បារាំង-អង់គ្លេសចាប់ដៃគ្នា សាងទំនុកចិត្ត ហើយរួមគ្នាទប់ស្កាត់លំហូរជនអន្តោប្រវេសន៍
នាយករដ្ឋមន្ត្រីអង់គ្លេស បានប្រកាសសហការជាមួយបារាំង ក្នុងគម្រោងទប់ស្កាត់លំហូរជនភៀសខ្លួនខុសច្បាស់ ដែលចេញបន្តពីទឹកដីបារាំង ឆ្លងសមុទ្រទៅ អង់គ្លេស។ ក្នុងគម្រោងនេះ អង់គ្លេសសម្រេចផ្តល់វិភាគទានទឹកប្រាក់ ជាង ៥០០លានអឺរ៉ូ។ ការប្រកាសដូច្នេះ គឺធ្វើឡើងនៅក្នុងដំណើរទស្សនកិច្ចពេញ១ថ្ងៃសុក្រ ទី១០មីនា នៅទីក្រុងប៉ារីស ជាទីដែល នាយករដ្ឋមន្ត្រីអង់គ្លេស អមដំណើរដោយរដ្ឋមន្ត្រីអង់គ្លេស ៧ រូប ជួបចរចាជាមួយប្រធានាធិបតីបារាំង។
ចុះផ្សាយនៅថ្ងៃ៖
ស្តាប់ - ០២:២២
សំណុំរឿងលំហូរជនភៀសខ្លួនខុសច្បាស់ ដែលចេញបន្តពីទឹកដីបារាំង ឆ្លងសមុទ្រ La Manche ទៅ អង់គ្លេស គឺជាប្រធានបទរស៊ើបសម្រាប់នយោបាយផ្ទៃក្នុងទាំងពីរភាគី។ នាយករដ្ឋមន្ត្រីអង់គ្លេសនីមួយៗ ត្រូវរងការរិះគន់ជុំវិញចំណាត់ការទប់ស្កាត់ជនភៀសខ្លួន ជាពិសេស នេះគឺជាទាមទាររបស់គណបក្សអភិរក្សនិយម បក្សកាន់អំណាចរបស់អង់គ្លេស។ ម្តងម្តាល អាជ្ញាធរអង់គ្លេស ក៏បានទម្លាក់កំហុសលើបារាំង និងថែមទាំងបានប៉ះទង្គិចសម្តីគ្នាខ្លះផង។ សូម្បីតែនាយករដ្ឋមន្ត្រីអង់គ្លេសអាណត្តិមុន អ្នកស្រី លីស្ស ត្រាស្ស ក៏បដិសេធមិនឆ្លើយនឹងសំណួរអ្នកកាសែត ដែលសួរថា តើប្រធានាធិបតីបារាំងលោក ម៉ាក្រុង ជាមិត្តឬជាសត្រូវ។
ផ្ទុយពីនេះ នាយករដ្ឋមន្ត្រីអង់គ្លេស រីស៊ី ស៊ូណាក់ បានអះអាងជាមួយកាសែតបារាំង Le Frigaro ក្នុងដំណើរមកប៉ារីស ថាលោក ម៉ាក្រុង ជា«មហាមិត្តដ៏ពិតប្រាកដ»។
ពីចំណែកខ្លួន ប្រធានាធិបតីបារាំង លោក ម៉ាក្រុង បានប្រកាសក្នុងសន្និសីទកាសែតរួមគ្នា ពីការបើកទំព័រទំនាក់ទំនងថ្មីជាមួយអង់គ្លេស ដោយឈរលើទំនុកចិត្តនិងកិច្ចសហការរួមគ្នា។ ភាគីថ្នាក់ដឹកនាំទាំងពីរ បានយល់ព្រមពួតដៃគ្នាទប់ស្កាត់ជនភៀសខ្លួន ត្រង់ច្រកសមុទ្រ La Manche ប្រវែងប្រមាណជាង ៤០ គីឡូម៉ែត្រចន្លោះប្រទេសទាំងពីរ។
អាជ្ញាធរបារាំងនិងអង់គ្លេស គ្រោងនឹងបង្កើតមជ្ឈមណ្ឌលបន្ថែម នៅប៉ែកខាងជើងបារាំង ដើម្បីដាក់ឃុំជនភៀសខ្លួនខុសច្បាប់ មុនត្រៀមនឹងបញ្ជូនចេញពីប្រទេស។ បារាំងក៏នឹងបង្កើតយន្តការរួមជាមួយអង់គ្លេស ដាក់ភ្នាក់ងារ៥០០នាក់ សម្រាប់ឃ្លាំមើលតាមមាត់ឆ្នេរ និងតាមដានអ្នកជិះទូកកាត់សមុទ្រ។ នៅក្នុងគម្រោងនេះ រដ្ឋបាលរាជធានីឡុងដ្រ៍ បានលម្អិតថា ផ្តល់ថវិកា ៥៤០ លានអឺរ៉ូ ដែលត្រូវបែកចែងជា ៣ ដំណាក់កាល និងថា បារាំងទទួលបន្ទុកចេញថវិកាច្រើនជាងអង់គ្លេសដល់ទៅ ៥ ឯណោះ។
នៅប្រទេសបារាំង អង្គការសង្គមស៊ីវិលការពារសិទ្ធជនភៀសខ្លួន បានរិះគន់រដ្ឋាភិបាលបារាំង យ៉ាងចាស់ដៃថា ផ្សំគំនិតឃុបឃិតជាមួយអង់គ្លេសនៅក្នុងនយោបាយគ្រប់គ្រងជនអន្តោប្រវេសន៍ និងថា នេះជាវិធានាការដ៏អសមនុស្សធម៌។ ចំណែកអង្គការសិទ្ធិមនុស្ស Amnesty International បានបន្ទោស អង់គ្លេស ថា ទម្លាក់ចោលការទទួលខុសត្រូវ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ