សភាអឺរ៉ុបបើកប្រជុំដកអភ័យឯកសិទ្ធិសមាជិកជាប់ពាក់ព័ន្ធអំពើពុករលួយ
មួយខែក្រោយផ្ទុះរឿងអាស្រូវពុករលួយពាក់ព័ន្ធនឹងប្រទេសកាតាមក សភាអឺរ៉ុបបានប្រមូលសមាជិកបើកប្រជុំពេញអង្គពីថ្ងៃទី ១៦ដល់ថ្ងៃទី១៩មករា។ នាំមុខដោយលោកស្រីប្រធាន សភាអឺរ៉ុបចង់បោសសម្អាតអំពើពុករលួយនិងកែលម្អមុខមាត់សភាអឺរ៉ុបឡើងវិញឱ្យបានឆាប់រហ័សបំផុត។ កម្មវត្ថុនៃជំនួបប្រជុំថ្ងៃនេះ ផ្តោតជាអាទិ៍ទៅលើការដកអភ័យឯកសិទ្ធិសមាជិកពីររូបមានពាក់ព័ន្ធនឹងអំពើពុករលួយ។
ចុះផ្សាយនៅថ្ងៃ៖
ស្តាប់ - ០២:០៣
សម័យប្រជុំសភាពេញអង្គលើកទីមួយឆ្នាំ២០២៣ ត្រូវបើកជាមួយនឹងសេចក្តីប្រកាសរបស់ប្រធានសភាបើកសំណុំបែបបទលើកអភ័យឯកសិទ្ធិសមាជិកសភាពីរនាក់មានជាប់ពាក់ព័ន្ធនឹងសំណុំរឿងពុករលួយជាមួយប្រទេសកាតា គឺសមាជិកសភាអ៊ីតាលី អង់ដ្រេអា កូហ្សូលីណូ និងសមាជិកជាតិប៊ែលហ្សិក ម៉ាក តារ៉ាបាឡា។ បន្ទាប់មក គណៈកម្មការយុត្តិធម៌សភាអឺរ៉ុប នឹងសិក្សាសំណុំរឿងនេះ។
រហូតដល់ខែក្រោយ ក្នុងសម័យប្រជុំសភាពេញអង្គខែកុម្ភៈ ទើបសមាជិកសភាអឺរ៉ុបត្រូវបោះឆ្នោតសម្រេចជុំវិញការលើកអភ័យឯកសិទ្ធិសមាជិកសភាពីររូបនេះ។ ប៉ុន្តែគ្មានអ្វីគួរឱ្យសង្ស័យទេ ព្រោះគ្មានក្រុមណាប្រឆាំងទេនៅក្នុងសភាអឺរ៉ុប។
សូមបញ្ជាក់ថា រឿងអាស្រូវពុករលួយជាមួយប្រទេសកាតាបានផ្ទុះឡើងកាលពីខែធ្នូ ដោយមានការឃាត់ខ្លួនមនុស្សយ៉ាងតិច៥នាក់ ក្នុងនោះម្នាក់ជាអនុប្រធានសភាអឺរ៉ុបលោកស្រី អេវ៉ា កាយលីជាជនជាតិក្រិក ២នាក់ជាសមាជិកសភាអឺរ៉ុបនៃក្រុមសម្ព័ន្ធចម្រើនសង្គមនិយម និងប្រជាធិបតេយ្យហៅកាត់ S&D ជាតិអ៊ីតាលី និងជាតិប៊ែលហ្សិក។ សភាអឺរ៉ុបបានដកលោកស្រី អេវ៉ា កាយលី ពីតំណែងភ្លាម ហើយបានប្រកាសព្យូរទំនាក់ទំនងជាមួយកាតា ដើម្បីអង្កេត។ ប៉ុន្តែសមាជិកសភាអឺរ៉ុប និងអ្នកអង្កេតការណ៍ទាមទារឱ្យអឺរ៉ុបធ្វើកំណែទម្រង់ស៊ីជម្រៅដើម្បីកែលម្អស្ថាប័ន។
លោកស្រីប្រធានសភា ដែលត្រូវថ្លែងបើកអង្គប្រជុំនៅវេលាម៉ោង៥រសៀលម៉ោងនៅប្រទេសបារាំង បានបង្ហាញផែនការប្រយុទ្ធប្រឆាំងនឹងការកេងយកប្រយោជន៍និងការជ្រៀតជ្រែករបស់ប្រទេសទីបី តាំងពីថ្ងៃព្រហស្បតិ៍ទី ១២មករា។ ក្នុងចំណោមអាទិភាព ចម្បងៗទាំង១៤ចំណុច មានមួយចែងហាមឃាត់មិនឱ្យសមាជិកសភាធ្វើសកម្មភាពLobbieទេ។ សមាជិកសភាអឺរ៉ុបត្រូវបង្ហាញរាល់គ្រប់សកម្មភាពណាត់ជួបរបស់ខ្លួនក្នុងអាណត្តិ។
ឆន្ទៈធ្វើកំណែទម្រង់ត្រូវបានទទួលការគាំទ្រពីគ្រប់គណបក្សក្នុងសភាអឺរ៉ុបទាំងអស់ ព្រោះនៅតែប្រមាណ១៨ខែទៀត នឹងដល់ថ្ងៃរៀបចំបោះឆ្នោតសភាអឺរ៉ុបហើយ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ