អន្តរាគមន៍ចិនចង់ដោះស្រាយសង្គ្រាមនៅអ៊ុយក្រែន គឺជាការឆក់ឱកាសដើម្បីស្តីបន្ទោសសម្ព័ន្ធមិត្តលោកខាងលិច
អស់រយៈពេលជាច្រើនខែមកហើយ ដែលលោកហ្សេឡេនស្គី បានស្នើសុំចង់និយាយជាមួយលោកស៊ី ជីនពីង តែទើបតែកាលពីថ្ងៃពុធទី២៦មេសាប៉ុណ្ណោះ ដែលលោកស៊ី ជីនពីង និងលោកហ្សេឡេនស្គី បានជួបនិយាយគ្នាតាមទូរស័ព្ទជាលើកទី១ បន្ទាប់ពីសង្គ្រាមនៅអ៊ុយក្រែនបានផ្ទុះឡើង។ ចិនបានបង្ហាញនូវផែនការសន្តិភាពរបស់ខ្លួន ដែលមាន១២ចំណុច កាលពីខែកុម្ភៈ ហើយពេលនេះចិនហាក់ដូចជាចង់ចេញមុខកាន់តែខ្លាំងឡើង ដើម្បីចូលរួមដោះស្រាយវិបត្តិសង្គ្រាមនេះ។
ចុះផ្សាយនៅថ្ងៃ៖
ស្តាប់ - ០១:១៥
តែយ៉ាងណា យោងតាមការវិភាគរបស់លោក អង់ទ័ន បុងដាហ្ស (Antoine Bondaz) អ្នកជំនាញចិន នៅមូលនិធិដើម្បីការស្រាវជ្រាវយុទ្ធសាស្ត្រ Fondation pour la Recherche stratégique បានលើកឡើងថា គេមិនត្រូវដាក់ការសង្ឃឹមជ្រុលពេកនោះទេ ទៅលើវត្តមានរបស់ចិន នៅក្នុងសំណុំរឿងអ៊ុយក្រែន ព្រោះថាធាតុពិត គឺចិនកំពុងតែឆក់ឱកាសយកមុខសាងកេរ្តិ៍ឈ្មោះ ហើយចេញមុខវាយត្បកក្រុមប្រទេសលោកខាងលិច ដែលមានអាមេរិកជាមេដឹកនាំ។
សម្រង់បទវិភាគរបស់លោក Antoine Bondaz ដែលបានផ្តល់បទសម្ភាសន៍ឲ្យRFI នៅថ្ងៃទី២៦មេសា២០២៣
"គោលជំហររបស់ចិន បើយើងពិនិត្យឲ្យច្បាស់ទៅ គឺចិនចង់ចេញមុខមករិះគន់សហរដ្ឋអាមេរិក និងក្រុមសម្ព័ន្ធមិត្តលោកខាងលិចទាំងមូល។ គឺអាមេរិកនិងសម្ព័ន្ធមិត្តលោកខាងលិច ដែលចិនចង់ចង្អុរមុខថាជាអ្នកយកប្រេងទៅជះលើភ្លើង តាមរយៈការនាំគ្នាប្រគល់អាវុធទៅឲ្យអ៊ុយក្រែន។ សម្រាប់ចិន អ្នកដែលជាមេបង្កររឿង បង្កអស្ថិរភាព គឺអាមេរិក ព្រោះអាមេរិកបានបដិសេធមិនចរចាសន្តិភាព។
ដូច្នេះពេលនេះយើងឃើញថា ចិនចង់ផ្ញើសារប្រាប់ទៅប្រទេសមួយចំនួន ដែលមិនមែនជាសម្ព័ន្ធមិត្តលោកខាងលិច ដើម្បីប្រាប់ថា មានតែខ្លួនទេ ដែលជាមហាអំណាចដែលមានការទទួលខុសត្រូវ។ ចិននឹងប្រើហេតុផលទាំងអស់នេះ យកធ្វើជាអំណះអំណាងរបស់ខ្លួន ដើម្បីប្រាប់ពិភពលោកថា ចិនជាអ្នកគាំទ្រសន្តិភាព មិនគាំទ្រការធ្វើសង្គ្រាម។
សម្រាប់ពេលនេះ យើងទទួលស្គាល់ ថាចិនមិនបានជួយផ្នែកគ្រឿងសព្វាវុធទៅឲ្យរុស្ស៊ីមែន ក៏ប៉ុន្តែធាតុពិតទៅ ក្នុងការពិតជាក់ស្តែង គោលជំហរចិន គ្មានអ្វីដែលស្រពិចស្រពិលនោះទេ។ គឺចិន បានជួយរុស្ស៊ីដោយប្រយោលរួចទៅហើយនៅក្នុងការធ្វើសង្គ្រាមនេះ ទាំងផ្នែកការទូត នយោបាយ និងសេដ្ឋកិច្ច៕"
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ