លោកម៉ាក្រុង ប្រកាសផែនការជាតិសន្សំសំចៃទឹក ដើម្បីប្រឈមនឹងវិបត្តិខ្វះទឹកនៅបារាំង
គ្រោះរាំងស្ងួត កំពុងតែធ្វើបាបប្រទេសជាច្រើននៅអឺរ៉ុប ដែលបង្កឲ្យមានបញ្ហាខ្វះទឹកប្រើប្រាស់។ នៅបារាំង ភ្លៀងធ្លាក់មានចំនួនតិចខ្លាំងបំផុត ដែលធ្វើឲ្យបឹង ស្ទឹង ទន្លេមួយចំនួនធំ ត្រូវរីងអស់ទឹក ខណៈរដូវក្តៅកាន់តែខិតជិតមកដល់។ ដើម្បីប្រឈមនឹងវិបត្តិខ្វះទឹកប្រើប្រាស់ លោកប្រធានាធិបតីបានប្រកាស កាលពីថ្ងៃព្រហស្បតិ៍ទី៣០មីនា អំពី "ផែនការជាតិសន្សំសំចៃទឹក"។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:៣០
ថ្លែងពីមាត់បឹង ស៊ែរ ប៉ុងសុង (Serre Ponçon) ដែលមានកំពស់ទឹកទាបខ្លាំងជាងសព្វមួយដងនោះ លោកម៉ាក្រុងបានប្រកាសឲ្យគ្រប់វិស័យទាំងអស់មិនថាកសិកម្ម ឧស្សាហកម្ម ទេសចរណ៍កម្សាន្ត ត្រូវរួមគ្នាសន្សំសំចៃទឹក ឲ្យបាន១០% ពីនេះដល់ឆ្នាំ២០៣០។ តម្លៃប្រើប្រាស់ទឹក នឹងត្រូវរៀបចំថ្មី អនុវត្តទូទាំងប្រទេស ជាមួយនឹងគោលការណ៍តម្លៃ ដែលប្រែប្រួលទៅតាមទំហំប្រើប្រាស់។ មានន័យថាអត្រាតម្លៃថោក សម្រាប់អ្នកប្រើទឹកតិច ហើយសម្រាប់អ្នកប្រើច្រើន គឺអត្រាតម្លៃខ្ពស់ជាង។ នៅក្នុងផែនការជាតិសន្សំសំចៃទឹកនេះដែរ លោកម៉ាក្រុងអះអាងថា នឹងបង្កើនគម្រោងបន្សុតកែច្នៃទឹកដែលប្រើរួច យកមកប្រើឡើងវិញ ឲ្យ៣លានម៉ែត្រគូបក្នុងមួយឆ្នាំ។
សម្រង់ប្រសាសន៍លោកម៉ាក្រុង ថ្លែងប្រកាសផែនការជាតិសន្សំសំចៃទឹក ថ្ងៃទី ៣០មីនា២០២៣
“បញ្ហាវិបត្តិខ្វះទឹក នឹងមិនអាចត្រូវបានបញ្ចៀស ទាំងអស់បានទេ ចាប់ពីរដូវក្តៅឆ្នាំនេះនោះ ព្រោះថាស្ថានភាពខ្វះទឹកប្រើនៅតាមឃុំ នៅតាមតំបន់ខ្លះ គឺលំបាកធ្ងន់ធ្ងរខ្លាំងណាស់។ ក៏ប៉ុន្តែ លើសពីបញ្ហាទាំងអស់នេះ អ្វីដែលជាស្នូលនៃផែនការរបស់យើង គឺការកំណត់អាទិភាព សន្សំសំចៃទឹក ប្រើប្រាស់ទឹកឲ្យត្រឹមត្រូវចំគោលដៅ និងមិនខ្ជះខ្ជាយ។
ក្នុងន័យនេះ ខ្ញុំសូមប្រកាសកំណត់ទិសដៅសម្រាប់ជាតិយើង ពីនេះដល់ឆ្នាំ២០៣០ គឺត្រូវតែសន្សំសំចៃទឹកឲ្យបាន១០% នៅគ្រប់វិស័យទាំងអស់។ ផែនការនេះ ជាការធ្វើទំនើបកម្មដែលមិនធ្លាប់មានទេ នៅក្នុងគោលនយោបាយប្រើប្រាស់ទឹក ដោយផ្អែកលើបរិមាណទឹកដែលយើងមាន ព្រមទាំងបញ្ហាចោទឡើង ដោយសារតែបម្រែបម្រួលអាកាសធាតុ។
ដើម្បីឈានទៅសម្រេចការងារនេះ ឲ្យមានប្រសិទ្ធភាពបាន គឺយើងត្រូវតែធ្វើកំណែទម្រង់ទៅ លើតម្លៃប្រើប្រាស់ទឹក ដែលខ្ញុំហៅថា ជាតារាងតម្លៃប្រែប្រួល ទៅតាមទំហំបរិមាណទឹក ដែលអ្នកប្រើប្រាស់នីមួយៗប្រើ។ តម្លៃទឹកប្រែប្រួលទៅតាមបរិមាណទឹកនេះ គឺវាជាកត្តាជួយឲ្យមនុស្សម្នាក់ៗមានការទទួលខុសត្រូវ។ យើងនឹងរៀបចំពិគ្រោះយោបល់ជាមួយអ្នកតំណាងរាស្ត្រជាប់ឆ្នោតទាំងអស់ ដើម្បីអនុវត្តតារាងតម្លៃទឹកថ្មីនេះ នៅទូទាំងប្រទេសបារាំងតែម្តង។”
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ