UBSទិញធនាគារCrédit Suisse តែទីផ្សារហិរញ្ញវត្ថុបន្តរំជើបរំជួលខ្លាំងដដែល
ទីផ្សារហិរញ្ញវត្ថុអឺរ៉ុបនិងអាស៊ី នៅតែបន្តដាំក្បាលធ្លាក់ចុះដដែល នៅព្រឹកថ្ងៃចន្ទទី ២០មីនា នេះ។ នេះសបញ្ជាក់ឱ្យឃើញថា អ្នកវិនិយោគពិភពលោក ពុំទាន់មានទំនុកចិត្តឡើងវិញទេ បើទោះបីជាធនាគារដ៏ធំជាងគេបង្អស់របស់ស្វីស UBS បានប្រកាសទិញ ធនាគារ Crédit Suisse ដែលកំពុងជួបបញ្ហាក៏ដោយ។
ចុះផ្សាយនៅថ្ងៃ៖
ស្តាប់ - ០២:០៣
ដើម្បីបញ្ចៀសវិបត្តិធ្ងន់ធ្ងរ និងផ្តល់ទំនុកចិត្តដល់អ្នកវិនិយោគនៅទូទាំងពិភពលោកឡើងវិញ ក្រុមហ៊ុនUBSធនាគារដ៏ធំជាងគេបង្អស់របស់ស្វ៊ីស បានព្រមព្រៀងទិញធនាគារCrédit Suisse ជាគូប្រជែងដែលកំពុងជួបការលំបាកខ្លាំង ដោយមានការធានារ៉ាប់រងដ៏សំខាន់ពីរដ្ឋាភិបាលស្វ៊ីសផង។ សម្រាប់លោកAlain Berset ប្រធានាធិបតីសហព័ន្ធស្វីស នេះមិនមែនជាដំណោះស្រាយសម្រាប់តែប្រទេសស្វ៊ីសតែមួយទេ ប៉ុន្តែជាការផ្តល់ស្ថិរភាពដល់ប្រព័ន្ធហិរញ្ញវត្ថុពិភពលោកទាំងមូល។ ស្វីសមានទំនួលខុសត្រូវខ្ពស់ហួសព្រំដែនទៅទៀត ព្រោះបើតាមរដ្ឋមន្ត្រីក្រសួងហិរញ្ញវត្ថុ ការដួលរលំនៃធនាគារCrédit Suisse អាចបង្កឱ្យមានការខូចខាតសេដ្ឋកិច្ចដែលមិនអាចស្តារបាន។
ប៉ុន្តែ ទីផ្សារហិរញ្ញវត្ថុអន្តរជាតិ ជាពិសេស ទីផ្សារភាគហ៊ុនអាស៊ីនៅតែបន្តដាំក្បាលចុះ និងរំជើបរំជួលខ្លាំងដដែល។ អ្នកវិភាគយល់ថា ការសង្ស័យនិងការបាត់បង់ទំនុកចិត្តនៅតែមានខ្លាំងមួយរយៈពេលទៀត បើទោះបីជាអាជ្ញាធរប្រឹងប្រែងធានាយ៉ាងណាក៏ដោយ។ បើតាមអាជ្ញាធររូបិយបណ្ណហុងកុង ធនាគារCrédit Suisse គ្មានឥទ្ធិពលលើប្រព័ន្ធធនាគារហុងកុងទេ ព្រោះតំណាងឱ្យមិនដល់០,៥%នៃភាគហ៊ុនសរុបនៃប្រព័ន្ធធនាគារហុងកុង។ អ្នកនាំពាក្យរដ្ឋាភិបាលជប៉ុន បានចេញមុខធានា នៅថ្ងៃនេះថា ស្ថាប័នហិរញ្ញវត្ថុជប៉ុនមានលុយនិងទុនហូរហៀ ហើយទីផ្សារហិរញ្ញវត្ថុមានស្ថិរភាពល្អជាទូទៅ។
ជាមួយនឹងការអបអរពេញចិត្ត ដែលធនាគារUBS ព្រមទិញCrédit Suisse ធនាគារកណ្តាលអឺរ៉ុប និងធនាគារកណ្តាលអាមេរិក បានប្រកាសបញ្ចេញសកម្មភាពសម្រួលការប្រើប្រាស់សាច់លុយដុល្លារ ដើម្បីផ្តល់ទំនុកចិត្តបន្ថែមទៀតដល់អ្នកវិនិយោគ។ ជាងនេះទៅទៀត ធនាគារកណ្តាលអឺរ៉ុប បារាំង និងអាល្លឺម៉ង់ បានប្រកាសនៅថ្ងៃចន្ទនេះថា ប្រព័ន្ធធនាគារបារាំង អាល្លឺម៉ង់ មានភាពធុននិងរឹងមាំ ព្រោះមានច្បាប់សុវត្តិភាពខុសពីនៅសហរដ្ឋអាមេរិក។ ចំណែកបញ្ហារបស់ធនាគារCrédit Suisse ជាបញ្ហារបស់ធនាគារផ្ទាល់ដែលគេបានដឹងតាំងពីយូរមកហើយ ហើយដែលនឹងក្លាយទៅជាធនាគារUBSដែលមានសុខភាពរឹងមាំល្អ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ