ប្រពលវប្បកម្ម គឺជាកត្តាចម្បង ធ្វើឲ្យចុះថយយ៉ាងខ្លាំង នូវចំនួនសត្វស្លាបនៅអឺរ៉ុប
នៅអឺរ៉ុប ចំនួនសត្វស្លាប បានថយចុះប្រមាណជា២០លានក្បាលជារៀងរាល់ឆ្នាំ ក្នុងរវាង៤០ឆ្នាំកន្លងមកនេះ។ នេះបើផ្អែកតាមរបាយការណ៍ស្រាវជ្រាវដ៏ធំមួយ ធ្វើឡើងដោយក្រុមអ្នកជំនាញអឺរ៉ុប ចេញផ្សាយកាលពីថ្ងៃចន្ទ ទី១៥ឧសភា។ យោងតាមការសិក្សា កត្តាធំចម្បងដែលបានធ្វើឲ្យសត្វស្លាបនៅអឺរ៉ុប ថយចុះចំនួនយ៉ាងច្រើនបែបនេះ គឺបណ្ដាលមកពីវិស័យកសិកម្ម បែបប្រពលវប្បកម្ម ដែលប្រើប្រាស់ជីគីមីដ៏គ្រោះថ្នាក់បំផុត។
ចុះផ្សាយនៅថ្ងៃ៖
ស្តាប់ - ០២:៣៩
យោងតាមរបាយការណ៍ ចុះផ្សាយក្នុងទស្សនាវត្តី PNAS (Proceeding of the National Academy of Sciences) សកម្មភាពរបស់មនុស្ស គឺជាអ្នកដែលបានធ្វើឲ្យសត្វស្លាបចុះថយចំនួននៅអឺរ៉ុប។ នេះគឺលទ្ធផលនៃការស្រាវជ្រាវដ៏ធំ សហការជាមួយក្រុមការងារជំនាញជាច្រើនក្រុម តាមដានសិក្សាលើសត្វស្លាបចំនួន ១៧០ពូជ នៅតាមតំបន់សិក្សាចំនួន២ម៉ឺនទីតាំង នៅតាមប្រទេសអឺរ៉ុបចំនួន២៨ប្រទេស។
លោក Vincent Devictor អ្នកស្រាវជ្រាវនៅមជ្ឈមណ្ឌលជាតិស្រាវជ្រាវវិទ្យាសាស្ត្របារាំង ហៅកាត់ថា CNRS ដែលចូលរួមនៅក្នុងរបាយការណ៍នេះ បានលើកឡើងថាក្នុងរយៈពេល៤០ឆ្នាំមកនេះ ចំនួនសត្វស្លាបនៅអឺរ៉ុប បានចុះថយចំនួន ៨០០លានក្បាល។ ពោលគឺ ចុះថយ ២០លានក្បាល ក្នុងមួយឆ្នាំ។ ប្រព័ន្ធជីវចម្រុះនីមួយៗ មានការថយចុះខុសគ្នា ដោយសត្វស្លាបតំបន់ព្រៃ ចុះថយចំនួន១៨% សត្វស្លាបតំបន់ក្រុងប្រជុំជន ចុះថយ២៨% រីឯសត្វស្លាបតំបន់កសិកម្ម ចុះថយដល់ទៅ៥៧%។
ក្នុងន័យនេះ អ្នកជំនាញបានសន្និដ្ឋានថា វិស័យកសិកម្មបែបប្រពលវប្បកម្ម ដែលប្រើប្រាស់ដីទំហំធំៗ គ្រឿងចក្រធំៗ និងជាពិសេសគឺប្រើជីគីមីក្នុងចំនួនច្រើនខ្លាំងនោះ វាគឺជាកត្តាចំបង ដែលធ្វើឲ្យសត្វស្លាបមួយចំនួន ថយចុះចំនួន ឬស្លាប់ផុតពូជតែម្តង ជាពិសេសគឺសត្វស្លាបដែលស៊ីសត្វល្អិតគ្មានស្អឹងខ្នង ជាចំណីអាហារ។
ប្រភេទសត្វល្អិតគ្មានឆ្អឹងខ្នង គឺជាប្រភពចំណីអាហារដ៏សំខាន់បំផុតរបស់សត្វស្លាប យ៉ាងហោចសម្រាប់១៤៣ពូជ ក្នុងចំណោម១៧០ពូជ។ ភាពចំបាច់នេះ កាន់តែមានកម្រិតខ្ពស់ នៅក្នុងអំឡុងពេលបន្តពូជ បង្កកំណើត និងរយៈពេលដំបូងរបស់កូនសត្វស្លាបដែលទើបនឹងញាស់។ ការប្រើប្រាស់ជីគីមី បានសម្លាប់សត្វល្អិត ធ្វើឲ្យសត្វស្លាបគ្មានចំណីអាហារ ប៉ះពាល់ដល់ការបង្កកំណើត និងការរីកធំធាត់របស់កូនសត្វស្លាប។
អ្នកជំនាញបានទាញសញ្ញាអាសន្ន ថាត្រូវតែកែប្រែរបៀបធ្វើកសិកម្ម ឈប់ប្រើប្រាស់ជីគីមីដ៏គ្រោះថ្នាក់តទៅទៀត។ បន្ថែមពីនេះ ការរីកកាន់តែធំនៃទីក្រុង និងទីប្រជុំជន ជាមួយនឹងសំណង់អាគារ ការចាក់បេតុងគ្រប់ពាសពេញ ក៏ជាកត្តាមួយ ដែលរុញច្រាន រំខានសត្វស្លាបមិនឲ្យរស់ និងបន្តពូជបាន។ បម្រែបម្រួលអាកាធាតុ ក្តៅខ្លាំងនិងត្រជាក់ខ្លាំង បានធ្វើឲ្យប៉ះពាល់ផងដែរ ដល់ពូជសត្វស្លាបមួយចំនួន ដែលមិនអាចសម្របខ្លួនបាន៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ