របាយការណ៍ ៖ ចំណាយយោធានៅអឺរ៉ុប ហក់ឡើងខ្លាំងជាងគេ
បើតាមរបាយការណ៍វិទ្យាស្ថានអន្តរជាតិផ្នែកស្រាវជ្រាវសន្តិភាពនៅស្តុកខុល (Sipri) ចេញផ្សាយនៅថ្ងៃចន្ទទី ២៤ មេសា ២០២៣ ពិភពលោក បានចំណាយថវិកាសរុបប្រចាំឆ្នាំ២០២២ ក្នុងវិស័យយោធា អស់ ២២៤០ពាន់លានដុល្លារ។ ជា កំណើនក្នុងអត្រា៣,៧% បើប្រៀបទៅនឹងមុន។ ប៉ុន្តែ ចំណាយយោធាបានឡើងខ្ពស់ខ្លាំង និងគួរឱ្យកត់សម្គាល់បំផុត គឺនៅតំបន់អឺរ៉ុប។ ដោយគ្មានការភ្ញាក់ផ្អើល សង្គ្រាមនៅអ៊ុយក្រែន បានអូសទាញអឺរ៉ុបឱ្យលង់ក្នុងចំណាយយ៉ាងធ្ងន់ក។
ចុះផ្សាយនៅថ្ងៃ៖
ស្តាប់ - ០២:២០
ចំណាយក្នុងវិស័យយោធា បានកើនឡើងដល់កំរិតកំពូលជាថ្មីនៅឆ្នាំនេះ និងជាគម្រប់៨ឆ្នាំជាប់គ្នា ដោយពិភពលោកបានចាយអស់ ២,២%នៃផលិតផលសរុបក្នុងស្រុក PIB។ ដោយគ្មានការភ្ញាក់ផ្អើល អឺរ៉ុបមានកំណើនចំណាយខ្លាំងជាងគេ ដល់ទៅ ១៣%បើប្រៀបទៅនឹងរបាយការណ៍ឆ្នាំមុន។
សង្គ្រាមនៅអ៊ុយក្រែន ជាដើមហេតុអូសទាញអឺរ៉ុបឱ្យចំណាយច្រើនខ្លាំងឡើងវិញ ជាលើកទីមួយ រហូតស្មើនឹងកំរិតចំណាយយោធានៅឆ្នាំ១៩៨៩ ឆ្នាំនៃការដួលរលំជញ្ជាំងប៊ែរឡាំង ដែលជាការបិទបញ្ចប់សង្គ្រាមត្រជាក់។ នៅឆ្នាំ២០២២ កញ្ចប់ថវិកាយោធាអឺរ៉ុប បានប៉ោងឡើង គួរជាទីកត់សម្គាល់ ដល់៤៨០ពាន់លានដុល្លារ ឬជាកំណើន ជាងមួយភាគបីក្នុងរយៈពេល១០ឆ្នាំ។ ចំណាយយោធានេះទំនងជាបន្តប៉ោងឡើងបន្ថែម ជាច្រើនឆ្នាំទៀត។ នេះ បើតាមការព្យាករណ៍របស់វិទ្យាស្ថានSipri។
របាយការណ៍ដដែលនេះ បានលម្អិតថា ប្រទេសអ៊ុយក្រែនតែមួយ បានចំណាយក្នុងផ្នែកយោធាដល់ទៅ ៤៤ពាន់លានដុល្លារនៅឆ្នាំ២០២២ ពោលគឺលើសឆ្នាំ២០២១ចំនួន ៦៤០% ឬត្រូវមួយភាគបីនៃផលិតផលសរុបក្នុងស្រុក។ ទាំងនេះដោយមិនរាប់បញ្ចូលជំនួយយោធារាប់សិពាន់លានដុល្លារមកពីបរទេសផង។ ចំណែករុស្ស៊ីមានចំណាយកើនឡើងទ្វេដងដែរ បើប្រៀបនឹងឆ្នាំមុន និងជាប់ក្នុងបញ្ជីប្រទេសមហាអំណាចដែល ចំណាយក្នុងវិស័យយោធាច្រើនជាងគេ ជាមួយអាមេរិក ចិន ឥណ្ឌា និងអារ៉ាប៊ីសាអូឌីត។ បើបូកបញ្ចូលគ្នា ៥ប្រទេសនេះ តំណាងឱ្យ៦៣%នៃចំណាយយោធាសរុបរបស់ពិភពលោក។ រីឯប្រទេសនៅអឺរ៉ុបផ្សេងទៀត ដូចយ៉ាង ប៉ូឡូញ ហូឡង់ ស៊ុយអែត ហ្វាំងឡង់ ក៏បានបំប៉ោងកញ្ចប់ថវិកាយោធាដែរ ដោយបានបង្កើនការវិនិយោគនិងធ្វើទំនើបកម្ម វិស័យយោធារបស់ពួកគេ។
ជប៉ុនក៏ដូចជាឥណ្ឌូណេស៊ី ម៉ាឡេស៊ី វៀតណាម ឬអូស្ត្រាលី សុទ្ធតែប្រឹងបង្កើនចំណាយអភិវឌ្ឍន៍វិស័យការពារជាតិរៀងខ្លួនៗ។ ជាសរុបថវិកាយោធាកើនឡើងនៅគ្រប់ទ្វីប លើកលែងតែអាហ្វ្រិកមួយប៉ុណ្ណោះ។ បើតាម Sipri នៅឆ្នាំនេះកញ្ចប់ថវិកាយោធាអាហ្វ្រិកបានចុះទ្រោមអស់៥,៣% តែត្រូវដកអេត្យូពីមួយចេញ ព្រោះប្រទេសនេះមានកំណើនចំណាយយោធាដល់ទៅ៨៨%៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ