បារាំងធ្វើសមយុទ្ធទ្រង់ទ្រាយធំសម្រាប់ប្រតិបត្តិការសង្គ្រាមរដ្ឋទល់នឹងរដ្ឋ
សមយុទ្ធទ្រង់ទ្រាយធំដ៏កម្រកំពុងប្រព្រឹត្តទៅនៅក្នុងប្រទេសបារាំង។ សមយុទ្ធនេះ ដែលនឹងត្រូវបន្តធ្វើរហូតដល់ថ្ងៃទី១១មីនាខាងមុខ មានការចូលរួមពីសំណាក់កងទ័ពចម្រុះ ហើយផ្តោតចម្បងលើការហាត់សម អំពីប្រតិបត្តិការសង្គ្រាមទ្រង់ទ្រាយធំ រវាងរដ្ឋ និងរដ្ឋ។
ចុះផ្សាយនៅថ្ងៃ៖
សមយុទ្ធដែលកំពុងប្រព្រឹត្តទៅនៅក្នុងប្រទេសបារាំង នៅក្នុងពេលបច្ចុប្បន្ននេះ មានការចូលរួមពីសំណាក់កងទ័ពចំនួន ៧ពាន់នាក់ មកពីកងទ័ពជើងគោក ជើងទឹក និងជើងអាកាស ដាក់ពង្រាយនៅតាមបណ្តាខេត្តជាច្រើន នៅប៉ែកខាងត្បូងប្រទេស ដោយត្រូវហាត់សមអំពីប្រតិបត្តិការវាយលុកដោយទ័ពឆ័ត្រយោង ក៏ដូចជាប្រតិបត្តិការវាយលុកឡើងគោកពីទីសមុទ្រ ដើម្បីចូលជួយប្រទេសមួយ ដែលរងការឈ្លានពានពីសំណាក់ប្រទេសមួយទៀត។
សមយុទ្ធនេះ គឺជាផ្នែកមួយនៃសមយុទ្ធទ្រង់ទ្រាយធំ ដែលគេឲ្យឈ្មោះថា “Orion 2023” ដែលបារាំងគ្រោងធ្វើជាបន្តបន្ទាប់ នៅក្នុងឆ្នាំនេះ ហើយនឹងត្រូវធ្វើជាប់ជាប្រចាំទៅថ្ងៃអនាគត នៅរៀងរាល់៣ឆ្នាំម្តង។ ដំណាក់កាលទីពីរនៃសមយុទ្ធ Orion នេះ ដោយនឹងមានការចូលរួមពីសំណាក់កងទ័ពរហូតដល់ទៅ ១ម៉ឺន២ពាន់នាក់ នឹងត្រូវបើកធ្វើ នៅក្នុងអំឡុងខែមេសាខាងមុខ។
នេះជាសមយុទ្ធទ្រង់ទ្រាយធំបំផុតមួយ ដែលបារាំងមិនធ្លាប់បើកធ្វើ នៅក្នុងរយៈពេលប្រមាណជា ២០ឆ្នាំកន្លងទៅនេះ ហើយវាក៏ជាសមយុទ្ធដ៏កម្រមួយដែរ ដែលហាត់សមអំពីប្រតិបត្តិការសង្គ្រាមទ្រង់ទ្រាយធំ រវាងរដ្ឋ និងរដ្ឋ។
គួរកត់សម្គាល់ថា នៅក្នុងរយៈពេលជាច្រើនឆ្នាំកន្លងទៅនេះ កងទ័ពបារាំងផ្តោតចម្បងតែទៅលើប្រតិបត្តិការប្រឆាំងភេរវកម្ម ឬប្រតិបត្តិការទល់នឹងកងកម្លាំងប្រដាប់អាវុធតូចៗ ដែលមិនមែនជាកងទ័ពជាតិរបស់រដ្ឋ។
ការងាកមកផ្តោតលើការហាត់សមប្រតិបត្តិការសង្គ្រាមរវាងរដ្ឋ និងរដ្ឋ បូករួមជាមួយនឹងការសម្រេចបង្កើនថវិកាការពារជាតិដ៏ច្រើនសន្ធឹកសន្ធាប់ កាលពីពេលថ្មីៗនេះ គឺជាការបញ្ជាក់ឲ្យឃើញ អំពីចំណុចរបត់ដ៏ចម្បងមួយនៃវិស័យការពារជាតិបារាំង នៅក្នុងបរិបទថ្មីនៃសន្តិសុខ និងភូមិសាស្រ្តនយោបាយអឺរ៉ុប នៅក្រោយពេលដែលរុស្ស៊ីចូលឈ្លានពានអ៊ុយក្រែន៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ