រុស្ស៊ីចោទអ៊ុយក្រែននិងអាមេរិក ថាបានឃុបឃិតគ្នាចង់ធ្វើឃាតលោកពូទីន
កាលពីយប់ថ្ងៃអង្គារឈានចូលថ្ងៃពុធ រុស្ស៊ីបានអះអាងថា គេបានបាញ់កម្ទេចទាន់ពេលវេលា នូវយានដ្រូនអត្តឃាតចំនួន២គ្រឿងរបស់អ៊ុយក្រែន ដែលប៉ុនប៉ងចូលទៅវាយប្រហារនៅវិមានក្រេមឡាំង និងប៉ុនប៉ងធ្វើឃាតលោកប្រធានាធិបតីរុស្ស៊ី។ គួរកត់សំគាល់ថា នេះជាលើកទីមួយហើយបន្ទាប់ពីសង្គ្រាមនៅអ៊ុយក្រែនបានផ្ទុះឡើង ដែលវិមានក្រេមឡាំង មជ្ឈមណ្ឌលអំណាចរបស់រុស្ស៊ី បានក្លាយជាផ្ទាំងស៊ីបនៃការវាយប្រហារបែបនេះ។ តែយ៉ាងណា វាមានចំងល់ជាច្រើន ជុំវិញការអះអាងចោទប្រកាន់របស់រុស្ស៊ីនេះ។ ភាគីអ៊ុយក្រែនវិញបានច្រានចោលការចោទប្រកាន់នេះភ្លាមៗ និងបានចំអកទៅវិញថា មានតែរុស្ស៊ីខ្លួនឯងទេ ដែលជឿភាសាកុហកបោកប្រាស់របស់ខ្លួនឯងនេះ។
ចុះផ្សាយនៅថ្ងៃ៖
ស្តាប់ - ០៧:២៥
វាយប្រហារវិមានក្រេមឡាំង និងប៉ុនប៉ងធ្វើឃាតលោកពូទីន
ជាលើកទី១ហើយ ដែលវិមានក្រេមឡាំង បេះដូងនៃអំណាចនយោបាយរបស់រុស្ស៊ី បានក្លាយជាផ្ទាំងស៊ីបនៃការវាយប្រហារបែបនេះ។ យោងតាមអះអាងថា របស់ភាគីរុស្ស៊ី ភ្ជាប់ដោយរូបភាពវីដេអូផងនោះ គេឃើញយានដ្រូន២បានផ្ទុះនៅលើទីលាន ខាងក្នុងវិមានក្រឹមឡាំងតែម្តង។ ដ្រូនទី១ ផ្ទុះវេលាម៉ោងប្រមាណ២និង២៧នាទីរំលងអាធ្រាត្រ ឈានចូលថ្ងៃពុធ ផ្ទុះចំពីលើកំពូលដំបូល វិមានព្រឹទ្ធសភារុស្ស៊ី។ ចំណែកដ្រូនទី២ ផ្ទុះម៉ោងប្រមាណ ២និង៤៣នាទីរំលងអាធ្រាត្រ ចំពីលើវិមានប្រធានាធិបតីរុស្ស៊ីតែម្តង។ រុស្ស៊ីបានបើប្រកាសថា គេបានបើកការស៊ើបអង្កេតហើយ ស្តីពីការវាយប្រហារភេរវកម្មដែលប៉ុនប៉ងសម្លាប់លោកពូទីននេះ។
វិមានក្រេមឡាំងបានអះអាងថា គឺប្រព័ន្ធការពារផ្លូវអាកាសរបស់រុស្ស៊ី ដែលបានបាញ់កំទេច ទម្លាក់យានដ្រូនទាំង២របស់អ៊ុយក្រែននេះ បានទាន់ពេលវេលា។ ក្រេមឡាំងបានចោទថា គឺអ៊ុយក្រែនមានចេតនាប៉ុនប៉ងធ្វើឃាតលោកប្រធានាធិបតីពូទីនដោយផ្ទាល់តែម្តង។ ហើយនៅព្រឹកមិញនេះ ក្នុងសន្និសីទកាសែត លោកឌីមីទ្រ ប៉េសកូវ អ្នកនាំពាក្យវិមានក្រេមឡាំង បានចោទដោយចំៗតែម្តង ថាអ៊ុយក្រែន ក៏មិនមែនធ្វើដោយចិត្តឯងនោះទេ គឺវាច្បាស់ណាស់ ដែលអាមេរិកជាអ្នកបញ្ជាប្រាប់ឲ្យធ្វើ។ អ្នកនាំពាក្យវិមានក្រេមឡាំងបានចោទថាអាមេរិកនិងអ៊ុយក្រែន ដែលជាអ្នកឃុបឃិតគ្នា វាយប្រហារវិមានក្រេមឡាំង និងចង់ធ្វើឃាតលោកពូទីន។
ប៉ុន្តែកាលពីថ្ងៃពុធទី៣ឧសភា លោកហ្សេឡេនស្គី ប្រធានាធិបតីអ៊ុយក្រែន បានថ្លែងពីប្រទេសហ្វាំងឡង់មកថា អ៊ុយក្រែន គ្មានអ្វីពាក់ព័ន្ធនឹងរឿងការវាយប្រហារដោយយានដ្រូននៅវិមានក្រេមឡាំងនោះទេ។ លោកបន្ថែមថា វាមិនមែនជាកម្មវត្ថុយោធារបស់អ៊ុយក្រែនឡើយ ដែលទៅវាយប្រហារដល់វិមានក្រេមឡាំងកណ្តាលក្រុងម៉ូស្គូនោះ។ អ្វីដែលកងទ័ពអ៊ុយក្រែនធ្វើ គឺការពារតែទឹកដី ភូមិស្រុករបស់ប្រជាជនអ៊ុយក្រែនតែប៉ុណ្ណោះ។
មន្ទិលសង្ស័យចំពោះការចោទរបស់រុស្ស៊ី
លោកអង់តូនី ប្លីងកិន ប្រមុខការទូតអាមេរិក បានលើកឡើងថា អ្វីក៏ដោយ ដែលចេញពីមាត់ម៉ូស្គូ គឺគេមិនត្រូវជឿទុកចិត្តភ្លាមទេ ត្រូវតែពិនិត្យមើលឲ្យបានច្បាស់សិន។ ដូចគ្នាដែរ លោកស្រី Catherine Colonna រដ្ឋមន្ត្រីក្រសួងការបរទសបារាំង បានលើកឡើងនៅព្រឹកមិញនេះថាលោកស្រីមិនជឿទេ ព្រោះករណីវាយប្រហារដោយយានដ្រូនរបស់អ៊ុយក្រែន ដល់កណ្តាលក្រុងម៉ូស្គូនេះ វាជារឿងចម្លែកខ្លាំងណាស់។
គួរបញ្ជាក់ដែរ ថាជុំវិញករណីវាយប្រហារនៅវិមានក្រេមឡាំងនេះ វាបានបង្កើតឲ្យមានចម្ងល់ច្រើនណាស់។ ទីមួយ ភាគីរុស្ស៊ីបានប្រើប្រាស់បណ្តាញផ្សព្វផ្សាយយ៉ាងព្រោងព្រាត ប្រកាសថាយានដ្រូន២គ្រឿងរបស់អ៊ុយក្រែន ត្រូវបានបាញ់ទម្លាក់ទាន់ពេលវេលា នៅពីលើវិមានក្រេមឡាំង។ ក៏ប៉ុន្តែ គេមិនបានបញ្ជាក់អ្វីទាំងអស់ ថាយានដ្រូននោះជាប្រភេទអ្វី ម៉ូដែលអ្វីឲ្យពិតប្រាកដទេ ហើយដ្រូននោះត្រូវបានបង្ហោះចេញពីទីកន្លែងណាមក ក៏មិនបញ្ជាក់ដែរ។
មួយវិញទៀត យើងដឹងរួចមកហើយ ថាតាំងតែពីខែមករាដើមឆ្នាំនេះ ដែលកងទ័ពរុស្ស៊ីបានដាក់ប្រព័ន្ធខែលការពារផ្លូវអាកាស នៅតាមទីតាំងយុទ្ធសាស្ត្រសំខាន់ ខាងក្នុងនិងជុំវិញទីក្រុងម៉ូស្គូ។ ជាក់ស្តែង គេបានដាក់បញ្ឈរ ប្រព័ន្ធមីស៊ីល Pantsir-S1 និងប្រព័ន្ធរ៉ាដាការពារផ្លូវអាកាស S400 ដែលរុស្ស៊ីតែងតែអួត ថាមានសមត្ថភាពពូកែណាស់។ តែសួរថាហេតុអ្វី បានជាវានៅតែរបូត បណ្តោយឲ្យមានដ្រូន២គ្រឿង ហោះទៅដល់ខាងលើវិមានក្រេមឡាំង ដែលជាបេះដូងនៃស្ថាប័នអំណាចរបស់រុស្ស៊ី? វាមានន័យថា ប្រព័ន្ធខែលការពារផ្លូវអាកាសដែលរុស្ស៊ីខំអួតកន្លងមកនេះ តាមពិតទៅវាគ្មានបានការឬយ៉ាងណា?
ការពិតទៅ អ្នកជំនាញខ្លះបានទទួលស្គាល់ថា អ៊ុយក្រែនមានដ្រូនមួយប្រភេទ ឈ្មោះ UJ-22 Airborne ផលិតដោយក្រុមហ៊ុនអ៊ុយក្រែន UkrJet ដែលអាចហោះបានចំងាយប្រមាណ៨០០គីឡូម៉ែត្រ ពោលគឺអាចហោះទៅដល់ម៉ូស្គូ។ ក៏ប៉ុន្តែគ្មាននរណាជឿទេ ថាដ្រូននេះអាចគេចផុតសំណាញ់ប្រព័ន្ធខែល S400 របស់រុស្ស៊ីនោះ។
ឆាកល្ខោនរុស្ស៊ី?
អ្នកជំនាញបានផ្តោតការសង្ស័យថា គឺរុស្ស៊ីជាអ្នករៀបចំឆាកល្ខោនខ្លួនឯង ព្រោះថាធាតុពិត រុស្ស៊ីអាចមានហេតុផលចំណេញច្រើន តាមរយៈការរៀបចំឆាកល្ខោនបែបនេះ។ ទីមួយ ការប្រកាសថាមានករណីប៉ុនប៉ងវាយប្រហារមកលើវិមានក្រេមឡាំង ពីសំណាក់អ៊ុយក្រែនបែបនេះ គឺអំណាចនយោបាយរុស្ស៊ី ចង់ផ្ញើសារប្រាប់ប្រជាជនឲ្យភ័យ និងភ្ញាក់ខ្លួន ថាឃើញទេ ពួកអ៊ុយក្រែន ពួកអាមេរិកចង់រួមគ្នាកំទេចវិមានក្រេមឡាំង ហើយចង់ធ្វើឃាតលោកពូទីនទៀត! សាររបៀបនេះ វាអាចជាការឃោសនា ដើម្បីប្រមូលទឹកចិត្តប្រជាជនរុស្ស៊ី ឲ្យរួមគ្នាដើរពីក្រោយលោកពូទីន ដើម្បីធ្វើសង្គ្រាម។
ចំណុចមួយទៀត គឺការប្រឌិតរៀបចំឆាកល្ខោនរបៀបនេះ វានឹងអាចក្លាយជាលេស ដែលភាគីរុស្ស៊ីយកជាហេតុផល ដើម្បីសំអាងការពារ ចំពោះការវាយប្រហារសងសិករបស់ខ្លួនទៅថ្ងៃខាងមុខ។ យ៉ាងណាមិញ កំដៅកំហិងពីក្រុមអ្នកនយោបាយជាតិនិយមជ្រុលរុស្ស៊ី បានចាប់ផ្តើមឆេះកាន់តែខ្លាំងហើយ តាមរយៈការអំពាវនាវថាត្រូវតែសងសឹងឲ្យចាស់ដៃទៅលើអ៊ុយក្រែន។ ពេញមួយថ្ងៃពុធម្សិលមិញ មន្ត្រីនយោបាយធំៗរបស់រុស្ស៊ីបាននាំគ្នាចេញមុខជាបន្តបន្ទាប់ ប្រាកាសថារុស្ស៊ីត្រូវតែសងសិក។
ជាក់ស្តែង លោកViatcheslav Volodine ប្រធានសភាជាន់ទាបរុស្ស៊ី បានហៅឲ្យកងទ័ពរុស្ស៊ី ត្រូវតែប្រើអាវុធពិសេស ដើម្បីវាយកំទេចឲ្យចំទីតាំងកណ្តាល នៃរដ្ឋាភិបាលរបស់អ៊ុយក្រែន។ ហើយលោក ឌីមីទ្រី ម៉េដវ៉េដេវ អតីតប្រធានាធិបតីរុស្ស៊ី បានប្រកាសថា រុស្ស៊ីត្រូវតែសម្លាប់លោកហ្សេឡេនស្គីចោលតែម្តង ដើម្បីឲ្យឆាប់ចប់រឿង។ ដោយថ្នមពាក្យជាងនេះ វិមានក្រេមឡាំងបានប្រកាសថា គេសូមរក្សាសិទ្ធិវាយប្រហារសងសិកវិញទៅលើអ៊ុយក្រែន។
យ៉ាងណាមិញ នៅវេលាទាបភ្លឺព្រឹកថ្ងៃព្រហស្បតិ៍នេះ រុស្ស៊ីបានបើកការវាយប្រហារដ៏ធំ មកលើអ៊ុយក្រែន។ រដ្ឋធានីកៀវត្រូវបានរងការវាយប្រហារជាលើកទី៣ ក្នុងរវាង៤ថ្ងៃចុងក្រោយនេះ។ ផ្អែកតាមក្រសួងការពារជាតិអ៊ុយក្រែន ក្រៅពីមីស៊ីល គឺកងទ័ពរុស្ស៊ីបានប្រើយានដ្រូនបំផ្ទុះគ្រាប់បែកអត្តឃាត ចំនួន២៤គ្រឿងកាលពីយប់មិញនេះ ដែលក្នុងនោះ មាន១៨គ្រឿងត្រូវបានកងទ័ពអ៊ុយក្រែនបាញ់កំទេចបាន។ សេណារីយ៉ូនេះ គឺវាជាអ្វីដែលភាគីអ៊ុយក្រែនបានលើកឡើង ពោលគឺរុស្ស៊ីជាអ្នករៀបចំឆាកល្ខោន ប្រឌិតរឿងថាមានដ្រូនចង់វាយប្រហារវិមានក្រឹមឡាំង ហើយយកហេតុផលនេះជាបង្អែក ការពារ ដល់ការវាយប្រហារទ្រង់ទ្រាយធំរបស់ខ្លួន នៅអ៊ុយក្រែនតែប៉ុណ្ណោះ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ