លោកម៉ាក្រុង៖ កំណែទម្រង់ប្រព័ន្ធចូលនិវត្តន៍ គឺជារឿងចាំបាច់និងដើម្បីប្រយោជន៍រួម
វិបត្តិនយោបាយ កំពុងតែរួមរឹតរដ្ឋាភិបាលបារាំង បន្ទាប់ពីរដ្ឋាភិបាលរបស់លោកស្រី អេលីហ្សាប៊ែត ប៊ន បានសម្រេចប្រើមាត្រា ៤៩.៣ ដើម្បីអនុម័តដោយបង្ខំ នូវច្បាប់កំណែកម្រង់ប្រព័ន្ធចូលនិវត្តន៍បារាំង។ យោងតាមច្បាប់ថ្មីនេះ អាយុចូលនិវត្តន៍នៅបារាំង គឺត្រូវដំឡើងថែម២ឆ្នាំ ពី ៦២ ដល់ ៦៤ឆ្នាំ។ យ៉ាងណាក៏ដោយ កំហឹងតវ៉ារបស់ប្រជាជនមិនបានចុះថយទេ ដោយបាតុកម្មហិង្សា បានផ្ទុះឡើងនៅតាមទីក្រុងនានាក្នុងប្រទេសបារាំង។ នៅថ្ងៃព្រហស្បតិ៍នេះ ក្រុមសហជីពធំៗរបស់បារាំង បានប្រកាសធ្វើកូដកម្មទូទាំងប្រទេស ដើម្បីសំដែងការប្រឆាំង ចំពោះការធ្វើកំណែទម្រង់នេះ។
ចុះផ្សាយនៅថ្ងៃ៖
ស្តាប់ - ០៣:២១
កាលពីរសៀលថ្ងៃពុធទី២២មីនា លោកប្រធានាធិបតីបារាំង អេម៉ានុយអែល ម៉ាក្រុង បានផ្តល់បទសម្ភាសន៍ឲ្យទូរទស្សន៍ធំៗទាំង២របស់បារាំង ដើម្បីពន្យល់ប្រាប់ពីភាពចាំបាច់ នៃកំណែទម្រង់ច្បាប់ចូលនិវត្តន៍។ ឆ្លើយចំពោះសំណួរអ្នកសារព័ត៌មានទាំង២នាក់ ដែលចង់ដឹងថា ទោះមានការតវ៉ាខ្លាំងយ៉ាងក៏ដោយ ច្បាប់កំណែទម្រង់ ប្រព័ន្ធចូលនិវត្តន៍នឹងត្រូវតែចូលជាធរមាន ឬយ៉ាងណានោះ លោកម៉ាក្រុង បានអះអាងថា ដូចអ្វីដែលបានកំណត់ទុក គឺច្បាប់ថ្មីនេះ នឹងត្រូវចូលជាធរមានជាផ្លូវការ នៅរវាងចុងឆ្នាំ២០២៣។
លោកម៉ាក្រុងអះអាងថា ធ្វើបែបនេះ គឺអនុញ្ញាតឲ្យប្រជាជនបារាំងប្រមាណជិង២លាននាក់ អាចចាប់ផ្តើមទទួលបានការដំឡើងប្រាក់សោធនិវត្តន៍។ តែលោកម៉ាក្រុងបានបញ្ជាក់ថា សម្រាប់ពេលនេះ ច្បាប់ថ្មីនេះកំពុងស្ថិតនៅក្រុមប្រឹក្សាធម្មនុញ្ញ ដែលកំពុងតែពិនិត្យលំអិត។
ទាក់ទិននឹងចលនាបាតុកម្មតវ៉ា ប្រឆាំងនឹងការធ្វើកំណែទម្រង់នេះ លោកម៉ាក្រុង បានថ្កោលទោសចំពោះ អំពើហិង្សាជ្រុលនិយម របស់ក្រុមមនុស្សមួយចំនួន ដែលធ្វើសកម្មភាពយ៉ាងអាណាធិបតេយ្យ វាយបំផ្លាញទ្រព្យសម្បត្តិសាធារណៈ ឬគំរាមលើរូបរាងកាយរបស់សមាជិកសភាជាដើម។ សម្រាប់លោកម៉ាក្រុង ការចុះផ្លូវសំដែងមតិរបស់ប្រជាជន គឺត្រូវតែធ្វើដោយសន្តិវិធី និយាយស្តាប់ហេតុផលបាន មិនមែនជាការប្រើអំពើហិង្សាគំរាមសំឡុតនោះឡើយ។
ពេលអ្នកកាសែតជជីកសួរ អំពីការរុះរើរដ្ឋាភិបាល ឬដូរនាយករដ្ឋមន្ត្រី លោកម៉ាក្រុងបានបញ្ជាក់ថា លោកនៅតែមានទំនុកចិត្តលើ លោកស្រីនាយករដ្ឋមន្ត្រី អេលីហ្សាបែត ប៊ន ដើម្បីបន្តការងារដឹកនាំរដ្ឋាភិបាល។ លោកម៉ាក្រុងបញ្ជាក់ថា លោកស្រី អេលីហ្សាបែត ប៊ន នឹងរៀបចំគោលនយោបាយច្បាប់ ក៏ដូចជារដ្ឋាភិបាល ដោយសហការជាមួយប្រធានសភាទាំង២ ធ្វើយ៉ាងណា តាក់តែងអត្ថបទ បទដ្ឋានច្បាប់ថ្មី ខ្លីៗ មានន័យច្បាស់លាស់ និងដើម្បីធ្វើឲ្យប្រជាពលរដ្ឋ មើលឃើញពីការផ្លាស់ប្តូរនិងភាពប្រសើរឡើងជាក់ស្តែង។
គួរកត់សំគាល់ថា ក្រោយបទសម្ភាសន៍របស់លោកប្រធានាធិបតីម៉ាក្រុងនេះ មានប្រតិកម្មរិះគន់យ៉ាងខ្លាំងក្លា ពីសំណាក់ក្រុមអ្នកនយោបាយឆ្វេងនិយម ព្រមទាំងក្រុមសហជីព ថាលោកម៉ាក្រុង មានចិត្តមានះ រឹងរូស មិនស្តាប់សម្រែកប្រឆាំងរបស់ប្រជាជន ដែលចុះផ្លូវធ្វើបាតុកម្មប្រឆាំងនឹងកំណែទម្រង់។
តែយ៉ាងណា នៅក្នុងបទសម្ភាសន៍ លោកម៉ាក្រុងបានលើកឡើងថា លោកមិនបានផ្តួចផ្តើមគំនិតធ្វើកំណែទម្រង់ប្រព័ន្ធចូលនិវត្តបារាំង ដោយសេចក្តីសប្បាយរីករាយនោះទេ។ តែវាគឺជាការធ្វើកំណែទម្រង់ដ៏ចាំបាច់ ដែលត្រូវតែធ្វើ ដើម្បីរក្សាលំនឹកនៃប្រព័ន្ធនេះ។ លោកអះអាងថា លោកសុខចិត្តទទួល ឲ្យប្រជាជនបារាំងស្អប់លោកចុះ តែលោកធ្វើនេះដើម្បីផលប្រយោជន៍រួម។ លោកសង្កត់បន្ថែមថា ទោះច្បាប់កំណែទម្រង់ប្រព័ន្ធចូលនិវត្តនេះ ត្រូវបានអនុម័តដោយប្រើមាត្រា ៤៩.៣ ពិតមែន តែវាបានឆ្លងកាត់ដំណើរការប្រជាធិបតេយ្យត្រឹមត្រូវ ដូចដែលមានចែងក្នុងរដ្ឋធម្មនុញ្ញ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ