បារាំង ៖ សមាជពលរដ្ឋចង់ឱ្យមានច្បាប់សម្រួលការជួយបញ្ចប់ជីវិតអ្នកជំងឺ
បន្ទាប់ពីបានជួបប្រជុំគ្នាអស់២៧ថ្ងៃ និងប្រើពេលត្រិះរិះពិចារណាអស់ពេលបួនខែ សមាជពលរដ្ឋ បានចេញរបាយការណ៍ នៅថ្ងៃអាទិត្យទី ២ មេសា ដាស់ឱ្យរដ្ឋាភិបាលបារាំងឱ្យឃើញអំពី វិសមភាពនៃ “ការថែទាំសម្រន់” (ការថែទាំអ្នកជំងឺដែលប្រឈមនឹងការស្លាប់)។ សមាជពលរដ្ឋដែលជ្រើសរើសឱ្យមកជួយតម្រែតម្រង់សកម្មភាពរដ្ឋាភិបាល បានយល់ស្របគ្នាក្នុងសំឡេងភាគច្រើន អំពីភាពចាំបាច់ត្រូវមានច្បាប់ជួយសម្រួលការបញ្ចប់ជីវិតអ្នកជំងឺ។
ចុះផ្សាយនៅថ្ងៃ៖
ស្តាប់ - ០១:៥៦
នៅក្នុងរបាយការណ៍ដែលអនុម័តដោយសំឡេងគាំទ្រ៩២% ប្រឆាំង៣%និងអនុប្បវាទ៥% សមាជិកសមាជពលរដ្ឋទាំង១៨៤នាក់ បានអំពាវនាវឱ្យមានការប្តូរផ្លាស់យ៉ាងស៊ីជម្រៅ បើចង់ឱ្យការថែទាំសម្រន់ (ថែទាំអ្នកជំងឺដែលប្រឈមនឹងការបាត់បង់ជីវិត) បានប្រសើរឡើង។ ប្រព័ន្ធសុខាភិបាលបារាំង ស្ថានភាពថែទាំសម្រន់ជាក់ស្តែងយ៉ាប់យឺនខ្លាំងណាស់ ដោយខ្វះទាំងអ្នកថែទាំ ខ្វះទាំងពេទ្យ និងខ្វះក្របខ័ណ្ឌច្បាប់សម្រាប់ស្ថានភាពហៀបស្លាប់មួយចំនួន។ សមាជពលរដ្ឋបានផ្តល់អនុសាសន៍យ៉ាងវែងដើម្បីឱ្យការថែទាំសម្រន់និងការទទួលសេវាថែទាំសម្រន់បានល្អប្រសើរឡើង។
ក្រៅអំពីបើកផ្លូវឱ្យរដ្ឋាភិបាលមើលឃើញអំពីភាពចាំបាច់នៃសម្រួលច្បាប់ជួយបញ្ចប់ជីវិត សមាជពលរដ្ឋលើកសំណើ៨១ចំណុច ទាក់ទងនឹងការជួយយ៉ាងសកម្មឱ្យអ្នកជំងឺបញ្ចប់ជីវិត ដោយមានការទាំងការជួយចូលរួមធ្វើអត្តឃាត និងជួយផ្តាច់ជីវិតអ្នកជំងឺមើលមិនជា ឱ្យស្លាប់ដោយគ្មានការឈឺចាប់ ជាមួយនឹងលក្ខខណ្ឌភ្ជាប់មួយចំនួន។ ជួយដោយសកម្មឱ្យអ្នកជំងឺបញ្ចប់ជីវិត ត្រូវឆ្លើយតបឱ្យបាននូវមូលហេតុបី ដោយដំបូងគេគឺត្រូវគោរពសេរីភាពនៃការសម្រេចចិត្ត របស់អ្នកជំងឺម្នាក់ៗក្នុងការបញ្ចប់ជីវិត និងការស្លាប់។ ប៉ុន្តែករណីអ្នកជំងឺប្រឈមនឹងស្លាប់មិនទាន់ពេញវ័យ និងបាត់បង់សមត្ថភាពសម្រេចចិត្ត សមាជពលរដ្ឋ មិនបញ្ចេញជំហររួមភាគច្រើនទេ។ របាយការណ៍បានលម្អិតសំណើផ្សេងៗជាច្រើនទៀត ដែលមានតិចតួចណាស់ប្រឆាំងនឹងច្បាប់ជួយធ្វើអត្តឃាតនិងជួយផ្តាច់ជីវិត។
តើអនុសាសន៍របស់សមាជពលរដ្ឋនេះ នឹងក្លាយជាយ៉ាងណា ? របាយការណ៍បានដល់ដៃ ប្រមុខរដ្ឋាភិបាល នៅថ្ងៃអាទិត្យនេះ។ នៅថ្ងៃចន្ទទី៣មេសា ស្អែក ប្រធានាធិបតីបារាំង លោក អេម៉ាណុយអែល ម៉ាក្រុង ត្រូវទទួលជួបសមាជិកសមាជពលរដ្ឋទាំងអស់ ហើយនឹងផ្តល់ទិសដៅការបន្តជុំវិញប្រធានបទ “បញ្ចប់ជីវិតអ្នកជំងឺមិនជា”នេះ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ