លោកម៉ាក្រុងជួបលោកស៊ូណាក់ ក្នុងជំនួបកំពូលទ្វេភាគីបារាំង-អង់គ្លេស
នៅប្រមាណជាង១០ថ្ងៃ មុនដំណើរទស្សនកិច្ចផ្លូវរដ្ឋជាលើកទីមួយ មកកាន់ប្រទេសបារាំង របស់ព្រះអង្គសាលទី៣ ព្រះមហាក្សត្រអង់គ្លេស នៅថ្ងៃសុក្រទី១០មីនា លោកប្រធានាធិបតីបារាំង អេម៉ានុយអែល ម៉ាក្រុង នឹងជួបជាមួយលោកនាយករដ្ឋមន្ត្រីអង់គ្លេស រីស៊ី ស៊ូណាក់ ក្នុងក្របខណ្ឌជំនួបកំពូលទ្វេភាគី។ ប៉ុន្មានឆ្នាំមកនេះ ទំនាក់ទំនងរវាងរដ្ឋាភិបាលបារាំង អង់គ្លេស បានជួបបញ្ហារកាំរកូសជាបន្តបន្ទាប់។ តាមការគ្រោងទុក សំណុំរឿងគ្រប់គ្រងជនអន្តប្រវេសន៍ខុសច្បាប់ គឺជាអ្វីដែលភាគីទាំង២នឹងលើកមកនិយាយគ្នាជាអាទិភាព ខណៈសំណុំរឿងជួយអ៊ុយក្រែន ក៏នៅមិនឆ្ងាយប៉ុន្មានពីជំនួបនេះដែរ។
ចុះផ្សាយនៅថ្ងៃ៖
ស្តាប់ - ០២:៤៦
ជំនួបកំពូលទ្វេភាគីប្រចាំឆ្នាំ រវាងបារាំងនិងអង់គ្លេស ត្រូវបានអាក់ខានចាប់តាំងពីឆ្នាំ២០១៨មក ដោយសារតែបញ្ហារកាំរកូសជាបន្តបន្ទាប់ រាប់ចាប់ពីបញ្ហាBrexit បញ្ហាសម្ព័ន្ធភាពAukus នៅតំបន់ឥណ្ឌូប៉ាស៊ីហ្វិក និងបញ្ហាជនអន្តោប្រវេសន៍ខុសច្បាប់ ដែលធ្វើឲ្យប្រទេសទាំង២ មើលមុខគ្នាមិនសូវត្រង់។ នរណាក៏ដឹងដែរ ថាទំនាក់ទំនងរវាងលោកម៉ាក្រុងនិងលោកបូរីស ចនសុន អតីតនាយករដ្ឋមន្ត្រីអង់គ្លេស មិនសូវជាល្អនោះទេ។ ក្រោយមកលោកស្រី លីស ត្រាស់ ដែលមកកាន់តំណែងបានតែជាង៤០ថ្ងៃ បានបដិសេធមិនឆ្លើយនឹងសំណួរអ្នកកាសែតទៀត ដែលសួរថា “តើលោកម៉ាក្រុង ជាមិត្ត ឬជាសត្រូវ” ?
ក្រោយការចូលកាន់តំណែងរបស់លោករីស៊ី ស៊ូណាក់ គេសង្កេតឃើញថា រដ្ឋាភិបាលទាំង២ ហាក់បានបង្ហាញជំហរ ប្រឹងប្រែងធ្វើឲ្យទំនាក់ទំនងរវាងប្រទេសទាំង២នេះ បានល្អប្រសើរឡើងវិញ។ ជាងនេះទៀត នៅក្នុងបរិបទសង្គ្រាមអ៊ុយក្រែន ដែលតម្រូវឲ្យមហាអំណាចនុយក្លេអ៊ែរទាំង២ប្រចាំអឺរ៉ុបនេះ ត្រូវតែរួមសាមគ្គីគ្នា។
យ៉ាងណាក៏ដោយ អ្វីដែលកម្មវត្ថុធំបំផុត របស់រដ្ឋាភិបាលអង់គ្លេសនាពេលនេះ គឺនិយាយជាមួយភាគីបារាំង ស្តីអំពីការគ្រប់គ្រងព្រំដែន ដើម្បីទប់ស្កាត់ជនអន្តោប្រវេសន៍ខុសច្បាប់ ដែលជិះទូកឆ្លងសមុទ្រផ្សងគ្រោះថ្នាក់ ចូលទៅកាន់ប្រទេសអង់គ្លេស។ បញ្ហាគ្រប់គ្រងអន្តោប្រវេសន៍ខុសច្បាប់ វាគឺជាការសន្យារបស់គណបក្សអភិរក្សនិយមអង់គ្លេស ដែលអះអាងថានឹងគ្រប់គ្រងព្រំដែនឲ្យបានតឹងតែង នៅពេលណាអង់គ្លេសចាកចេញពីសហភាពអឺរ៉ុប។ ប្រភពពីមន្ត្រីរដ្ឋាភិបាលអង់គ្លេស បានឲ្យដឹងថា អង់គ្លេសត្រូវការការសហការពីបារាំង នៅក្នុងការរឹតបន្តឹងឲ្យកាន់តែខ្លាំង ដល់ការយាមល្បាតតាមឆ្នេរនិងនៅក្នុងសមុទ្រ ដើម្បីទប់ស្កាត់ទូកដឹកជនអន្តោប្រវេសន៍។
សូមបញ្ជាក់ថា អង់គ្លេស និងបារាំងបានចុះកិច្ចព្រមព្រៀងនឹងគ្នា ច្រើនដងមកហើយ ដើម្បីព្យាយាមទប់ជនអន្តោប្រវេសន៍ឆ្លងសមុទ្រម៉ង់ឆ៍ (Manche)។ តែយ៉ាងណា ចំនួនជនអន្តោប្រវេសន៍ឆ្លងសមុទ្រកាន់តែកើន។ ឆ្នាំ២០២២កន្លងទៅ មានជនអន្តោប្រវេសន៍ចំនួន ៤៦០០០នាក់ ដែលបានឆ្លងទៅដល់ឆ្នេរអង់គ្លេសដោយខុសច្បាប់។ កាលពីថ្ងៃអង្គារកន្លងទៅ រដ្ឋាភិបាលរបស់លោករីស៊ី ស៊ូណាក់ បានបង្ហាញសេចក្តីស្នើច្បាប់ថ្មីមួយ ប្រឆាំងអន្តោប្រវេសន៍ខុសច្បាប់ ហើយដែលទទួលបានការរិះគន់យ៉ាងខ្លាំង ពីអង្គការសហប្រជាជាតិ។
ក្រៅពីសំណុំរឿងអន្តោប្រវេសន៍ ថ្នាក់ដឹកនាំបារាំងនិងអង់គ្លេសនឹងនិយាយគ្នាផងដែរ អំពីផែនការផ្តល់ជំនួយទៅកាន់អ៊ុយក្រែន។ ជំនួយដែលមានជាគ្រឿងបរិក្ខាយោធា និងការបណ្តុះបណ្តាលបច្ចេកទេសជំនាញដល់ទាហានអ៊ុយក្រែន។ ជាមួយនឹងវត្តមានចូលរួមដោយរដ្ឋមន្ត្រី៧រូបទាំងសងខាង ក្នុងជំនួបកំពូលនេះ បារាំងនិងអង់គ្លេស គ្រោងចុះកិច្ចព្រមព្រៀងយុទ្ធសាស្ត្រជាមួយគ្នាដែរ ស្តីពីការអភិវឌ្ឍន៍ថាមពលនុយក្លេអ៊ែរ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ