នៅរុស្ស៊ី ដ្រូន១គ្រឿង ធ្លាក់បុកដីបែកខ្ទេច នៅជាយក្រុងម៉ូស្គូ ចំណែក ៣ គ្រឿងទៀត ត្រូវបាញ់កម្ទេច
ថ្ងៃអង្គារទី ២៨កុម្ភៈ ដ្រូន ១ គ្រឿង ស្រាប់តែធ្លាក់បែកខ្ទេច នៅចម្ងាយប្រមាណ ១០០ គម ពីក្រុងម៉ូស្គូ មិនឆ្ងាយប៉ុន្មាន ពី ស្ថានីយបង្ហាប់ឧស្ម័ន - ដំណឹងនេះ ប្រកាសដោយ អាជ្ញាធរ ទាំងបន្ថែមថា ដ្រូន ៣ គ្រឿងទៀត ត្រូវបានបាញ់កម្ទេច នៅតំបន់ផ្សេងនៃប្រទេសរុស្ស៊ី។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០៣:០១
ឧប្បត្តិហេតុជាច្រើន បណ្តាលមកពី ដ្រូន បានប្រព្រឹត្តទៅ នាប៉ុន្មានខែចុងក្រោយ នៅលើដែនដី រុស្ស៊ី ជួនកាលនៅឆ្ងាយពីសមរភូមិអ៊ុយក្រែនសោះ ប៉ុន្តែជាលើកទី១ ដែល ឧប្បត្តិហេតុបែបនេះ បានកើត ឡើងនៅ តំបន់រដ្ឋធានីម៉ូស្គូ តែម្តង។
អភិបាលតំបន់នេះ លោក Andrei Vorobiov បានថ្លែងថា មានដ្រូន ១ គ្រឿង ស្រាប់តែធ្លាក់នៅក្បែរ ទី ប្រជុំជន Goubastovo ចម្ងាយប្រមាណ ១០០ គម អាគ្នេយ៍ ពីក្រុងម៉ូស្គូ។ ផ្ទាំងស៊ីប នៃដ្រូននេះ តាមមើល ទៅ គឺ ទីតាំងស៊ីវិលមួយ ដែលមិនបានខូចខាតឡើយ - លោកអភិបាល សរសេរក្នុង Telegram ។ គាត់មិន បានលំអិតទេ ប៉ុន្តែ ឃុំ Goubastovo ផ្ទាល់ ស្ថិតនៅ ជិត ស្ថានីយបង្ហាប់ឧស្ម័ន របស់ក្រុមហ៊ុនយក្ស ខាង ឧស្ម័ន Gazprom ។ សំណាងល្អ គ្មានអ្នកធ្លាក់ខ្លួនរងគ្រោះ និងគ្មានការបំផ្លិចបុំផ្លាញទេនៅលើដី - លោក Andrei Vorobiov បន្ថែម ដោយគូសបញ្ជាក់ថា សន្តិសុខផ្ទៃក្នុង FSB និង បណ្តាអង្គការមានសមត្ថកិច្ច ក្តាប់ស្ថានការណ៍នេះ ក្នុងដៃខ្លួន។
រដ្ឋមន្ត្រីថាមពលនៃខេត្តនោះ ការចុះផ្សាយនៃទីភ្នាក់ងារព័ត៌មាន RIA Novosti បានបញ្ជាក់ថា ការធ្លាក់ដ្រូន មិនបានអូសទាញស្ថានការណ៍ ទៅក្នុងវិបត្តិឡើយ និងថា បណ្តាញចែកចាយឧស្ម័ន ដំណើរការ ជាប្រក្រតី ធម្មតា។
ដោយឡែក កងទ័ពរុស្ស៊ី អះអាងថា ក្នុងយប់ឆ្លងមកថ្ងៃអង្គារ បានបាញ់ធ្លាក់ ដ្រូនអ៊ុយក្រែន ២ គ្រឿង ដែលតម្រង់ទៅលើហេដ្ឋារចនាសម្ព័ន្ធស៊ីវិល នៅប៉ែកនីរតី ប្រទេសរុស្ស៊ី។
របបក្រុងកៀវ បានប៉ុនប៉ងវាយប្រហារនឹងដ្រូន ទៅលើហេដ្ឋារចនាសម្ព័ន្ធស៊ីវិល ក្នុងខេត្ត Krasnodar និង ក្នុង ខេត្ត Adyguée - ការនេះ លើកឡើង ក្នុងសេចក្តីថ្លែងការណ៍ ក្រសួងការពារជាតិរុស្ស៊ី ទាំង លំអិតថា ដ្រូន ២ គ្រឿង ត្រូវបានបាញ់កំទេច ដោយមិនបង្កជាការខូចខាតអ្វីណា នៅលើដីឡើយ។
ចំណែក អាជ្ញាធរខេត្តរុស្ស៊ីមួយទៀត គឺខេត្ត Briansk ជាប់នឹងព្រំដែនអ៊ុយក្រែន ក៏បានប្រកាសថា បានបាញ់កំទេច ដ្រូនអ៊ុយក្រែន ១ គ្រឿង នៅព្រឹកថ្ងៃអង្គារ ដោយមិននាំគ្រោះថ្នាក់ដល់អ្នកស្រុក និង ការខូចខាតអ្វី នៅលើដី។ នេះបើតាម សេចក្តីអះអាងលើ Telegram របស់អភិបាលខេត្ត Briansk លោក Alexandre Bogomaz។
តាំងពី រុស្ស៊ីបានផ្តើមវាយលុកចូលអ៊ុយក្រែន មួយឆ្នាំមុន ទីប្រជុំជន និង ហេដ្ឋារចនាសម្ព័ន្ធ ក្នុងខេត្តណា ដែលស្ថិតនៅជាប់នឹងព្រំដែនរុស្ស៊ី បានរងការវាយប្រហារ ជាច្រើនលើក ដោយ ដ្រូន ដែលក្រុងម៉ូស្គូ ចោទថា ជារបស់អ៊ុយក្រែន។
នៅដំណាច់ឆ្នាំមុន កងទ័ពរុស្ស៊ីបានពោលអាងថា យោធាខ្លួន ៣នាក់ អភ័ព្វស្លាប់ដោយ សារអំបែងខ្ទាត ចេញ ពីដ្រូនអ៊ុយក្រែន ដែលបាញ់ធ្លាក់នៅជិត មូលដ្ឋានកងទ័ពអាកាសរុស្ស៊ី ចម្ងាយ ៥០០ គីឡូម៉ែត្រពីព្រំដែនអ៊ុយក្រែន៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ