អ៊ុយក្រែនអះអាងថាបានរុលខិតទៅមុខនៅតំបន់ Bakhmout ខណៈប្រេសិតចិនទៅអ៊ុយក្រែននិយាយពីផែនការសន្តិភាព
សមរភូមិតំបន់បាក្ខមូត ស្ថិតនៅភាគខាងកើតអ៊ុយក្រែន គឺជាសមរភូមិវាយប្រយុទ្ធ ដ៏ស្វិតស្វាញបំផុតរវាងកងទ័ពអ៊ីយក្រែន និងកងទ័ពរុស្ស៊ី។ ផ្អែកតាមប្រភពពីក្រសួងការពារជាតិអ៊ុយក្រែន គឺកងទ័ពអ៊ុយក្រែន បានសំរុករុលទៅមុខ ខណៈខាងរុស្ស៊ីកំពុងតែវាយដកថយ។ ស្របពេលជាមួយគ្នានេះ ចិនបានបញ្ជូនប្រេសិតពិសេសរបស់ខ្លួន ទៅ អ៊ុយក្រែននិងរុស្ស៊ី និងនៅប្រទេសអឺរ៉ុបចំនួន៣ ដើម្បីចាប់ផ្តើមនិយាយពីផែនការសន្តិភាព។
ចុះផ្សាយនៅថ្ងៃ៖
ស្តាប់ - ០២:២៥
ពីទីក្រុងកៀវ លោកស្រីអនុរដ្ឋមន្ត្រីក្រសួងការពារជាតិអ៊ុយក្រែន បានអះអាងកាលពីល្ងាចថ្ងៃសុក្រថា កងទ័ពអ៊ុយក្រែន មិនត្រឹមតែមិនបានបាត់បង់ទីតាំងឈរជើងប៉ុណ្ណោះទេ តែថែមទាំងបានរុលទៅមុខ បានចំងាយប្រមាណ២គីឡូម៉ែត្រ នៅសមរភូមិតំបន់ Bakhmout។
ដោយឡែក ថ្លែងក្នុងបទសម្ភាសន៍ឲ្យទូរទស្សន៍ BBC លោកប្រធានាធិបតីហ្សេឡេនស្គី បានលើកឡើងថា កងទ័ពអ៊ុយក្រែននៅតែខ្វះគ្រាប់ និងគ្រឿងសព្វាវុធចាំបាច់ផ្សេងទៀត ដើម្បីបើកការវាយប្រយុទ្ធទ្រង់ទ្រាយធំ ដណ្តើមយកទឹកដីមកវិញពីដៃចោរឈ្លានពានរុស្ស៊ី។ លោកហ្សេឡេនស្គី បានអំពាវនាវ សុំក្រុមប្រទេសសម្ព័ន្ធមិត្តលោកខាងលិច ប្រឹងប្រែងជួយអ៊ុយក្រែនបន្ថែមទៀត។
គួរបញ្ជាក់ថា ថ្មីៗនេះ Evguéni Prigojine មេក្រុមទាហានស៊ីឈ្នួលរុស្ស៊ី Wagner ដែលកំពុងឈរជើងនៅសមរភូមិ Bakhmout បានធ្វើសារជាវីដេអូ ស្តីបន្ទោសកងទ័ពជាតិរុស្ស៊ី ថាជាអ្នករត់ចោលជួរ ចោលសមរភូមិ ហើយមិនព្រមប្រគល់គ្រាប់កាំភ្លើង មកឲ្យក្រុមខ្លួនបន្តប្រយុទ្ធ។ ក្នុងសារវីដេអូនេះ Evguéni Prigojine បានស្តីជេរចំៗ ទៅលើលោក រដ្ឋមន្ត្រីក្រសួងការពារជាតិរុស្ស៊ី Sergueï Choigou និងលោក អគ្គមេបញ្ជាការកងទ័ពជាតិរុស្ស៊ី Valerie Guerassimov ថាសុទ្ធជាជនកំសាក។ ក្រៅពីមេក្រុម Wagner អ្នកសរសេរប្លុករុស្ស៊ី ដែលគាំទ្រសង្គ្រាម ច្រើននាក់ទៀត ក៏បានទាញសញ្ញាអាសន្នដែរ ថាកងទ័ពរុស្ស៊ីកំពុងតែបាក់ស្រុតខ្លាំងនៅសមរភូមិ។
ទាក់ទិននឹងផ្នែកការទូតវិញ ក្រសួងការបរទេសចិន បានឲ្យដឹងថាប្រេសិតពិសេសរបស់ខ្លួន គឺលោក Li Hui កំពុងតែធ្វើដំណើរទៅកាន់ទីក្រុងកៀវ និងបន្តដំណើរទៅម៉ូស្គូ ព្រមទាំងប្រទេសអឺរ៉ុប៣ទៀត គឺបារាំង ប៉ូឡូញ និងអាល្លឺម៉ង់ ដើម្បីចាប់ផ្តើមនិយាយពីផែនការចរចាសន្តិភាព ចាប់ពីថ្ងៃចន្ទសប្តាហ៍ក្រោយទៅ។ សូមបញ្ជាក់ថា លោក Li Hui អាយុ៧០ឆ្នាំ ដែលធ្លាប់ធ្វើជាអគ្គរដ្ឋទូតចិនប្រចាំនៅម៉ូស្គូ ពីឆ្នាំ២០០៩ ដល់ឆ្នាំ២០១៩ ត្រូវបានលោកស៊ី ជីនពីង ស្នើទៅកាន់លោកហ្សេឡេនស្គី កាលពីពេលនិយាយគ្នាតាមទូរស័ព្ទ ឲ្យធ្វើជាអ្នកសម្របសម្រួលការទូត រវាងភាគីជម្លោះទាំង២។
នៅទីក្រុងរ៉ូមប្រទេសអ៊ីតាលីឯណោះវិញ លោកប្រធានាធិបតីហ្សេឡេនស្គី ទើបតែបានធ្វើដំណើរទៅដល់នៅព្រឹកថ្ងៃសៅរ៍ទី១៣ឧសភា ដើម្បីជួបជាមួយថ្នាក់ដឹកនាំអ៊ីតាលី និងប្រហែលជាអាចជួបជាមួយសម្តេចប៉ាប ប្រមុខសង្ឃកាតូលិកថែមទៀតផង៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ