ក្រោមសម្ពាធពីអាល្លឺម៉ង់ សហភាពអឺរ៉ុបបន្តអនុញ្ញាតប្រើប្រាស់រថយន្តដើរដោយម៉ាស៊ីនចំហាយទឹក
ក្របខ័ណ្ឌវិធានច្បាប់ដើម្បីរកដំណោះស្រាយទប់ទល់ការកើនកម្តៅផែនដី តាមរយៈបញ្ចេញពីផ្សែងពុលឧស្ម័នកាបូនិក ពិសេងផ្សែងរថយន្ត គឺទីបំផុតទៅ សហភាពអឺរ៉ុប និងអាល្លឺម៉ង់ បានរកឃើញការសម្រុះសម្រួលគ្នា ចំពោះការប្រើប្រាស់រថយន្តដើរដោយម៉ាស៊ីនចំហាយទឹក (ឡានចាក់ប្រេងសាំង) ដែលត្រូវបន្តអនុញ្ញាតឲ្យប្រើប្រាស់រហូតដល់ឆ្នាំ២០៣៥។ ប្រទេសខ្លះក្នុងរង្វង់សហភាពអឺរ៉ុប ស្នើឲ្យប្រើប្រាស់និងផលិតតែរថយន្តប្រើចរន្តអគ្គិសនី (ប្រើថ្មអគ្គិសនី) ក៏ប៉ុន្តែ អាល្លឺម៉ង់ បានស្នើឲ្យប្រើថាមពល«កាបូនសំយោគ»ដែរ។
ចុះផ្សាយនៅថ្ងៃ៖
ស្តាប់ - ០២:០៧
បន្ទាប់ពីប្រជុំ២ថ្ងៃដ៏តានតឹង នៅក្រុងព្រុចសែល ទីបំផុតទៅ លោក ប៉ាស្កាល់ កង់ហ្វាំង ប្រធានគណៈកម្មាធិការបរិស្ថាននៃសភាអឺរ៉ុប បានប្រកាសឲ្យដឹងថា ស្មារតីអត្ថបទច្បាប់គឺមិនផ្លាស់ប្តូរទេ។ វិធានាការកាត់បន្ថយឲ្យអស់ដល់សូន្យ ការបញ្ចេញឧស្ម័នការបូនិកផ្សែងពុលពីរថយន្ត គឺនៅតែរក្សាគោលជំហរដូច្នេះដដែល។ ក៏ប៉ុន្តែ សហភាពអឺរ៉ុបនឹងនៅតែបន្តតាមដានពីការប្រើប្រាស់រថយន្តដើរដោយម៉ាស៊ីនចំហាយទឹក ដែលប្រើថាមពលកាបូនសំយោគ។
បានសេចក្តីថា គេបន្តប្រើ១០ឆ្នាំទៀត រថយន្តដើរដោយម៉ាស៊ីនចំហាយទឹក និងប្រើថាមពលចេញពី«កាបូនសំយោគ» គឺតបតាមសំណើរបស់អាល្លឺម៉ង់។ ពោលគឺសំយោគចេញពីឧស្ម័នអ៊ីដ្រូសែននិងកាបូនិក ហើយនិងចម្រាញ់ថាមពលចេញពីកាក់សំណល់កសិកម្ម ពីសំរាម សំណល់ប្រេង និងសំណល់ឧស្សាហកម្ម ជាដើម។ អាល្លឺម៉ង់ស្នើបែបនេះ ពីព្រោះឧស្សាហកម្មនៅក្នុងប្រទេសរបស់ខ្លួន បានវិនិយោគច្រើនទៅលើវិស័យនេះ។
ខុសពីជំហររបស់ក្រុមប្រទេសអឺរ៉ុបមួយចំនួន មានប្រទេសបារាំងជាដើម ដែលចង់ឲ្យឈប់ប្រើតែម្តង រថយន្តដើរដោយម៉ាស៊ីនចំហាយទឹក (គឺឡានចាក់ប្រេងសាំង) ហើយងាយមកប្រើប្រាស់និងផលិតឡានថ្មី ដើរដោយថាមពលចរន្តអគ្គិសនី (ប្រើថ្មអគ្គិសនី) តែមួយមុខ។ ក៏ប៉ុន្តែ ប្រទេសអាល្លឺម៉ង់ មិនចង់កាត់ផ្តាច់ឈប់ប្រើម៉ាស៊ីនចំហាយទឹកទាំងស្រុងទេ។
នៅក្រៅឆាកសភាអឺរ៉ុប អង្គការខាងបរិស្ថានអាកាសធាតុ ស្តីបន្ទោសអាល្លឺម៉ង់ ចំពោះសំណើរបស់ប្រទេសនេះ និងថា បច្ចេកទេសសំយោគកាបូន មានតម្លៃថ្លៃ ស៊ីអគ្គិសនីច្រើន ហើយនិងនៅតែបង្កបញ្ហាបំពុលបរិស្ថាន។
ម្យ៉ាងទៀត អ្នកជំនាញខ្លះ រិះគន់ថា ការធ្វើបែបអាល្លឺម៉ង់នេះធ្វើឲ្យការវិនិយោគទុនធ្លាក់ក្នុងសភាពមិនច្បាស់លាស់នៅលើទីផ្សារថយន្តអឺរ៉ុប ខណៈពេលដែល មហាយក្សចិន និងសហរដ្ឋអាមេរិក បានសម្រេចសម្រុកនាំគ្នាបោះពួយផលិតរថយន្តដើរដោយអគ្គិសនី យ៉ាងច្រើនសម្បើមទៅហើយ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ