អង្គការសុខភាពពិភពលោក អំពាវនាវឱ្យជួយគិតគូរប្រយុទ្ធប្រឆាំងនឹងជំងឺត្រូពិក
ជំងឺគ្រុនឈាម ជំងឺគ្រុនឈីក ជំងឺឃ្លង់ ... សុទ្ធសឹងជាជំងឺត្រូពិក ដែលគ្មាននរណាសូវចាប់អារម្មណ៍ខ្វល់ខ្វាយទេ។ ថ្លែងក្នុងទិវាពិភពលោកនៃជំងឺត្រូពិក លោកអគ្គលេខាធិការអង្គការសុខភាពពិភពលោកតេដ្រូស អាដាណុម ហ្គេប្រេយេស៊ូស បានអំពាវនាវឱ្យពិភពលោកភ្ញាក់ស្មារតីចូលរួមប្រយុទ្ធប្រឆាំងនឹងជំងឺត្រូពិកគ្មានអ្នកចិត្តទុកដាក់នេះ ព្រោះជំងឺនេះបានកំពុងបន្តចម្លងនិងកើតលើមនុស្សចំនួន ជាង១៦០០លាននាក់ នៅឆ្នាំ២០២១កន្លងទៅនេះ។
ចុះផ្សាយនៅថ្ងៃ៖
ស្តាប់ - ០២:១៧
ជំងឺត្រូពិកគ្មានអ្នកចិត្តទុកដាក់ ជាជំងឺដែលមានកើតច្រើនក្នុងតំបន់អន់ថយត្រូពិក គ្មានទឹកស្អាត គ្មានប្រព័ន្ធទឹកលូសម្អុយ និងគ្មានប្រព័ន្ធថែទាំសុខភាពត្រឹមត្រូវ ពោលគឺជាជំងឺដែលមានកើតតែក្នុងប្រទេសក្រីក្រ។ ស្ថិតក្នុងចង្កោមបង្ករោគប្រមាណ២០មុខ ជំងឺត្រូពិកគ្មានអ្នកគិតគូរច្រើនតែបង្កឡើងដោយភ្នាក់ងារចម្លងជាច្រើន ដូចជាវីរុស បាក់តេរី ប៉ារ៉ាស៊ីត ផ្សិត ឬជាតិពុល ដែលមានពាក់ព័ន្ធយ៉ាងស្មុគស្មាញនឹងលក្ខខណ្ឌបរិស្ថាន រស់នៅ និងភាគច្រើនមានពាក់ព័ន្ធនឹងវដ្តជីវិតរបស់សត្វល្អិត។ គ្មានអ្នកយកចិត្តទុកដាក់ ព្រោះគ្មានឈ្មោះក្នុងកម្មវិធីសុខភាពពិភពលោកទេ។ នេះបើតាមប្រសាសន៍របស់អគ្គលេខាធិការអង្គការសុខភាពពិភពលោកតេដ្រូស អាដាណុម ហ្គេប្រេយេស៊ូស ដោយលម្អិតថា មានមូលនិធិតិចតួចណាស់ សម្រាប់ចំណាយលើយុទ្ធនាការប្រយុទ្ធប្រឆាំងនឹងជំងឺត្រូពិក ដែលអ្នកជំងឺត្រូវប្រឈមនឹងការម៉ាក់ងាយ និងដាក់ឱ្យនៅក្រៅសង្គម។
គ្មានអ្នកយកចិត្តទុកដាក់ តែជំងឺត្រូពិកបន្តចម្លងនិងកើតលើមនុស្សដល់ទៅជាង១៦០០លាននាក់នៅឆ្នាំ ២០២១ ពោលគឺតិចជាងកាលពីឆ្នាំ២០២០ដល់ទៅ៨០លាននាក់ និងដល់ទៅ២១៩០លាននាក់កាលពីឆ្នាំ២០១០។ នេះតាមរបាយការណ៍ថ្មីរបស់អង្គការសុខភាពពិភពលោក។ ប៉ុន្តែ៨០%នៃជំងឺត្រូពិកនេះមានកើតផ្តុំក្នុងចំនួន១៦ប្រទេស មានជាអាទិ៍សាធារណរដ្ឋកុងហ្កោ អេហ្ស៊ីប អេត្យូពី ឥណ្ឌា នីហ្សេរីយ៉ា ប៉ាគីស្ថាន ហ្វីលីពីន និងតង់ហ្សានី។ ទោះបីមានការលំបាកខ្លាំងមែន ប៉ុន្តែ៤៧ប្រទេសបានលុបបំបាត់ជំងឺត្រូពិកយ៉ាងហោចណាស់មួយ ក្នុងចំណោមជំងឺត្រូពិកដែលគេមិនយកចិត្តទុកដាក់ ហើយមាន៨ប្រទេសទើបសម្រេចកម្មវត្ថុប្រយុទ្ធប្រឆាំងនឹងជំងឺត្រូពិកនេះបាន កាលពីឆ្នាំទៅប៉ុណ្ណោះ។
តាមការពិតពិភពលោកមានមធ្យោបាយនិងចំណេះធ្វើមិនមែនសម្រាប់តែសង្គ្រោះជីវិតនិងសម្រាប់ការពារជំងឺ តែថែមទាំងសម្រាប់ជួយសង្គ្រោះសហគមន៍និងប្រទេសក្រីក្រទាំងមូលចេញពីការគំរាមកំហែងនេះជំងឺត្រូពិកនេះផង។ នាយកដេប៉ាតឺម៉ង់ជំងឺត្រូពិករបស់អង្គការសុខភាពពិភពលោក បានបន្ទោសដោយចំៗថា ជំងឺត្រូពិកមិនបានទទួលការយកចិត្តទុកដាក់ពីសហគមន៍អន្តរជាតិព្រោះវាមិនប៉ះពាល់ដល់ប្រទេសជឿនលឿន។ ជាឧទាហរណ៍ជាក់ស្តែង ជំងឺអុតស្វាមានកើតនៅអាហ្វ្រិកយូរហើយ តែទើបត្រូវបានផ្អើលប្រយុទ្ធប្រឆាំងនៅពេលកើតដល់ប្រទេសអ្នកមាន។
សម្រាប់លោក តេដ្រូស អាដាណុម ហ្គេប្រេយេស៊ូស ដល់វេលាដែលពិភពលោកត្រូវបញ្ចេញសកម្មភាព និងផ្តល់ការវិនិយោគរួមគ្នា ក្នុងជំងឺត្រូពិកហើយ ដើម្បីការពារមនុស្សទូទៅ មិនថាពួកគេមានលក្ខខណ្ឌជីវិតបែបណាឡើយ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ