អ្នកច្បាប់៖ បាតុកម្មនឹងគ្មានឥទ្ធិពលអ្វីទៅលើក្រុមប្រឹក្សាធម្មនុញ្ញទេ
នៅប្រទេសបារាំង ក្រុមប្រឹក្សាធម្មនុញ្ញ ត្រូវចេញសេចក្តីសម្រេច នៅថ្ងៃសុក្រ ទី១៤មេសា ទាក់ទងនឹងច្បាប់កំណែទម្រង់សោធននិវត្តន៍។ កំណែច្បាប់ថ្មីស្តីពីសោធននិវត្តន៍ របស់ប្រធានាធិបតីបារាំង អេម៉ានុយអែល ម៉ាក្រុង ចង់ដំឡើងកម្រិតអាយុចូលនិវត្តន៍ ពី៦២ឆ្នាំ ទៅ៦៤ឆ្នាំ ក៏ប៉ុន្តែត្រូវប្រជាពលរដ្ឋបារាំងច្រើនពាន់នាក់ បានធ្វើបាតុកម្មជំទាស់។ បាតុកម្មប្រឆាំងនឹងរដ្ឋាភិបាលបារាំង បានអូសបន្លាយពេលជាង ៣ខែមកហើយ។ ទោះបីជាយ៉ាងនេះក្តី អ្នកជំនាញនីតិរដ្ឋធម្មនុញ្ញ លើកឡើងថា ចលនាបាតុកម្មនឹងមិនមានឥទ្ធិពលអ្វីទៅលើក្រុមប្រឹក្សាធម្មនុញ្ញទេ។
ចុះផ្សាយនៅថ្ងៃ៖
ស្តាប់ - ០១:២០
សូមចុចស្តាប់ប្រសាសន៍របស់អ្នកច្បាប់ជំនាញលោក ឌីតឌីយេ មូស (Didier Maus) ជាប្រធានកិត្តិយសសមាគមបារាំងនៃនីតិរដ្ឋធម្មនុញ្ញ។
«ចៅក្រមនៃក្រុមប្រឹក្សាធម្មនុញ្ញបារាំង សម្រេចសេចក្តីដោយគ្មានការជ្រៀតជ្រែក។ ចៅក្រម អាចទទួលដឹងឮនូវអ្វីដែលកំពុងកើតឡើងនៅខាងក្រៅ និងតែងតែតាមដានព្រឹត្តិការណ៍សង្គមដែលកំពុងកើតឡើង។ នេះជាការពិត។ ក៏ប៉ុន្តែ ចៅក្រម មិនសម្រេចសេចក្តីទៅតាមអ្វីដែលបរិយាកាសខាងក្រៅចង់បាន ទេ។
ក្រុមប្រឹក្សាធម្មនុញ្ញបារាំង ដើរតួជាអ្នកជួយបញ្ចប់វិវាទ។ ទោះយ៉ាងនេះក្តី ចៅក្រមនៃក្រុមប្រឹក្សាធម្មនុញ្ញបារាំង គឺមិនផ្នែកលើការមាន ឬគ្មានចលនាបាតុកម្មប្រឆាំងឡើយ។ បាតុកម្មឬអត់ គឺ នោះ មិនមែនជាបញ្ហារបស់ស្ថាប័ននេះ ទេ។
ក៏ប៉ុន្តែ ស្ថាប័នកំពូលរបស់ជាតិមួយនេះ ត្រូវទទួលដឹងនូវការវិវឌ្ឍរបស់សង្គមជាទូទៅ ហើយទំនងជា ចៅក្រម អាចនឹងវិនិច្ឆ័យទៅលើភាពត្រឹមត្រូវឬក៏អត់នៃអង្គហេតុ ដែលរដ្ឋាភិបាលបានលើកឡើង និងដែលរដ្ឋសភាបានអនុម័ត។ នេះក៏អាចទៅរួចដែរ ពីព្រោះ អ្នកប្តឹងមកក្រុមប្រឹក្សាធម្មនុញ្ញ បានសំអាងថា រដ្ឋាភិបាលអាចយល់ច្រឡំពីរឿងថាអាចនឹងមានវិបត្តិឱនភាពប្រព័ន្ធសន្តិសុខសង្គម នៅឆ្នាំ២០៣០។»
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ