សង្រ្គាមរុស្ស៊ីឈ្លានពានអ៊ុយក្រែន៖ អ៊ីស្រាអែលកំពុងងាកទៅរកអ៊ុយក្រែន?
មានជំហរអព្យាក្រិត តាំងពីដំបូងទីនៃសង្រ្គាមរុស្ស៊ីឈ្លានពានអ៊ុយក្រែន រដ្ឋាភិបាលរបស់អ៊ីស្រាអែលបានបង្ហាញទំនោរទៅរកអ៊ុយក្រែន តាមរយៈទស្សនកិច្ច ជាលើកទី១ របស់ប្រមុខការបរទេសអ៊ីស្រាអែល នៅទីក្រុងកៀវ។ ធ្វើដំណើរទៅដល់ទីក្រុងកៀវ កាលពីថ្ងៃព្រហស្បតិ៍ ក្នុងឱកាសសម្ពោធ បើកឲ្យដំណើរការឡើងវិញ ស្ថានទូតអ៊ីស្រាអែល នៅអ៊ុយក្រែន រដ្ឋមន្រ្តីការបរទេសអ៊ីស្រាអែលបានប្រកាសសាមគ្គីភាពជាមួយអ៊ុយក្រែន គាំទ្របូរណភាព និងដែនអធិបតេយ្យរបស់អ៊ុយក្រែន។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:៥៦
នៅក្នុងរយៈពេលជិត១ឆ្នាំនៃសង្រ្គាមរុស្ស៊ីឈ្លានពានអ៊ុយក្រែន អ៊ីស្រាអែលព្យាយាមប្រកាន់ជំហរអព្យាក្រិត។ អ៊ីស្រាអែលថ្កោលទោសការឈ្លានពានរបស់រុស្ស៊ី នៅអ៊ុយក្រែន ប៉ុន្តែ បដិសេធមិនផ្តល់ជំនួយសព្វាវុធ ទៅតាមការទទូចសុំពីប្រធានាធិបតីអ៊ុយក្រែន ដើម្បីកុំឲ្យរុស្ស៊ីខឹងថ្នាំងថ្នាក់ចិត្តជាមួយអ៊ីស្រាអែល។
ប៉ុន្តែ នៅចំពោះមុខការវិវត្តនៃសង្រ្គាម ជាពិសេស នៅក្រោយ អ៊ីរ៉ង់ ដែលជាសត្រូវដ៏ធំរបស់អ៊ីស្រាអែល នៅដើមបូព៌ា បានផ្គត់ផ្គង់យន្តហោះដ្រូន ទៅឲ្យរុស្ស៊ីធ្វើសង្រ្គាមនៅអ៊ុយក្រែន រដ្ឋាភិបាលអ៊ីស្រាអែល បានផ្លាស់ប្តូរជំហររបស់ខ្លួន នៅក្នុងសំណុំរឿងសង្រ្គាមអ៊ុយក្រែន។
នៅថ្ងៃព្រហស្បតិ៍ រដ្ឋាភិបាលថ្មីរបស់អ៊ីស្រាអែល បានបញ្ជូនរដ្ឋមន្រ្តីការបរទេសរបស់ខ្លួន ទៅធ្វើទស្សនកិច្ចជាលើកទី១ នៅទីក្រុងកៀវ ជាទីដែលអ៊ីស្រាអែលត្រូវបើកទ្វារស្ថានទូតឡើងវិញ នៅក្រោយ បិទទ្វារជិតមួយឆ្នាំ ដោយសារសង្រ្គាមរុស្ស៊ីឈ្លានពានអ៊ុយក្រែន។
នៅក្នុងសារធ្វីត មុនទៅដល់ទីក្រុងកៀវ ប្រមុខការបរទេសអ៊ីស្រាអែល លោកEli Cohen បានសរសេរថា លោកទៅអ៊ុយក្រែន ដើម្បីឈរនៅខាងអ៊ុយក្រែន ជាមួយប្រជាជនអ៊ុយក្រែន ក្នុងពេលវេលាដ៏លំបាក។
នៅមុនជំនួបជាមួយសមភាគីអ៊ុយក្រែន រដ្ឋមន្រ្តីការបរទេសអ៊ីស្រាអែលធ្វើដំណើរទៅទីក្រុងប៊ូឆា កន្លែងដែលមានការសម្លាប់រង្គាលប្រជាជនស៊ីវិល ក្នុងអំឡុងកាន់កាប់មួយរយៈរបស់កងទ័ពរុស្ស៊ី។ សម្រាប់ប្រមុខការបរទេសអ៊ីស្រាអែល គេមិនអាចធ្វើ មិនដឹង មិនលឺនៅចំពោះមុខ រូបភាព រឿងរ៉ាវកាប់សម្លាប់ដ៏ឃោឃៅ នៅប៊ូឆាបានទេ។ អ៊ីស្រាអែលថ្កោលទោស ការវាយប្រហារ ដោយចេតនាទៅលើប្រជាជនស៊ីវិល។
នៅក្នុងសន្និសីទកាសែតជាមួយ រដ្ឋមន្រ្តីការបរទេសអ៊ុយក្រែន នៅល្ងាចថ្ងៃព្រហស្បតិ៍ ប្រមុខការបរទេសអ៊ីស្រាអែល លោកEli Cohenបាននិយាយថា អ៊ីស្រាអែលគាំទ្រសន្និសីទដើម្បីសន្តិភាព ដែលរៀបចំឡើងនៅអង្គការសហប្រជាជាតិ នៅសប្តាហ៍ក្រោយ ដែលស្នើឡើងដោយភាគីអ៊ុយក្រែន ប៉ុន្តែ ដែលរុស្ស៊ីទាត់ចោល មិនទទួលស្គាល់។
ប្រមុខការបរទេសអ៊ីស្រាអែលអះអាងថា អ៊ីស្រាអែលនឹងស្វែងរកជំនួយឲ្យ២០០លានដុល្លារ ដើម្បីជួយអ៊ុយក្រែន ប៉ុន្តែ បដិសេធមិននិយាយពីជំនួយសព្វាវុធ តាមការចង់បានរបស់អ៊ុយក្រែន។ នៅក្នុងសន្និសីទកាសែត រដ្ឋមន្រ្តីការបរទេសអ៊ីស្រាអែលគ្រាន់តែបញ្ជាក់ថា អ៊ីស្រាអែលអាចជួយអ៊ុយក្រែនអភិវឌ្ឍប្រព័ន្ធការពារដែនអាកាស ដែលអាចជួយឲ្យអ៊ុយក្រែនដឹងតម្រុយ មុនមានការវាយប្រហារផ្លូវអាកាស។
នៅខែកុម្ភៈ នាយករដ្ឋមន្រ្តីអ៊ីស្រាអែល លោកបិនចាមីន នេតាន់យ៉ាហ៊ូ បាននិយាយប្រាប់ទូរទស្សន៍អាមេរិក CNNថា ប្រទេសរបស់លោកអាចគ្រោងផ្តល់ជំនួយយោធាដល់អ៊ុយក្រែន ប៉ុន្តែ អ៊ីស្រាអែលក៏ចង់ដើរតួជាអាជ្ញាកណ្តាលសម្របសម្រួលភាគីជម្លោះដែរ។ ក្រសួងការបរទេសរុស្ស៊ីបានប្រតិកម្មភ្លាម ដោយព្រមានទៅកាន់ប្រទេសផ្តល់ជំនួយយោធាទៅអ៊ុយក្រែនថា រាល់ការផ្តល់សព្វាវុធទៅអ៊ុយក្រែន ជាមេភ្លើង ធ្វើឲ្យផ្ទុះសង្រ្គាមកាន់តែធំ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ