អឺរ៉ុបនឹងមានច្បាប់ហាមឃាត់ការនាំចូលទំនិញ ដែលបានមកពីការកាប់បំផ្លាញព្រៃឈើ
តាមការគ្រោងទុក នៅថ្ងៃពុធទី១៩មេសានេះ សភាអឺរ៉ុបនឹងអនុម័តច្បាប់ថ្មីមួយ ដែលមានខ្លឹមសារ ហាមឃាត់ការនាំចូលទំនិញមួយចំនួនមកកាន់ទីផ្សារអឺរ៉ុប ប្រសិនបើទំនិញនោះ ត្រូវគេដឹងថា បានមកពី ឬ ក៏បានចូលរួមក្នុងការកាប់បំផ្លាញព្រៃឈើ។ សម្រាប់ក្រុមសកម្មជនបរិស្ថាន និងអាកាសធាតុ ច្បាប់ថ្មីរបស់អឺរ៉ុបនេះ គឺជាក្តីសង្ឃឹមដ៏ធំ និងជាការធានាថា ទំនិញដែលប្រជាជនអឺរ៉ុបទិញមកប្រើ មិនបានចូលរួមកាប់បំផ្លាញព្រៃឈើ នៅអាស៊ី នៅអាហ្វ្រិក ឬនៅអាមេរិកជាដើម។
ចុះផ្សាយនៅថ្ងៃ៖
ស្តាប់ - ០២:១៤
ច្បាប់ថ្មីរបស់អឺរ៉ុប ហាមឃាត់ទំនិញដែលបានមកពី ឬដែលបានចូលរួមឲ្យមានកាប់បំផ្លាញព្រៃឈើនេះ គឺជាច្បាប់ដំបូងគេហើយនៅក្នុងពិភពលោក។ ទំនិញដែលអាចជាប់បំរាមចែងក្នុងច្បាប់នេះ គឺមានដូចជា កាហ្វេ កាកាវ ប្រេងដូង សណ្តែកសៀង ផលិតផលដំណាំកៅស៊ូ ធ្យូង និងក្រដាសជាដើម។
លោក Pascal Canfin សមាជិកសភាអឺរ៉ុប និងជាប្រធានគណកម្មការបរិស្ថាននៃសភាអឺរ៉ុប បានឲ្យដឹងថា អំណេះតទៅ នៅពេលក្រុមហ៊ុនមួយនាំចូលទំនិញប្រភេទទាំងប៉ុន្មានខាងលើនេះ ចូលមកក្នុងទីផ្សារសហភាពអឺរ៉ុប ក្រុមហ៊ុននោះមានកាតព្វកិច្ច បង្ហាញថាទំនិញរបស់ខ្លួនមិនមានអ្វីពាក់ព័ន្ធ នឹកទំហំព្រៃឈើដែលទើបតែត្រូវគេកាប់បំផ្លាញថ្មីៗនេះទេ។ ដើម្បីផ្ទៀងផ្ទាត់កិច្ចការនេះ គឺមន្ត្រីគយរបស់គ្រប់ប្រទេសអឺរ៉ុប នឹងប្រើប្រាស់លេខប្រព័ន្ធ GPS និងរូបភាពថតដោយផ្កាយរណប។ ឧទាហរណ៍ប្រសិនបើគេឃើញថា មានព្រៃឈើត្រូវគេកាប់បំផ្លាញ នៅត្រង់ទីតាំងដែលជាប្រភពនៃការដាំដុះ ឬផលិតគ្រាប់កាហ្វេ មានន័យថាកាហ្វេនោះនឹងមិនអាចត្រូវអនុញ្ញាត ឲ្យចូលមកទីផ្សារអឺរ៉ុបបានឡើយ។
សូមបញ្ជាក់ថា អត្ថបទច្បាប់ថ្មីនេះ ត្រូវបានស្នើដោយគណកម្មការអឺរ៉ុប កាលពីខែវិច្ឆិកា ឆ្នាំ២០២១ មុននឹងត្រូវកែសម្រួលដោយសមាជិកសភាអឺរ៉ុប ដើម្បីពង្រឹងខ្លឹមសារ ឲ្យកាន់តែច្បាស់រឹងមាំ និងមានវិសាលភាពទៅលើទំនិញពាក់ព័ន្ធច្រើនមុខ។
ជាងនេះទៀត ក្នុងករណីដែលអាជ្ញាធរតាមដានដឹងថា ក្រុមហ៊ុនមួយនាំចូលទំនិញដែលបានចូលរួមកាប់បំផ្លាញព្រៃឈើ ទំនិញនោះមិនត្រឹមតែត្រូវបានហាមឃាត់មិនឲ្យនាំចូលប៉ុណ្ណោះទេ គឺច្បាប់អឺរ៉ុបថ្មីនេះ បានកំណត់ផងដែរ អំពីការដាក់ពិន័យ។ ការពិន័យជាប្រាក់ ដែលអាចឈានស្មើដល់ ៤% នៃចំណូលរបស់ក្រុមហ៊ុន។ អង្គការ WWF បានសំដែងការអបអរ ចំពោះការអនុម័តច្បាប់ថ្មីនេះ។ យោងតាមតួលេខ អង្គការនេះអះអាងថា កន្លងមកដោយសារតែការនាំចូលទំនិញ គឺអឺរ៉ុបបានចូលរួមកាប់បំផ្លាញព្រៃឈើ ចំនួនប្រមាណ១៦%។ ២ ភាគ ៣នៃទំហំនេះ គឺដោយសារតែការនាំចូលគ្រាប់សណ្តែកសៀង និងផលិតផលប្រេងដូង៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ