អ៊ុយក្រែនបានទទួលប្រព័ន្ធខែលមីស៊ីលអាមេរិក Patriot ដូចដែលក្រុមប្រទេសសម្ព័ន្ធមិត្តបានសន្យា
ប្រព័ន្ធខែលមីស៊ីល Patriot ជាច្រើនគ្រឿង ដែលជាបច្ចេកវិទ្យាកងទ័ពអាមេរិក ត្រូវបានដឹកទៅប្រគល់ដល់ដៃកងទ័ពអ៊ុយក្រែនហើយ។ នេះបើផ្អែកតាមការបញ្ជាក់ ពីក្រសួងការពារជាតិអ៊ុយក្រែន កាលពីថ្ងៃទី១៩មេសា។ ការប្រគល់សព្វាវុធការពារខ្លួនពីសំណាក់សម្ព័ន្ធមិត្តលោកខាងលិចនេះ គឺស្របពេលដែលកងទ័ពអ៊ុយក្រែន កំពុងប្រុងប្រៀបបើកការប្រយុទ្ធទ្រង់ទ្រាយធំ ដើម្បីដណ្ដើមទឹកដីខ្លួនមកវិញ ពីដៃកងទ័ពរុស្ស៊ី។
ចុះផ្សាយនៅថ្ងៃ៖
ស្តាប់ - ០២:៣១
ថ្ងៃនេះ ផ្ទៃមេឃខៀវស្រស់បំព្រងរបស់អ៊ុយក្រែន នឹងមានសុវត្ថិភាព ព្រោះថាប្រព័ន្ធខែលមីស៊ីល Patriot ត្រូវបានដឹកជញ្ជូនមកដល់ទឹកដីអ៊ុយក្រែនហើយ។ នេះក៏ជាសារបង្ហាញការត្រេកអរ នៅលើទំព័រ Twitter របស់ Oleksïi Reznikov រដ្ឋមន្ត្រីការពារជាតិអ៊ុយក្រែន។ លោករដ្ឋមន្ត្រីបានថ្លែងអរគុណផងដែរ ដល់រដ្ឋាភិបាលសហរដ្ឋអាមេរិក អាល្លឺម៉ង់ និងហូឡង់ ដែលបានគោរពការសន្យា ព្រមប្រគល់ប្រព័ន្ធខែលមីស៊ីល Patriot មកឲ្យអ៊ុយក្រែនការពារខ្លួន។
សូមរំលឹកថា ក្នុងពេលទស្សនកិច្ចនៅក្នុងវ៉ាស៊ីនតោន របស់លោកប្រធានាធិបតីអ៊ុយក្រែន វ្លូឌីមៀរ ហ្សេឡេនស្គី កាលពីពាក់កណ្តាលខែធ្នូ សហរដ្ឋអាមេរិកបានប្រកាសយល់ព្រមប្រគល់ឲ្យអ៊ុយក្រែន
នូវប្រព័ន្ធខែលមីស៊ីល Patriot ដែលជាបច្ចេកវិទ្យាទំនើបបំផុតរបស់ខ្លួន។ ជាកំឡុងពេល ដែលកងទ័ពរុស្ស៊ី បានសំរុក បាញ់ប្លោងមីស៊ីល និងទំលាក់គ្រាប់យ៉ាងដំណំមកលើហេដ្ឋការចនាសម្ព័ន្ធថាមពលរបស់អ៊ុយក្រែន។
ក្រោយសារសន្យារបស់អាមេរិកនេះ លោកហ្សេឡេនស្គី បានថ្លែងអរគុណអាមេរិក នឹងបានអះអាងថាប្រព័ន្ធខែលមីស៊ីល Patriot នេះ គឺអ៊ុយក្រែននឹងយកទៅប្រើដើម្បីតែការពារខ្លួនប៉ុណ្ណោះ ពោលគឺមិនយកទៅវាយប្រហារលើទឹកដីរុស្ស៊ីនោះទេ។ តែភ្លាមៗនោះដែរ លោកពូទីន បានប្រកាសថា រុស្ស៊ីនឹងរកបច្ចេកទេស ឲ្យកាន់តែអស្ចារ្យ ដើម្បីឲ្យមីស៊ីលខ្លួន អាចគេចចេញពីប្រព័ន្ធខែល Patriot។
គួរបញ្ជាក់ថា ក្រោយអាមេរិកបើកភ្លើងខៀវ រដ្ឋាភិបាលអាល្លឺម៉ង់វិញ បានប្រកាសនៅថ្ងៃទី៥មករា ប្រគល់ប្រព័ន្ធខែលមីស៊ីល Patriot ១គ្រឿងឲ្យអ៊ុយក្រែន។ ចំណែករដ្ឋាភិបាលហូឡង់ បានប្រកាស នៅថ្ងៃទី២០មករា ប្រគល់ឲ្យអ៊ុយក្រែនចំនួន២គ្រឿង រួមជាមួយគ្រាប់មីស៊ីលដែលប្រើជាមួយប្រព័ន្ធខែលនេះសម្រាប់បាញ់កំទេចមីស៊ីល។
គួរបញ្ជាក់ផងដែរថា ក្រៅពីគ្រឿងសព្វាវុធខែលមីស៊ីលការពារខ្លួនដ៏ទំនើបនេះ ក្រុមប្រទេសសម្ព័ន្ធមិត្តលោកខាងលិច បានសន្យាជួយជារថពាសដែកជាច្រើនគ្រឿង តួយ៉ាង រថពាសដែកអាល្លឺម៉ង់ Leopard 2 រថពាសដែកអង់គ្លេស Chalenger 2។ ចំណែករថពាសដែកធុនស្រាលរបស់បារាំង AMX-10 ត្រូវបានកងទ័ពអ៊ុយក្រែនប្រកាសនៅថ្ងៃពុធទី១៩មេសា ថាបានចាប់ផ្តើមប្រើប្រាស់ជាផ្លូវការហើយ នៅក្នុងប្រតិបត្តិការប្រមូលព័ត៌មាន និងកំណត់ទីតាំងមូលសាស្ត្រនៅសមរភូមី។ ជំនួយគ្រឿងសព្វាវុធទាំងនេះ ត្រូវបានភាគីរុស្ស៊ីបរិហារថា គឺអូតង់ ដែលមានអាមេរិកជាមេធំ កំពុងតែនាំគ្នាយកដីអ៊ុយក្រែន ដើម្បីធ្វើសង្គ្រាមដោយប្រយោលជាមួយរុស្ស៊ី៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ