អង្គការសុខភាពពិភពលោកកែប្រែអនុសាសន៍ទាក់ទងនឹងការចាក់ថ្នាំបង្ការជំងឺកូវីដ
ក្រោយជំនួបប្រជុំនៅទីក្រុងហ្សឺណែវ នាសប្តាហ៍នេះ អ្នកជំនាញអង្គការសុខភាពពិភពលោក បានសម្រេចអនុសាសន៍ថ្មី ទាក់ទងនឹងការចាក់ថ្នាំបង្ការជំងឺកូវីដ១៩។ បើតាមអង្គការសុខភាពពិភពលោក មនុស្សពេញវ័យ មានសុខភាពល្អ មិនចាំបាច់ត្រូវចាក់វ៉ាក់សាំងបន្ថែម (ដូសទីបួនទីប្រាំទេ)។ វ៉ាក់សាំងពីរដូសដំបូង និងដូសជំរុញទីមួយ គ្រប់គ្រាន់ហើយលើសពីនេះក៏វ៉ាក់សាំងផ្តល់គុណប្រយោជន៍សម្រាប់សុខភាពតិចតួចបំផុត។
ចុះផ្សាយនៅថ្ងៃ៖
ស្តាប់ - ០២:០៣
ចាក់វ៉ាក់សាំងដូសជំរុញបន្ថែម គ្មានហានិភ័យចំពោះសុខភាពទេសម្រាប់មនុស្សពេញវ័យអាយុក្រោម៦០ឆ្នាំ មានសុខភាពល្អ មធ្យម និងសម្រាប់កុមារព្រមទាំងក្មេងជំទង់អាយុចាប់ពី៦ខែ ដល់១៧ឆ្នាំ។ ប៉ុន្តែគុណប្រយោជន៍នៃការចាក់វ៉ាក់សាំងនោះ មានតិចតួចណាស់សម្រាប់សុខភាព។ នេះបើតាមសេចក្តីថ្លែងការណ៍របស់ក្រុមអ្នកជំនាញ ដោយប្រកាសថា អនុសាសន៍ថ្មីរបស់អង្គការសុខភាពពិភពលោក បានលាតត្រដាងឱ្យឃើញអំពីឥទ្ធិពលនៃមេរោគកូវីដបំប្លែងខ្លួនអូមីក្រុង និងកំរិតភាពស៊ាំនឹងកូវីដ របស់ប្រជាពលរដ្ឋលើពិភពលោក ក្រោយពីបានឆ្លងជំងឺនិងបានចាក់បង្ការកូវីដ តាមកម្មវិធីគំរូ ៖ ដូសដំបូង ដូសរំលឹកនិងដូសជំរុញទីមួយ។
ក្រុមអ្នកជំនាញអង្គការសុខភាពពិភពលោក បានស្នើបែងចែកអាទិភាពនៃការចាក់វ៉ាក់សាំងកូវីដ ដោយយោលទៅតាមហានិភ័យនៃជំងឺដែលអាចវិវត្តន៍ទៅរកទម្រង់ធ្ងន់ ឬស្លាប់ ជាបីក្រុមថ្មី គឺ ធ្ងន់ មធ្យមនិងខ្សោយ។ មនុស្សចាស់ជរា មនុស្សមានជំងឺជាប់នឹងខ្លួន និងគ្រប់បុគ្គលដែលមានប្រព័ន្ធការពារខ្លួនខ្សោយ ស្ត្រីមានផ្ទៃពោះ និងបុគ្គលិកពេទ្យជួរមុខ គួរតែចាក់វ៉ាក់សាំងបន្ថែម ពីលើកម្មវិធីវ៉ាក់សាំងធម្មតា នៅរវាងពី៦ ទៅ ១២ខែ ក្រោយដូសជំរុញ និងទៅស្ថានភាពសុខភាពរបស់បុគ្គលផ្ទាល់។
ផ្ទុយទៅវិញ អង្គការសុខភាពពិភពលោកនៅតែខ្វះភស្តុតាងសម្រាប់មកពន្យល់អំពីឥទ្ធិពលនៃវ៉ាក់សាំងទៅលើជំងឺកូវីដរ៉ាំរ៉ៃ ដែលអ្នកជំងឺឆ្លងកូវីដដំបូងខ្លះរងផលវិបាកធ្ងន់ធ្ងរ ដូចជាអស់កម្លាំងចម្លែកខ្លាំង ឬ គ្មានសមត្ថភាពផ្ចង់អារម្មណ៍។
ទន្ទឹមគ្នានេះដែរ អង្គការសុខភាពពិភពលោក បន្តស្រាវជ្រាវរកវ៉ាក់សាំងកូវីដថ្មីៗ ដែលអាចយកឈ្នះមេរោគបំប្លែងផ្សេងៗ ហើយមានប្រសិទ្ធភាពខ្ពស់អាចទប់ស្កាត់ការចម្លងផងនិងការបង្កជំងឺផង និងអាចមានទម្រង់ផ្សេង ដូចជាថ្នាំទឹកដាក់ច្រមុះ លេបតាមមាត់ ឬចាក់។ អង្គការក៏កំពុងចាប់អារម្មណ៍នឹងថ្នាំបង្ការដាក់ច្រមុះ ពីរមុខ ដែលមួយមុខមានប្រើនៅចិន៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ