របាយការណ៍ ៖ ចំនួនក្បាលគ្រាប់នុយក្លេអ៊ែរកើនឡើងខ្លាំង ក្នុងបរិបទនៃសង្គ្រាមអ៊ុយក្រែន
ក្នុងខណៈដែលសង្គ្រាមនៅអ៊ុយក្រែន បានបំផុសបំផុលឱ្យមានក្តីព្រួយបារម្ភខ្លាចផ្ទុះសង្គ្រាមនុយក្លេអ៊ែរ របាយការណ៍ថ្មីទើបចេញនៅថ្ងៃពុធទី ២៩មីនា បានបង្ហាញថា ចំនួនគ្រាប់ក្បាលនុយក្លេអ៊ែរ អាចយកទៅប្រើបានភ្លាម បានកើនឡើងនៅទូទាំងពិភពលោក កាលពីឆ្នាំទៅ។ កំណើនមានខ្លាំងជាងគេនៅរុស្ស៊ីនិងនៅចិន។
ចុះផ្សាយនៅថ្ងៃ៖
ស្តាប់ - ០២:១៣
គិតត្រឹមដើមឆ្នាំ២០២៣នេះ មហាអំណាចនុយក្លេអ៊ែរជាផ្លូវការ(សហរដ្ឋអាមេរិក រុស្ស៊ី អង់គ្លេស បារាំង ចិន ឥណ្ឌា ប៉ាគីស្ថាន និងកូរ៉េខាងជើង) និងក្រៅផ្លូវការ (អ៊ីស្រាអ៊ែល) ទាំង៩ប្រទេស មានក្បាលគ្រាប់នុយក្លេអ៊ែរសរុបចំនួន ៩៥៧៦ ដែលមានអំណាចខ្លាំង ស្មើនឹង១៣៥០០០គ្រាប់បែកនុយក្លេអ៊ែរទម្លាក់នៅហ៊ីរ៉ូស្ហ៊ីម៉ា។ នេះបើតាមរបាយការណ៍របស់អង្គការក្រៅរដ្ឋាភិបាលន័រវែស Nuclear Weapons Ban Monitor សហការស្រាវជ្រាវជាមួយនឹងសហព័ន្ធវិទ្យាសាស្ត្រអាមេរិក ចេញផ្សាយនៅថ្ងៃពុធទី ២៩មីនា២០២៣ ដោយបញ្ជាក់ថាក្នុងរយៈពេលតែមួយឆ្នាំ ចំនួនក្បាលគ្រាប់នុយក្លេអ៊ែរបានកើនឡើង ១៣៩ គ្រាប់ នៅរុស្ស៊ី ចិន ឥណ្ឌា កូរ៉េខាងជើងនិងប៉ាគីស្ថាន។
ផ្ទុយទៅវិញ អាវុធបរមាណូក្នុងស្តុក រាប់ទាំងអាវុធនុយក្លេអ៊ែរដែលគេលែងប្រើផង បានធ្លាក់ចុះទេ ព្រោះរុស្ស៊ីនិងអាមេរិកបានរំលាយចោលជារៀងរាល់ឆ្នាំនូវរាល់ក្បាលគ្រាប់ចាស់ៗមួយចំនួនតូច។ ប៉ុន្តែ សម្រាប់ម្ចាស់របាយការណ៍ បើកំណើនគ្រាប់ក្បាលនុយក្លេអ៊ែរនៅតែបន្តកើនឡើងនោះមិនយូរទេ បរិមាណអាវុធនុយក្លេអ៊ែរនៅលើពិភពលោកក៏នឹងស្ទុះឡើងវិញជាលើកមួយដែរ គិតចាប់តាំងពីសង្គ្រាមត្រជាក់មក។ នៅឆ្នាំ១៩៨៦ ពិភពលោកមានក្បាលគ្រាប់នុយក្លេអ៊ែរកើនឡើងដល់កំរិតកំពូល គឺជាង៧ម៉ឺនគ្រាប់ មុនធ្លាក់ចុះវិញជាលំដាប់ក្រោយចប់សង្គ្រាមត្រជាក់។
បើតាមរបាយការណ៍ដដែល មហាអំណាចនុយក្លេអ៊ែរលំដាប់ទីមួយរុស្ស៊ីនិងទីពីរអាមេរិក មានក្បាលគ្រាប់នុយក្លេអ៊ែរសរុប៥២៤៤ ពោលគឺប្រមាណ ៨៦%នៃគ្រាប់នុយក្លេអ៊ែរទាំងអស់នៅលើពិភពលោក។
សូមបញ្ជាក់ថា របាយការណ៍ស្តីពីចំនួនក្បាលគ្រាប់នុយក្លេអ៊ែរនេះ ធ្លាក់មកជួនចំពេលដែលប្រធានាធិបតីរុស្ស៊ី វ្លាដេមៀ ពូទីន ទើបប្រកាសចុះកិច្ចព្រមព្រៀងពង្រាយអាវុធនុយក្លេអ៊ែរតាកទិកនៅបេឡារុស ប្រទេសជាប់របងសហភាពអឺរ៉ុប ដើម្បីឆ្លើយតបឱ្យបានសក្តិសមទៅនឹងសកម្មភាពរបស់អាមេរិកដែលក៏បានពង្រាយអាវុធនុយក្លេអ៊ែរតាកទិក តាំងពីជាច្រើនទសវត្សរ៍មកហើយ ក្នុងទឹកដីរបស់សម្ព័ន្ធមិត្ត។ ស្ថាប័ន Sipri ឬអ្នកសង្កេតការណ៍ឯករាជ្យ ប៉ាន់ប្រមាណថាអាមេរិកមានពង្រាយអាវុធនុយក្លេអ៊ែរតាកទិកជាងមួយរយនៅ ប៊ែលហ្សិក អាល្លឺម៉ង់ អ៊ីតាលី ហូឡង់និងតួកគី៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ