អឺរ៉ុបបើកប្រតិបត្តិការទ្រង់ទ្រាយធំកំចាត់ក្រុមម៉ាហ៊្វីយ៉ានៅផ្ទៃក្នុងអឺរ៉ុប និងនៅអាមេរិឡាទីន
នៅថ្ងៃពុធ ទី៣ ឧសភា ទីភ្នាក់ងារនៃកិច្ចសហប្រតិបត្តិការប៉ូលិស និងយុត្តិធម៌របស់សហភាពអឺរ៉ុបហៅកាត់ Europol និង Eurojust បានបើកប្រតិបត្តិការទ្រង់ទ្រាយធំដើម្បីកំចាត់ក្រុមម៉ាហ៊្វីយ៉ាអ៊ីតាលីឈ្មោះ « អ៊ិនដ្រានហ្កេតា » ។ ប្រតិបត្តិការនេះបានធ្វើឡើងនៅផ្ទៃក្នុងអឺរ៉ុប និងនៅអាមេរិកឡាទីន។ នៅក្នុងប្រតិបត្តិការ មានមនុស្សសរុបចំនួន ១៣២នាក់ត្រូវបានចាប់ខ្លួនដែលភាគច្រើននៅក្នុងប្រទេសអ៊ីតាលី និងអាល្លឺម៉ង់។ គួរបញ្ជាក់ថា ក្រុមម៉ាហ៊្វីយ៉ា « អ៊ិនដ្រានហ្កេតា » នៅប៉ែកខាងត្បូងអ៊ីតាលីត្រូវបានគេចាត់ទុកជាក្រុមម៉ាហ៊្វីយ៉ាដ៏មានឥទ្ធិពលជាងគេនៅអ៊ីតាលី។
ចុះផ្សាយនៅថ្ងៃ៖
ស្តាប់ - ០១:៤៣
មានកម្លាំងប៉ូលិសជាង ២ ៧៧០នាក់ត្រូវបាន Europol និង Eurojust ប្រើនៅក្នុងប្រតិបត្តិការកំចាត់ក្រុមម៉ាហ៊្វីយ៉ាអ៊ីតាលី « អ៊ិនដ្រានហ្កេតា » នៅក្នុងប្រទេសអឺរ៉ុបចំនួន ៨ប្រទេស រួមទាំងនៅក្នុងប្រទេសប្រេស៊ីល និងប្រទេសប៉ាណាម៉ា។ ក្នុងចំណោមប្រទេសអឺរ៉ុបទាំង ៨ មានដូចជាអាល្លឺម៉ង់ បែលហ្ស៊ិក បារាំង ព័រទុយហ្កាល់ អេស្ប៉ាញ និងអ៊ីតាលី។ ប្រតិបត្តិការកំចាត់ក្រុមម៉ាហ៊្វីយ៉ា « អ៊ិនដ្រានហ្កេតា » បានធ្វើឡើងនៅក្រោយការស៊ើបអង្កេតរបស់អយ្យការសហព័ន្ធបែលហ្ស៊ិក។
ការស៊ើបអង្កេតបានបង្ហាញថា ក្រុមម៉ាហ៊្វីយ៉ា « អ៊ិនដ្រានហ្កេតា » បានរត់ពន្ធគ្រឿងញៀនចំនួន ២៥តោនក្នុងចន្លោះខែតុលា ឆ្នាំ ២០១៩ និងខែមករា ឆ្នាំ ២០២២។ គ្រឿងញៀនទាំងអស់នេះត្រូវបាននាំចេញពីប្រទេសកូឡុំប៊ីដោយឆ្លងកាត់ចូលតាមកំពង់ផែ Anvers ប្រទេសបែលហ្ស៊ិក និងកំពង់ផែ Rotterdam ប្រទេសហូឡង់។ ទន្ទឹមគ្នានេះ កំពង់ផែប្រទេសអេស្ប៉ាញ និងកំពង់ផែអ៊ីតាលីក៏ជាទីកន្លែងឆ្លងកាត់របស់គ្រឿងញៀននាំចេញពីប្រទេសកូឡុំប៊ីដែរ។ លើសពីនេះ និងបើតាមការស៊ើបអង្កេតដដែល មានគ្រឿងញៀនមួយចំនួនត្រូវបាននាំឆ្ពោះទៅកាន់ប្រទេសអូស្រា្តលី។
បន្ទាប់មក ការស៊ើបអង្កេតក៏បានបង្ហាញផងដែរថា ក្រុមម៉ាហ៊្វីយ៉ាអ៊ីតាលី « អ៊ិនដ្រានហ្កេតា » មានចំណងទាក់ទងជាមួយក្រុមម៉ាហ៊្វីយ៉ាអាល់បានីនៅប្រទេសអេក្វាទ័រ និងក្រុមម៉ាហ៊្វីយ៉ាប្រេស៊ីល។ នៅក្នុងប្រតិបត្តិការកំចាត់ទ្រង់ទ្រាយធំនេះ មានជនសង្ស័យសរុបចំនួន ១៣២នាក់ត្រូវបានចាប់ខ្លួនក្នុងនោះ មាន ២នាក់បានស្ថិតក្នុងបញ្ជីឈ្មោះមនុស្សដែល Europol បានតាមស្វែងរកចាប់ខ្លាំងជាងគេ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ