របាយការណ៍៖ ជនភៀសខ្លួនក្នុងស្រុក ឆ្នាំ២០២២ មានចំនួនកើនឡើងដល់ ៧១លាននាក់ នៅទូទាំងពិភពលោក
ឆ្នាំ២០២២កន្លងទៅ ជនភៀសខ្លួនក្នុងស្រុក មានចំនួនកើនឡើងដល់ ៧១,១លាននាក់ នៅទូទាំងពិភពលោក។ នេះបើតាមរបាយការណ៍ថ្មី ចេញផ្សាយនៅថ្ងៃព្រហស្បតិ៍ ដែលត្រូវផ្សព្វផ្សាយមួយឆ្នាំម្តង ដោយ មជ្ឈមណ្ឌលសកលតាមដានស្ថតិជនភៀសខ្លួនក្នុងស្រុក និងសហការជាមួយក្រុមប្រឹក្សាន័រវែសខាងជនភៀសខ្លួន (NRC)។ ស្ថាប័នទាំងពីរ ដែលជាអ្នកសរសេររបាយការណ៍នេះ បានសង្កត់ធ្ងន់ថា ចំនួនប្រជាជនផ្លាស់ទីលំនៅក្នុងប្រទេសរបស់ខ្លួន កើនឡើងយ៉ាងគំហុក មិនធ្លាប់ជួបទាល់តែសោះ។ នេះក៏ព្រោះតែ ជម្លោះក្នុងស្រុករបស់ពួកគេ ការវាយប្រហារប្រដាប់អាវុធ ហើយនិង កត្តាគំរាមកំហែងពីគ្រោះធម្មជាតិ ទឹកជំនន់ជាដើម។
ចុះផ្សាយនៅថ្ងៃ៖
ស្តាប់ - ០២:៣៩
ទិន្នន័យជនភៀសខ្លួនក្នុងប្រទេសខ្លួនឯង កើនឡើងខ្លាំងមែនទែន នៅឆ្នាំ២០២២ បើធៀបនឹងឆ្នាំ២០២១។ មួយចំណែកធំ នៃការភៀសខ្លួនចោលទីកន្លែងកំណើតនេះ ក៏ព្រោះតែបញ្ហាជាច្រើន ជាអាទិ៍ សង្គ្រាមនៅអ៊ុយក្រែន និងបញ្ហាទឹកជំនន់នៅប៉ាគីស្ថាន វិបត្តិជម្លោះប្រដាប់អាវុធថ្មីៗបន្ថែមទៀត ដែលមានជាយូរហែ ហើយនិងវិបត្តិគ្រោះធម្មជាតិផ្សេងៗជាច្រើន ដែលជំរុញឲ្យពលរដ្ឋផ្លាស់ទីលំនៅ។ ទិដ្ឋភាពនេះមានជាច្រើនប្រទេស ចាប់ពីបណ្តាប្រទេសក្នុងទ្វីបអាមេរិក រហូតទៅតំបន់ប៉ាស៊ីហ្វីក។ នេះគឺជាការគូសបង្ហាញប្រាប់ទីភ្នាក់ងារព័ត៌មានបារាំង AFP ពីសំណាក់អ្នកស្រី Alexandra Bilak នាយិកាមជ្ឈមណ្ឌលសកលតាមដានស្ថតិជនភៀសខ្លួនក្នុងស្រុក Internal Displacement monitoring centre (IDMC) ។
ស្រដៀងគ្នានេះដែរ លោក Jan Egeland ប្រធានអង្គការក្រុមប្រឹក្សាន័រវែសខាងជនភៀសខ្លួន បានលម្អិតថា ភាគច្រើននៃជនភៀសខ្លួនក្នុងស្រុក គឺជាជនរងគ្រោះព្រោះតែជម្លោះដែលអូសបន្លាយច្រើនឆ្នាំហើយ។ កត្តាគ្រោះថ្នាក់ធម្មជាតិ ក៏ជំរុញឲ្យមានអ្នកភៀសខ្លួនថ្មីបន្ថែមទៀត។ ករណីនេះមានចំនួន ជាង ៣២ លាននាក់ នៅឆ្នាំ២០២២ គឺស្មើនឹង ៤០% បើធៀបនឹងឆ្នាំ២០២១។
បើតាមប្រភពដដែល ស្ថានភាពលំបាកក្នុងការរស់នៅ វិសមភាព ការគំរាមកំហែងសុវត្ថិភាព ជាកត្តាសំខាន់ៗ ដែលជំរុញឲ្យមនុស្សភៀសខ្លួន រួមផ្សំទាំងបញ្ហាស្បៀងអាហារ។ ស្បៀងអាហារ ដែលតាំងពីផ្ទុះសង្គ្រាមឈ្លានពានរុស្ស៊ីលើអ៊ុយក្រែនមក បណ្តាលឲ្យមានបញ្ហាស្បៀងជាទូទៅនៅលើសកលលោក។
របាយការណ៍ប្រចាំឆ្នាំរបស់អង្គការIDMC ដែលសរសេររួមគ្នាជាមួយនិងក្រុមប្រឹក្សាន័រវែសខាងជនភៀសខ្លួន (NRC) ក៏បានបង្ហាញទិន្នន័យ១០ប្រទេសដែលគេកត់សម្គាល់ខ្លាំង ថាមានពលរដ្ឋរត់ភៀសខ្លួនក្នុងស្រុកច្រើនជាងគេ។ នោះគឺប្រទេស ស៊ីរី អាហ្វហ្កានីស្ថាន សាធារណរដ្ឋកុងហ្កោ អ៊ុយក្រែន កូឡុំប៊ី អេត្យូពី យេម៉ែន នីហ្សេរីយ៉ា សូម៉ាលី និង សូដង់។
នៅស៊ូដង់ ដែលផ្ទុះសង្គ្រាមស៊ីវិលនៅពាក់កណ្តាលខែមេសាថ្មីៗនេះ គឺបានជំរុញឲ្យមនុស្ស ៧ សែននាក់ ភៀសខ្លួននៅក្នុងស្រុកបន្ថែមទៀត គ្រាន់តែក្នុងប៉ុន្មានសប្តាហ៍ប៉ុណ្ណោះ ហើយដែលនេះនឹងធ្វើឲ្យចំនួនអ្នកភៀសខ្លួន នឹងកើនឡើងសម្រាប់ទិន្នន័យឆ្នាំ២០២៣ ជាពុំខាន៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ