រូម៉ានី សមាជិកអូតង់ថា គ្រាប់មីស៊ីលរុស្ស៊ីមិនបានហោះចូលក្នុងដែនអាកាសរបស់រូម៉ានី
ក្រសួងការពារជាតិរូម៉ានីបានបញ្ជាក់ កាលពីថ្ងៃសុក្រម្សិលមិញថា គ្រាប់មីស៊ីលរុស្ស៊ីមិនបានហោះរំលោភចូលដែនអាកាសរបស់រូម៉ានី។ នៅព្រឹកថ្ងៃសុក្រ ភាគីអ៊ុយក្រែនបានលើកឡើងថា គ្រាប់មីស៊ីលពីរដើមរបស់រុស្ស៊ីដែលបាញ់ចេញពីសមុទ្រខ្មៅ បានហោះរំលងទឹកដីរូម៉ានី និងប្រទេសម៉ុលដាវី មុននឹងធ្លាក់លើគោលដៅក្នុងប្រទេសអ៊ុយក្រែន។ រុស្ស៊ីបាញ់ស្រោចទៅលើហេដ្ឋារចនាសម្ព័ន្ធថាមពលរបស់អ៊ុយក្រែន នៅមួយថ្ងៃក្រោយ ដែលប្រធានាធិបតីអ៊ុយក្រែន លោកហ្សេឡេនស្គីធ្វើដំណើរទៅ ទីក្រុងព្រុចសែល ដើម្បីស្វែងរកសព្វាវុធទំនើបបន្ថែមពីសម្ព័ន្ធមិត្តលោកខាងលិច។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:០៧
សមាជិករបស់អូតង់រូម៉ានីបានបដិសេធថា មីស៊ីលរុស្ស៊ីមិនបានហោះចូលក្នុងដែនអាកាសរបស់ខ្លួន។ តាមសេចក្តីថ្លែងការណ៍របស់ក្រសួងការពារជាតិរូម៉ានី ប្រព័ន្ធតាមដានផ្លូវអាកាសរបស់រូម៉ានីចាប់បានសញ្ញាគ្រាប់ដែលបាញ់ចេញពីកប៉ាល់ទឹករុស្ស៊ី នៅសមុទ្រខ្មៅ ក្បែរតំបន់គ្រីមេ សំដៅទឹកដីអ៊ុយក្រែន។ តាមភាគីរូម៉ានីដដែល គ្រាប់រុស្ស៊ីបានហោះនៅចម្ងាយ ៣៥គីឡូម៉ែត្រពីតំបន់ដែនអាកាសរបស់រូម៉ានី ប៉ុន្តែ មិនបានហោះចូលក្នុងដែនអាកាសរបស់រូម៉ានីឡើយ។
តាមក្រសួងការពារជាតិរូម៉ានី ការបញ្ជូនយន្តហោះចម្បាំងពីរគ្រឿង នៅក្នុងក្របខ័ណ្ឌរបស់អូតង់ ទៅកាន់ភាគខាងជើងរូម៉ានី បានជួយឲ្យរូម៉ានីអាចតាមដានស្ថានការណ៍ជាក់ស្តែងកាលពីថ្ងៃសុក្រ។
ការចេញមុខមកបញ្ជាក់របស់ភាគីរូម៉ានី ធ្វើឡើង នៅបន្ទាប់ពីមេបញ្ជាការកងទ័ពអ៊ុយក្រែន លោកវ៉ាឡេរី ហ្សាលូនី អះអាងថា គ្រាប់មីស៊ីលរុស្ស៊ីពីរគ្រាប់បានហោះឆ្លងកាត់ដែនអាកាសរបស់រូម៉ានី ប្រទេសសមាជិករបស់អូតង់ និងប្រទេសម៉ុលដាវី ដែលមានព្រំដែនជាប់អ៊ុយក្រែន។ ក្រសួងការពារជាតិម៉ុលដាវីវិញ និយាយថា ម៉ុលដាវីចាប់បានសញ្ញាមីស៊ីលដែលហោះរំលោភចូលដែនអាកាសរបស់ម៉ុលដាវី កាលពីថ្ងៃសុក្រ ដូច្នេះ ម៉ុលដាវីដែលមិនមែនជាសមាជិករបស់អូតង់ ប៉ុន្តែ ឧស្សាហ៍ទទួលបំណែកគ្រាប់មីស៊ីលរបស់រុស្ស៊ី ចាប់តាំងពីសង្រ្គាមរុស្ស៊ី ឈ្លានពានអ៊ុយក្រែន បានកោះហៅឯកអគ្គរដ្ឋទូតរុស្ស៊ីឲ្យឆ្លើយបញ្ជាក់ជុំវិញ ឧប្បត្តិហេតុ នៅថ្ងៃម្សិលមិញ។
នៅថ្ងៃសុក្រ រុស្ស៊ីបានបាញ់មីស៊ីលស្រោចទៅលើទីតាំងរោងចក្រអគ្គិសនី នៅក្នុងតំបន់ចំនួន ៦របស់អ៊ុយក្រែន នៅក្នុងខណៈពេលដែលប្រធានាធិបតីអ៊ុយក្រែន លោកហ្សេឡេនស្គីត្រលប់ចូលទីក្រុងកៀវ នៅក្រោយទស្សនកិច្ចស្វែងរកជំនួយសព្វាវុធពីសម្ព័ន្ធមិត្តអឺរ៉ុប។
តាមក្រសួងការពារជាតិអ៊ុយក្រែន ប្រព័ន្ធមីស៊ីលដែលអ៊ុយក្រែនបានទទួលពីប្រទេសលោកខាងលិច បានបាញ់ស្កាត់ទម្លាក់ មីស៊ីលរុស្ស៊ីចំនួន ៦១ដើម នៅក្នុងចំណោមមីស៊ីល៧១ដើម ដែលនៅក្នុងនោះ មាន១០ដើម នៅទីក្រុងកៀវ។ ប៉ុន្តែ កងទ័ពអ៊ុយក្រែនសោកស្តាយថា ប្រព័ន្ធការពារដែនអាកាស ពិបាកនឹងស្ទាក់ចាប់បានគ្រាប់រ៉ុកកែ្កត៣៥ដើម ដែលបានដៅបំផ្លាញ ទីក្រុងខាកៀវ និងហ្សាប៉ូរីចា៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ