុម្ភៈ២០២៣ លោកស្រី អាន អ៊ីដាល់ហ្គោ (Anne Hidalgo) អភិបាលក្រុងប៉ារីស ដែលជាម្ចាស់ផ្ទះទទួលរៀបចំកម្មវិធីកីឡាអូឡាំពិក២០២៤ បានបង្ហាញជំហរតឹងតែងខ្លាំង ដាក់កីឡាកររុស្ស៊ី ដូចជំហររបស់អ៊ុយក្រែន។ លោកស្រីយល់ស្របនឹងគំនិតផាត់កីឡាកររុស្ស៊ីចេញពីកម្មវិធីអូឡាំពិក២០២៤តែម្តង បើលោកពូទីននៅតែបន្តធ្វើសង្គ្រាមនៅអ៊ុយក្រែន។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:២៧
វត្តមានកីឡាកររុស្ស៊ីក្នុងកម្មវិធីប្រកួតកីឡាអូឡាំពិក២០២៤ ជាសំណុំរឿងនយោបាយដ៏ក្តៅរលាក ជាពិសេសនៅក្នុងផ្ទះអ្នករៀបចំកម្មវិធីតែម្តង។ កាលពីចុងខែមករា ប្រធានាធិបតីអ៊ុយក្រែន បានស្នើសុំឱ្យប្រធានាធិបតីបារាំងប្រកាសផាត់រុស្ស៊ីពីកម្មវិធីអូឡាំពិកឆ្នាំក្រោយ។ នៅថ្ងៃអង្គារទី៧កុម្ភៈនេះ អភិបាលក្រុងប៉ារីសលោកស្រី អាន អ៊ីដាល់ហ្កោ បានបញ្ជាក់ជំហរប្រឆាំងនឹងវត្តមានកីឡាករុស្ស៊ីនៅប៉ារីសតែម្តង។ សម្រាប់លោកស្រី ព្រមឱ្យកីឡាកររុស្ស៊ីចូលប្រកួតក្រោមទង់អព្យាក្រិត្យ ជាប្រការមិនសមរម្យឡើយ។ គេមិនអាចឱ្យប្រទេសមួយដែលកំពុងឈ្លានពានគេ មកដង្ហែក្បួនកីឡាដោយហី ដូចជាគ្មានរឿងអ្វីកើតសោះបានទេ។ ម្យ៉ាងទៀតមានកីឡាកររុស្ស៊ី ជាជនភៀសខ្លួន និងជាជនផ្តាច់ខ្លួន ដែលប្រឆាំងនឹងនយោបាយឈ្លានពានរបស់លោកពូទីនផ្សេងទៀត ចង់ចូលរួមប្រកួត ក្រោមទង់ “ជនភៀសខ្លួន”។
ប៉ុន្តែគឺគណៈកម្មការអូឡាំពិកអន្តរជាតិCIO ជាអ្នកសម្រេចចុងក្រោយ។ ជិតមួយឆ្នាំក្រោយសង្គ្រាមចូលឈ្លានពានអ៊ុយក្រែន គណៈកម្មការអូឡាំពិកអន្តរជាតិបានបង្ហាញគម្រោងចង់បញ្ចូលអត្តពលិករុស្ស៊ីក្នុងពិភពកីឡាវិញ ដោយឈរលើទស្សនៈថា គ្មានអត្តពលិកណាម្នាក់ត្រូវជាប់បម្រាមមិនឱ្យចូលប្រកួតព្រោះសញ្ញាតិទេ។ តែនៅចំពោះមុខការទទូចរបស់ក្រុងកៀវ គណៈកម្មការអូឡាំពិកអន្តរជាតិបានប្រកាសសិក្សាលទ្ធភាព អនុញ្ញាតឱ្យកីឡាកររុស្ស៊ី ចូលប្រកួតក្រោមទង់អព្យាក្រិត្យ។ ប្រធានាធិបតីបារាំង លោក អេម៉ានុយអែល ម៉ាក្រុង ផ្ទាល់មិនទាន់បញ្ចេញជំហរទាក់ទងនឹងរឿងនេះទេ ហើយរដ្ឋាភិបាលក៏ដូចជាវិមានប្រធានាធិបតីបារាំងនិងគណៈកម្មការអូឡាំពិកអន្តរជាតិ ក៏មិនទាន់បញ្ចេញប្រតិកម្មជុំវិញជំហរថ្មីរបស់អភិបាលក្រុងប៉ារីសដែរ។
ករណីផាត់កីឡាកររុស្ស៊ីជាសំណុំរឿងចម្រូងចម្រាស់តាំងពីអូឡាំពិកក្រុងរីយ៉ូឆ្នាំ២០១៦មក ក្រោយពីផ្ទុះរឿងអាស្រូវរុស្ស៊ីប្រើថ្នាំប៉ូវកីឡាករជាប្រព័ន្ធ។ ដោយហេតុសំណុំរឿងនេះ រុស្ស៊ីគ្មានមុខជាផ្លូវការក្នុងកម្មវិធីអូឡាំពិករដូវក្តៅក្រុងតូក្យូ២០២១ និងរដូវរងារក្រុងប៉េកាំង២០២២ទេ តែកីឡាករអាចចូលរួមប្រកួតកីឡាក្រោមទង់ “អព្យាក្រិត្យ”។ វត្តមានរុស្ស៊ីក្នុងអូឡាំពិកក្រុងប៉ារីស បាននិងកំពុងក្លាយជាប្រធានបទប្រទាញប្រទង់អន្តរជាតិ។ គំនិតរបស់គណៈកម្មការអូឡាំពិកអន្តរជាតិដាក់លក្ខខណ្ឌឱ្យកីឡាកររុស្ស៊ីកុំគាំទ្រសង្គ្រាមអ៊ុយក្រែនដោយសកម្មទើបអាចស្ថិតក្រោមទង់ជាតិអព្យាក្រិត្យ ត្រូវបានអាជ្ញាធរអ៊ុយក្រែន ច្រានចោលជាដាច់ខាត ហើយជាមួយប៉ូឡូញ អេស្តូនី និងសាធារណរដ្ឋឆែក ពួកគេគំរាមធ្វើពហិការមិនចូលរួមក្នុងកីឡាអូឡាំពិកក្រុងប៉ារីសផង។ តែសហរដ្ឋអាមេរិកចង់បានការសម្របសម្រួលបែបនេះ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ