WHO៖មានមនុស្សចំនួន ១ ០០០លាននាក់នៅក្នុង ៤៣ប្រទេសបានប្រឈមនឹងជំងឺអាសន្នរោគ
អង្គការសុខភាពពិភពលោកហៅកាត់ WHO បានព្រមានក្នុងថ្ងៃសុក្រ ទី១៩ ឧសភាថា មានមនុស្សចំនួន ១ ០០០លាននាក់នៅក្នុង ៤៣ប្រទេសបានប្រឈមនឹងជំងឺអាសន្នរោគ។ ជំងឺនេះបានបង្កឲ្យមានការរាករូស និងក្អួតចង្អោរ។ ចំណែកប្រភពនៃការផ្ទុះជំងឺអាសន្នគឺការខ្វះអានាម័យ និងខ្វះទឹកស្អាតប្រើប្រាស់។ WHO បានបញ្ជាក់ដោយមិនលាក់លៀមថា គេបានដឹងច្បាស់ពីរបៀបព្យាបាល និងទប់ស្កាត់លើការឆ្លងរាតត្បាតរបស់ជំងឺមួយនេះ។ តែអ្វីដែលកំពុងនៅខ្វះ គឺថវិកា។
ចុះផ្សាយនៅថ្ងៃ៖
ស្តាប់ - ០២:២១
លោក Jérôme Pfaffmann Zambruni ប្រធានអង្គភាពសង្គ្រោះបន្ទាន់ផ្នែកសុខភាពសាធារណៈរបស់អង្គការ UNICEF បានថ្លែងនៅក្នុងសន្និសីទកាសែតពីក្រុងហ្សឺណែវ ប្រទេសស៊្វីសដោយព្រមានថា បើពិភពលោកមិននាំគ្នាចាត់វិធានការឥឡូវនេះទេ ស្ថានភាពនឹងធ្លាក់ដុនដាបកាន់តែខ្លាំងថែមទៀត។ « មានជំងឺរាតត្បាតសម្លាប់ជនក្រីក្រនៅចំពោះមុខយើង ហើយយើងដឹងច្បាស់ពីវិធីបញ្ឈប់វា តែយើងត្រូវការឲ្យមានការគាំទ្របន្ថែមទៀត និងការចូលរួមពីសហគមន៍អន្តរជាតិ » នេះជាសម្តីរបស់លោក Pfaffmann Zambruni។
ចំណែកលោក Henry Gray អ្នកទទួលខុសត្រូវម្នាក់របស់អង្គការសុខភាពពិភពលោក WHO បានបញ្ជាក់ថា អង្គការសហប្រជាជាតិត្រូវការលុយចំនួន ៦៤០លានដុល្លារដើម្បីប្រយុទ្ធប្រឆាំងនឹងជំងឺអាស្ននរោគ និងមិនភ្លេចរម្លឹកថា នៅពេលដែលការបង្កើនមធ្យោបាយទប់ស្កាត់កាន់តែអូសបន្លាយ ស្ថានការណ៍នឹងកាន់តែអាក្រក់ខ្លាំង។ តាម WHO យុទ្ធនាការប្រើវ៉ាក់សាំងបង្ការជំងឺអាសន្នរោគបានធ្លាក់ចុះយ៉ាងគំហុក ហើយក្នុងពេលជាមួយគ្នា ចំនួនប្រទេសដែលប្រឈមនឹងការឆ្លងរាតត្បាតជំងឺអាសន្នរោគបានកើនឡើង។
តាម WHOមានថ្នាំវ៉ាក់សាំងបង្ការជំងឺអាសន្នរោគជាង ១៨លានដូសដែលបានស្នើសុំក្នុងឆ្នាំ ២០២៣ តែទើបមានក្នុងដៃតែ ៨លានដូសប៉ុណ្ណោះ។ តែដើម្បីអាចជួយសង្រ្គោះមនុស្សឲ្យបានកាន់តែច្រើន WHO បានបង្ខំចិត្តប្រើតែមួយដូសជំនួសឲ្យពីរដូសដោយដឹងថា មិនអាចការពារបានយូរអង្វែងក៏ដោយ។ WHO និង UNICEF ដែលធ្វើការរួមគ្នាដើម្បីប្រយុទ្ធប្រឆាំងនឹងជំងឺអាសន្នរោគបានប្រាប់ពីតម្រូវការលុយចំនួន ១៦០លាន និង ៤៨០លានដុល្លារក្នុងរយៈពេល ១២ខែខាងមុខដើម្បីចូលជួយនៅក្នុងប្រទេសជាង ៤០ប្រទេស។
ម៉ាឡាវី និងម៉ូសំប៊ិកជាប្រទេសដែលកំពុងរងគ្រោះខ្លាំងជាងគេនៅពេលនេះ។ បន្ទាប់មក មានប្រទេសប៊ូរុនឌី កាមេរូន សាធារណរដ្ឋប្រជាធិបតេយ្យកុងហ្គោ អេត្យូពី កេនយ៉ា សូម៉ាលី ស៊ីរី សំប៊ី និងប្រទេសស៊ីមបាវេ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ