Unicef៖វិបត្តិកូវីដ១៩ បានធ្វើឲ្យក្មេងចំនួន ៦៧លាននាក់ខកខាន ឬមិនបានចាក់វ៉ាក់សាំងបង្ការជំងឺសំខាន់ៗ
នៅថ្ងៃពុធ ទី១៩ មេសា អង្គការ Unicef បានផ្សព្វផ្សាយរបាយការណ៍មួយស្តីពីស្ថានភាពចាក់ថ្នាំវ៉ាក់សាំងបង្ការរបស់កូនក្មេងនៅទូទាំងពិភពលោកក្នុងចន្លោះឆ្នាំ ២០១៩ និង ២០២១។ ថ្នាំវ៉ាក់សាំងដែល Unicef ចង់និយាយនេះ គឺវ៉ាក់សាំងបង្ការជំងឺសំខាន់ៗដែលកូនក្មេងត្រូវចាក់តាំងពីថ្ងៃចាប់កំណើតដំបូង។ តាមរបាយការណ៍ មានកូនក្មេងដល់ទៅ ៦៧លាននាក់បានខកខាន ឬមិនបានចាក់វ៉ាក់សាំងបង្ការជំងឺសំខាន់ៗមួយចំនួនក្នុងចន្លោះឆ្នាំ ២០១៩ និង ២០២១។ មូលហេតុ គឺមកពីមានភាពរំខានដោយវិបត្តិកូវីដ១៩។
ចុះផ្សាយនៅថ្ងៃ៖
ស្តាប់ - ០២:៥៨
ក្នុងរយៈពេល ៣ឆ្នាំចន្លោះឆ្នាំ ២០១៩ និងឆ្នាំ ២០២១ អត្រាចាក់វ៉ាក់សាំងបង្ការជំងឺសំខាន់ៗលើកុមារបានធ្លាក់ចុះចំនួន ៥% ពោលពី ៨៦%មក ៨១%។ នេះជាអត្រាមួយដែលមិនធ្លាប់មានគិតតាំងពីឆ្នាំ ២០០៨។ បើគិតជាចំនួន គឺមានកុមារសរុបចំនួន ៦៧លាននាក់នៅទូទាំងពិភពលោកបានខកខាន ឬមួយក៏បានចាក់តែវ៉ាក់សាំងបង្ការសម្រាប់ជំងឺសំខាន់ៗខ្លះប៉ុណ្ណោះ ហើយនៅក្នុងចំណោមកុមារទាំង ៦៧លាននាក់នេះ មានដល់ទៅ ៤៨លាននាក់មិនបានទទួលវ៉ាក់សាំងបង្ការជំងឺចាំបាច់ណាមួយទេ ពិសេសកុមាររស់នៅក្នុងទ្វីបអាហ្រ្វិក និងអាស៊ីខាងត្បូង។
កំហុសមិនមែនដោយសារខ្វះវ៉ាក់សាំងទេ តែមកពីវិបត្តិកូវីដ១៩ ដែលបានធ្វើឲ្យនីតិវិធី និងដំណើរការចាក់វ៉ាក់សាំងបង្ការជំងឺសំខាន់ៗលើកុមារមានភាពរអាក់រអួល ឬជាប់គាំងទាំងស្រុងតែម្តង នេះជាការលើកឡើងរបស់អង្គការ Unicef។ ស្ថានភាពបែបនេះត្រូវបាន Unicef យល់ឃើញថា ជាស្ថានភាពមួយដែលពិភពលោកធ្លាប់បានស្គាល់កាលពី ១០ឆ្នាំមុន។ « វ៉ាក់សាំងបានដើរតួនាទីសំខាន់ខ្លាំងណាស់ដើម្បីអនុញ្ញាតឲ្យកុមាររស់បានយូរជាមួយនឹងសុខភាពល្អ » នេះជាការថ្លែងរបស់លោក Brian Keeley អ្នកដឹកនាំសរសេររបាយការណ៍។
តាមរបាយការណ៍របស់ Unicef ដដែល ការចាក់វ៉ាក់សាំងបង្ការជំងឺសំខាន់ៗលើកុមារបានជួយស្រោចស្រង់ជីវិតកុមារចំនួន ៤លាន ៤សែននាក់ជារៀងរាល់ឆ្នាំ ហើយចំនួននេះអាចកើនឡើងដល់ ៥លាន ៨សែននាក់ពីពេលនេះទៅឆ្នាំ ២០៣០ ប្រសិនបើពិភពលោកអាចកាត់បន្ថយឲ្យបានពាក់កណ្តាលនូវចំនួនកុមារដែលខកខានមិនបានចាក់វ៉ាក់សាំងបង្ការជំងឺសំខាន់ៗ។ ជាក់ស្តែង Unicef បានលើកករណីជំងឺកញ្រ្ចិលដែលជាជំងឺឆ្លងខ្លាំង។
នៅមុនមានវ៉ាក់សាំងបង្ការជំងឺមួយនេះក្នុងឆ្នាំ ១៩៦៣ កញ្រ្ចិលបានសម្លាប់មនុស្សប្រមាណចំនួន ២លាន ៦សែននាក់ក្នុងមួយឆ្នាំ ពិសេសកុមារ។ តាម Unicef ដើម្បីឲ្យមានភាពស៊ាំទូទៅនឹងជំងឺកញ្រ្ចិល គឺត្រូវឲ្យមានអត្រាចាក់វ៉ាក់សាំងចំនួន ៩៥%។ តែក្នុងរយៈពេល ៣ឆ្នាំចន្លោះឆ្នាំ ២០១៩ និង ២០២១ អត្រាចាក់វ៉ាក់សាំងបង្ការជំងឺកញ្រ្ចិលបានធ្លាក់ចុះពី ៨៦% ទៅ ៨១%។ មួយវិញទៀត ចំនួនអ្នកកើតកញ្រ្ចិលបានកើនទ្វេដងក្នុងឆ្នាំ ២០២២ ធៀបនឹងឆ្នាំ ២០២១។ ករណីដូចគ្នានេះក៏មានសម្រាប់ជំងឺស្វិតដៃ ជើងដែរ នេះបើតាមរបាយការណ៍របស់ Unicef ដដែល៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ