ទួរអេហ្វែលគ្រោងរៀបចំប្រារព្ធខួប១០០ឆ្នាំនៃមរណភាពលោកហ្គូស្តាវ អេហ្វែល
ឆ្នាំ២០២៣នេះ គឺជាខួបគម្រប់ ១០០ឆ្នាំនៃមរណភាពលោកហ្គូស្តាវ អេហ្វែល (Gustave Eiffel) ដែលជាអ្នកសាងសង់ទួរអេហ្វែល ក៏ដូចជាសំណង់ដែកសំខាន់ៗជាច្រើនផ្សេងទៀត។ នៅក្នុងឱកាសខួប១០០ឆ្នាំនេះ ក្រុមហ៊ុនគ្រប់គ្រងទួរអេហ្វែល ក៏ដូចជា សមាគមកូនចៅត្រកូលអេហ្វែល គ្រោងរៀបចំកម្មវិធីជាច្រើន ដើម្បីរំឭកខួបវិស្វករ និងសហគ្រិនដ៏ជោគជ័យមួយនេះ។
ចុះផ្សាយនៅថ្ងៃ៖ កែប្រែថ្ងៃទី៖
“នៅចុងសតវត្សរ៍ទី១៩ សាងសង់នៅចំកណ្តាលក្រុងប៉ារីស នូវប៉មកម្ពស់ ៣០០ម៉ែត្រ ដែលជាប៉មខ្ពស់បំផុតនៅលើពិភពលោកនៅពេលនោះ គឺជារឿងដ៏សែនស្មុគស្មាញបំផុត ដែលគេមិននឹកស្មានថានឹងអាចធ្វើបាន”នេះគឺជាការលើកឡើងរបស់លោក ហ្សង់ហ្វ្រង់ស័រ ម៉ារតាំង (Jean-François Martins) នាយកក្រុមហ៊ុនគ្រប់គ្រងទួរអេហ្វែល (Société d’exploitation de la tour Eiffelហៅកាត់ថា SETE) នៅក្នុងអំឡុងសន្និសីទសារព័ត៌មាននៅទួរអេហ្វែល កាលពីថ្ងៃព្រហស្បតិ៍ ៩មីនា។
គួរបញ្ជាក់ថា ទួរអេហ្វែល ត្រូវបានសាងសង់ឡើងដោយលោក ហ្គូស្តាវ អេហ្វែល កាលពីឆ្នាំ១៨៨៩ ហើយបច្ចុប្បន្នត្រូវបានគេស្គាល់ជាទូទៅថាជានិមិត្តរូបនៃទីក្រុងប៉ារីស។ ទួរអេហ្វែលក៏ជាទីតាំងទេសចរណ៍ដ៏ល្បីមួយផងដែរ ដោយនៅឆ្នាំ២០២២កន្លងទៅនេះ មានអ្នកចូលទស្សនារហូតដល់ទៅជាង ៦លាននាក់ ហើយរកប្រាក់ចំណូលបានប្រមាណជា ១០០លានអឺរ៉ូ (យោងតាមតួលេខផ្តល់ដោយក្រុមហ៊ុន SETE)។
នៅក្នុងឱកាសខួប១០០ឆ្នាំនៃមរណភាពរបស់លោកហ្គូស្តាវ អេហ្វែល កម្មវិធីជាច្រើននឹងត្រូវគេរៀបចំធ្វើឡើង នៅក្នុងចន្លោះពីខែឧសភា ដល់ខែវិច្ឆិកា ដោយនៅប៉ារីស អ្នកចូលទស្សនាទួរអេហ្វែល នឹងអាចទស្សនាផងដែរប្រវត្តិនៃការសាងសង់ទួរអេហ្វែល តាមរយៈ Virtual Tour ដោយនៅក្នុងនោះ គេនឹងអាចឃើញលោកហ្គូស្តាវ អេហ្វែល ជាអ្នករៀបរាប់ អំពីប្រវត្តិសាងសង់នេះ។
គួរបញ្ជាក់ផងដែរថា ហ្គូស្តាវ អេហ្វែល មិនមែនសាងសង់តែទួរអេហ្វែលនេះមួយទេ តែបានសាងសង់សំណង់ជាច្រើនផ្សេងទៀត ទាំងនៅក្នុងប្រទេសបារាំង និងនៅតាមបណ្តាប្រទេសជាច្រើនផ្សេងទៀត នៅទូទាំងពិភពលោក ក្នុងចំណោមសំណង់នៅបរទេសនោះ ក៏មានដែរ គ្រោងឆ្អឹងរូបសំណាកសេរីភាព (Statue of Liberty) នៅទីក្រុងញូវយ៉ក៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ