សំណុំរឿងពុករលួយអឺរ៉ុប ឈានដល់ការចោទប្រកាន់ជាផ្លូវការសមាជិកសភាជាតិបែលហ្ស៊ិកម្នាក់
សំណុំរឿងពុករលួយក្នុងរង្វង់សភាអឺរ៉ុបពាក់ព័ន្ធជាមួយនឹងប្រទេសកាតា បានផុសឡើងជាថ្មី។ ក្រោយពីសេចក្តីសម្រេចរបស់សភាអឺរ៉ុបដកអភ័យឯកសិទ្ធិសមាជិកជាប់សង្ស័យប្រលាក់ប្រលូសនឹងអំពើពុករលួយកាលពីថ្ងៃទី២កុម្ភៈមក នៅថ្ងៃសៅរ៍នេះ តុលាការបែលហ្ស៊ិកបានសម្រេចធ្វើការចោទប្រកាន់ជាផ្លូវការសមាជិកសភាអឺរ៉ុបជាតិបែលហ្ស៊ិក Marc Tarabella ម៉ាក តារ៉ាបែលឡា ពីបទប្រព្រឹត្តអំពើពុករលួយ។
ចុះផ្សាយនៅថ្ងៃ៖
ស្តាប់ - ០១:៥៦
អស់អភ័យឯកសិទ្ធ និងឃាត់ខ្លួនបានកាលពីថ្ងៃព្រឹកថ្ងៃសុក្រ លោក តារ៉ាបែលតា ត្រូវជាប់ឃុំឃាំងបណ្តោះអាសន្ន ក្រោយពីបានទទួលការចោទប្រកាន់ជាផ្លូវការពីបទ ប្រព្រឹត្តអំពើពុករលួយ លាងលុយ និងចូលដៃជាមួយអង្គការឧក្រិដ្ឋកម្ម។ នេះបើតាមអ្នកនាំពាក្យតុលាការប៊ែលហ្សិក ដោយបញ្ជាក់ថា ជនជាប់ចោទត្រូវបង្ហាញខ្លួននៅមុខតុលាការ រយៈពេល៥ថ្ងៃ ចាប់ពីថ្ងៃព្រហស្បតិ៍ទៅ ស្របតាមច្បាប់របស់បែលហ្ស៊ិក។
សូមរំលឹកថានៅក្នុងសំណុំរឿងពុករលួយអឺរ៉ុបនេះ មានសមាជិកសភាបីនាក់ផ្សេងទៀត ក្នុងនោះម្នាក់ជាអតីតអនុប្រធានសភាអឺរ៉ុបជាតិក្រិក អេវ៉ា កាយលី Eva Kaili និងសមាជិកសភាអ៊ីតាលី ព្យេរ អង់តូនីញ៉ូ ប៉ង់ហ្សេរី Pier Antonio Panzeri ជាប់ឃុំឃាំងរួចទៅហើយ ក្រោយការផ្ទុះរឿងអាស្រូវនៅថ្ងៃទី៩ធ្នូ២០២២ភ្លាម។ អតីតសមាជិកសភាជាតិអ៊ីតាលីនេះ ជាជនសង្ស័យដ៏សំខាន់ ដែលបានទទួលសារភាពថាបានរៀបចំផែនការពុករលួយ តែព្រមព្រៀងចង្អុលមុខអ្នករួមដៃផ្សេងទៀត ជាថ្នូរនឹងការជាប់ទោសក្នុងពន្ធនាគារយ៉ាងយូរបំផុតត្រឹមមួយឆ្នាំ។
បើតាមកាសែតបែលហ្ស៊ិក លោក ប៉ងហ្សេរីនេះ បានឱ្យលុយជាសំណូកដល់លោក តារ៉ាបែលតា ប្រមាណ១២-១៤ម៉ឺនអឺរ៉ូ។ លោកតារ៉ាបែលតាបានបដិសេធទាំងស្រុង។ ប៉ុន្តែនៅចំពោះមុខសភាអឺរ៉ុប សមាជិកសភាផ្សេងទៀតបានសម្គាល់ឃើញថាលោក តារ៉ាបែលតា បានការពារកាតាខ្លាំងក្នុងវិស័យគោរពសិទ្ធិមនុស្សដែលជាជំហរផ្ទុយស្រលះកាលពីឆ្នាំ២០១៥ ពេលសហព័ន្ធបាល់ទាត់អន្តរជាតិសម្រេចឱ្យកាតាធ្វើជាម្ចាស់ផ្ទះប្រកួតកីឡាបាល់ទាត់ពិភពលោកឆ្នាំ២០២២។ ម្សិលមិញ តុលាការបែលហ្ស៊ិកបានចុះទៅឆែកឆេរដល់ផ្ទះ និងការិយាល័យធ្វើការព្រមទាំងគណនីក្នុងធនាគារទៀត។
នៅក្នុងការអង្កេតតែមួយនេះ តាមរយៈដីកាអន្តរជាតិ តុលាការបែលហ្ស៊ិកបានចាប់ខ្លួនសមាជិកសភាអឺរ៉ុបជាតិអ៊ីតាលីម្នាក់ទៀត លោកAndrea Cozzolino ស្និទ្ធនឹងលោកប៉ង់ហ្សេរី និងកំពុងរង់ចាំការធ្វើបត្យាប័ន។ នេះបើតាមតុលាការបែលហ្ស៊ិកដដែល៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ