អាមេរិក បើក មជ្ឈមណ្ឌលគ្រប់គ្រងជនអន្តោប្រវេសន៍នៅក្រៅប្រទេស ដើម្បីទប់ស្កាត់ជនភៀសខ្លួនខុសច្បាប់
ថ្ងៃព្រហស្បតិ៍ ទី២៧មេសា រដ្ឋាភិបាលអាមេរិក ប្រកាសបើក មជ្ឈមណ្ឌលគ្រប់គ្រងជនអន្តោប្រវេសន៍ នៅប្រទេស ហ្កាតេម៉ាឡា និង កូឡុំប៊ី ដើម្បីទប់ស្កាត់ពីចម្ងាយ នូវលំហូរជនភៀសខ្លួនខុសច្បាប់។ រដ្ឋមន្រ្តីក្រសួងសន្តិសុខផ្ទៃក្នុងសហរដ្ឋអាមេរិក ក៏បញ្ជាក់ទៀតថាកំពុងតែពិភាក្សាជាមួយប្រទេសផ្សេងទៀត ដើម្បីបង្កើត «មជ្ឈមណ្ឌលបែបនេះ» បន្ថែមទៀត ។
ចុះផ្សាយនៅថ្ងៃ៖
ស្តាប់ - ០២:៣៦
វិធានការបង្កើត មជ្ឈមណ្ឌលគ្រប់គ្រងជនអន្តោប្រវេសន៍ នៅក្រៅប្រទេសនេះ គឺមានចេតនាកាត់បន្ថយអន្តោប្រវេសន៍ខុសច្បាប់ ហើយដើម្បីធានាថា ការធ្វើដំណើរភៀសខ្លួនចូលទឹកដីសហរដ្ឋអាមេរិក ត្រូវ«រៀបចំដោយត្រឹមត្រូវ មានសុវត្ថិភាព និងប្រកបដោយក្តីមនុស្សធម៌»។ នេះបើតាមការបញ្ជាក់របស់រដ្ឋមន្រ្តីក្រសួងការបរទេស អង់តូនី ប្ល៊ីងកិន នៅក្នុងសន្និសីទសារព័ត៌មាន។
វិធានការថ្មីនេះ ដាក់ចេញ ជួនចំពេលដែល ច្បាប់ចាស់ សល់តាំងពីជំនាន់ ប្រធានាធិបតី ដូណាល់ ត្រាំ ចែងអំពីការបណ្តេញជនភៀសខ្លួនខុសច្បាប់ និងដែលត្រូវផុតកំណត់នៅថ្ងៃទី១១ឧសភាខាងមុខ។ រដ្ឋមន្រ្តីក្រសួងសន្តិសុខផ្ទៃក្នុងសហរដ្ឋអាមេរិក លោក អាឡេហាន់ដ្រូ ម៉ាយ៉រកាស (Alejandro Mayorkas) បញ្ជាក់ថា ផុតថ្ងៃទី១១ឧសភា ពុំមែនបានសេចក្តី ព្រំដែនអាមេរិក នឹងត្រូវបើកចំហទេ។ រដ្ឋមន្រ្តីរូបនេះ បានលើកថា បណ្តាញឧក្រិដ្ឋជនឈ្មួញជួញដូរមនុស្ស បានបំភ្លៃការពិត និងបានផ្លុំត្រចៀកបោកបញ្ឆោតជនភៀសខ្លួន ថា សហរដ្ឋអាមេរិក នឹងបើកចំហប្រទេស នៅក្រោយថ្ងៃ១១ឧសភា តែតាមពិតដូច្នេះទេ។ រដ្ឋមន្រ្តីក្រសួងសន្តិសុខផ្ទៃក្នុង សង្កត់ធ្ងន់ថា ជនណាចូលទឹកដីអាមេរិកដោយខុសច្បាប់ គឺត្រូវទទួលទោស ហើយត្រូវ ហាមឃាត់ ៥ ឆ្នាំ មិនឲ្យជាន់ទឹកដីអាមេរិក ព្រមទាំងត្រូវរងបណ្តឹងព្រហ្មទណ្ឌថែមទៀត។
ទោះបីជាម្តេចក្តី រដ្ឋបាលសហរដ្ឋអាមេរិក បានពន្យល់ថា ការបង្កើតមជ្ឈមណ្ឌលគ្រប់គ្រងជនអន្តោប្រវេសន៍ គឺសម្រួលដល់ដំណើរការដាក់ពាក្យស្នើសុំភៀសខ្លួនចូលក្នុងទឹកដីអាមេរិក ហើយជាវិធានការទប់ស្កាត់ការជួញដូរមនុស្សនិងអន្តោប្រវេសន៍ខុសច្បាប់។ ក្នុងដំណើរការនេះ គឺបានការចូលរួមសហការពីស្ថាប័នអន្តរជាតិ ក្នុងនោះ ក៏មាន ឧត្តមស្នងការដ្ឋានអង្គការសហប្រជាជាតិទទួលបន្ទុកជនភៀសខ្លួន និងអង្គការអន្តរជាតិដើម្បីជនអន្តោប្រវេសន៍ ផង។
ជនអន្តោប្រវេសន៍ដែលចង់ចូលទៅទឹកដីអាមេរិក គឺត្រូវគេគិតថា ដើម្បីគេចចេញពីភាពក្រីក្រនិងអំពើហិង្សាក្នុងប្រទេសកំណើតរបស់ខ្លួន ហើយសង្ឃឹមថានឹងរកអនាគតជីវិតថ្មី។ ប៉ុន្តែពួកគេខ្លះ ត្រូវប្រឈមនឹងការឆបោកពីពួក«មេខ្យល់» និងត្រូវរងការរំលោភបំពាន។
តាំងពីឡើងកាន់តំណែងមក ប្រធានាធិបតី ចូ បៃដិន បានផ្តើមបញ្ចប់គម្រោងសាងសង់ជញ្ជាំងបិទព្រំដែនជាមួយម៉ិចស៊ិក ដែល ជាគម្រោងរបស់ប្រធានាធិបតីចាស់ ដូណាល់ ត្រាំ។ ខែមិថុនា ឆ្នាំទៅមិញ សហរដ្ឋអាមេរិក សន្យាទទួលជនភៀសខ្លួនស្របច្បាប់ ២ ម៉ឺននាក់ និងសន្យាបន្ថែមចំនួនឲ្យបានច្រើនជាងនេះ។ ក៏ប៉ុន្តែ ចំនួនមនុស្សភៀសខ្លួនជាក់ស្តែង ដែលហូរចូលសហរដ្ឋអាមេរិក គឺច្រើនឡើងៗ រាប់ពាន់ដល់រាប់ម៉ឺននាក់ ក្នុងមួយខែៗ។ ពួកគេទាំងនោះ ច្រើនមកពីតំបន់អាមេរិកខាងជើង និង តំបន់អាមេរិកឡាទីន៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ