សង្គ្រាមអ៊ុយក្រែន ៖ អ.ស.ប. ត្រូវការជំនួយមនុស្សធម៌៥,៦ពាន់លានសម្រាប់ឆ្នាំ២០២៣
នៅថ្ងៃពុធទី ១៥កុម្ភៈនេះ អង្គការសហប្រជាជាតិ បានប្រកាសស្វែងរកជំនួយមនុស្សធម៌ ប្រចាំឆ្នាំ២០២៣ ចំនួន ៥៦០០លានដុល្លារ។ ជាជំនួយដែលសម្រាប់យកទៅបំពេញសេចក្តីត្រូវការចាំបាច់របស់ពលរដ្ឋអ៊ុយក្រែនរស់ប្រឈមនឹងសង្គ្រាមក្នុងប្រទេស និងជនភៀសខ្លួនអ៊ុយក្រែនព្រមទាំងសហគមទទួលជនភៀសខ្លួន នៅអឺរ៉ុប។
ចុះផ្សាយនៅថ្ងៃ៖
ស្តាប់ - ០២:៣០
សង្គ្រាមរុស្ស៊ីចូលឈ្លានពានអ៊ុយក្រែន បានរំកិលពេលជិតមួយឆ្នាំហើយ។ សង្គ្រាមបន្តសម្លាប់មនុស្ស បន្តបង្ហិនបង្ហោច និងបន្តជំរុញឱ្យមានជនភៀសខ្លួន ក្នុងបរិមាណកាន់តែច្រើនគួរឱ្យតក់ស្លុត។ ហេតុដូច្នេះហើយបានជាអង្គការសហប្រជាជាតិត្រូវតែប្រឹងឱ្យអស់ពីសមត្ថភាពជួយសហគមន៍ដែលពិបាកចូលជួយ ពោលគឺរាប់ទាំងអ្នករស់នៅជិតខ្សែសមរភូមិប្រយុទ្ធជួរមុខផង។ នេះបើតាមសេចក្តីថ្លែងការណ៍របស់លោក Martin Griffiths នាយកប្រតិបត្តិការមនុស្សធម៌អង្គការសហប្រជាជាតិ ដោយបន្ថែមថា ទុក្ខសោករបស់ប្រជាពលរដ្ឋអ៊ុយក្រែនមិនងាយបញ្ចប់ទេ ពួកគេបន្តត្រូវការជំនួយគាំទ្រពីអន្តរជាតិណាស់។
ដូច្នេះសម្រាប់ឆ្នាំ២០២៣នេះ ភ្នាក់ងារមនុស្សធម៌អង្គការសហប្រជាជាតិចាំបាច់ត្រូវការប្រាក់ចំនួន ៣ពាន់៩រយលានដុល្លារ សម្រាប់ជួយប្រជាពលរដ្ឋរងគ្រោះក្នុងប្រទេសអ៊ុយក្រែនចំនួន ១១,១លាននាក់ និង ១ពាន់៧រយលានដុល្លារ សម្រាប់ជួយជនភៀសខ្លួន ដែលមួយភាគធំនៃជំនួយត្រូវចែកទៅឱ្យប៉ូឡូញ ប្រទេសទទួលជនភៀសខ្លួនអ៊ុយក្រែនច្រើនជាងគេ បន្ទាប់មកគឺប្រទេសម៉ុលដាវី។ បើតាមអង្គការសហប្រជាជាតិ គិតចាប់ពីថ្ងៃទី ២៤កុម្ភៈ២០២២ដល់ខែមករា២០២៣ មានពលរដ្ឋអ៊ុយក្រែន៤,៩លាននាក់ ក្លាយជាជនភៀសខ្លួន ដោយបានចុះឈ្មោះក្នុងបញ្ជីអ្នកទទួលការការពារបណ្តោះអាសន្នពីសហភាពអឺរ៉ុប ឬពីប្រទេសនៅអឺរ៉ុប (៨៦%ជាស្រ្តីនិងកុមារ)។
ជាលើកទីមួយ អឺរ៉ុបបានបង្ហាញសមត្ថភាពបញ្ចេញសកម្មភាពជាធ្លុងមួយជួយជនភៀសខ្លួនអ៊ុយក្រែន ប៉ុន្តែបើតាមប្រមុខភា្នក់ងារទទួលបន្ទុកជនភៀសខ្លួនអង្គការសហប្រជាជាតិ សមានចិត្តនិងការទទួលស្វាគមន៍ជនភៀសខ្លួននៅមិនចប់ទេ អន្តរជាតិត្រូវបន្តគាំទ្រទៀត រហូតណាទាល់តែជនភៀសខ្លួនអ៊ុយក្រែនអាចត្រលប់ទៅផ្ទះពួកគេវិញប្រកបដោយសុខសុវត្ថិភាព និងភាពថ្លៃថ្នូរ។
នៅក្នុងសារអំពាវនាវរកជំនួយមូលនិធិ អង្គការសហប្រជាជាតិ បានគូសបញ្ជាក់ថា កាលពីឆ្នាំ២០២២ អង្គការបានទទួលជំនួយ៨០%នៃផែនការស្នើសុំចំនួន៤៣០០លានដុល្លារសម្រាប់អ៊ុយក្រែន។ ចំណែកការគាំទ្រដល់ជនភៀសខ្លួនដែលមានទឹកប្រាក់សរុប១៧៩០លានដុល្លារវិញ បានទទួលការឧបត្ថម្ភដល់ទៅ៧១%។ សង្ឃឹមថាអន្តរជាតិនឹងបន្តមានសណ្តានចិត្តល្អចំពោះអ៊ុយក្រែនជារហូតទៅ។ នេះបើតាមការគូសបញ្ជាក់របស់ប្រមុខដឹកនាំស្ថាប័នជនភៀសខ្លួនអង្គការសហប្រជាជាតិលោក Filippo Grandi៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ