អឺរ៉ុបពង្រឹងភាពជាដៃគូជាមួយទុយនីស៊ី ដោយគ្រោងផ្តល់ជំនួយ៩០០លានអឺរ៉ូ
នាថ្ងៃអាទិត្យទី ១១ មិថុនានេះ សហភាពអឺរ៉ុប បានស្នើពង្រឹងភាពជាដៃគូជាមួយប្រទេសទុយនីស៊ី ដោយគ្រោងផ្តល់ជំនួយហិរញ្ញវត្ថុរយៈពេលវែង ចំនួន ៩០០លានអឺរ៉ូ។ ក្នុងពេលរង់ចាំកិច្ចព្រមព្រៀង លោកស្រីប្រធានគណៈកម្មការអឺរ៉ុប ដែលកំពុងបំពេញទស្សនកិច្ចនៅទុយនីស៊ី បានប្រកាសបន្ថែមជំនួយបន្ទាន់ភា្លម ចំនួន ១៥០លាន ឱ្យប្រទេសដែលកំពុងជាប់បំណុលយ៉ាងវ័ន្តកនេះទៀត។
ចុះផ្សាយនៅថ្ងៃ៖
ស្តាប់ - ០២:០២
អមដំណើរដោយនាយករដ្ឋមន្ត្រីអ៊ីតាលី លោកស្រី ចរចា មេឡូនី និងនាយករដ្ឋមន្ត្រីហូឡង់ លោក ម៉ាក រ៉ូត ប្រធានគណៈកម្មការអឺរ៉ុប លោកស្រី អួរស៊ូឡា វ៉ុនឌែរឡេយែន បាននាំយកផែនការ៥ចំណុច ដែលមានបញ្ចូលគម្រោងប្រយុទ្ធប្រឆាំងនឹងអន្តោប្រវេសន៍ខុសច្បាប់ ទៅជូនដល់ដៃលោកប្រធានាធិបតីទុយនីស៊ី Kais Saied។
លោកស្រីប្រធានគណៈកម្មការប្រាថ្នាចង់ឱ្យទុយនីស៊ី ចុះហត្ថលេខាលើកិច្ចព្រមព្រៀងនេះជាមួយសហភាពអឺរ៉ុប យ៉ាងយូរនៅដំណាច់ខែក្រោយ ក្នុងជំនួបកំពូលសហភាពអឺរ៉ុប ព្រោះការពង្រឹងទំនាក់ទំនងជាដៃគូអឺរ៉ុបទុយនីស៊ី និងការវិនិយោគដើម្បីស្ថិរភាពនិងភាពរុងរឿង ជាតំណាងប្រយោជន៍រួម។ សហភាពអឺរ៉ុបគឺជាដៃគូពាណិជ្ជកម្ម និងជាអ្នកវិនិយោគទីមួយ នៅទុយនីស៊ី ហើយគឺអឺរ៉ុបនេះឯងដែលបានគាំទ្រទុយនីស៊ីក្នុងដំណើរផ្លូវ ឆ្លងអន្តរកាលប្រជាធិបតេយ្យ ដ៏វែងឆ្ងាយនិងលំបាកលំបិន ក្រោយពីមានបដិវត្តផ្តួលរំលំរបបផ្តាច់ការ បេនអាលី នៅឆ្នាំ២០១១មក។ នេះជាសាររំលឹករបស់លោកស្រីប្រធានគណៈកម្មការអឺរ៉ុប។
សំណើ៥ចំណុចរបស់សហភាពអឺរ៉ុបចំពោះទុយនីស៊ីនេះ ដែលការចរចានឹងចាប់ដំណើរការតាមក្រោយ គ្រោងពង្រឹងការវិនិយោគអឺរ៉ុបនៅទុយនីស៊ី ក្នុងវិស័យឌីជីថល នាំចេញថាមពលស្អាត និងកម្មវិធីសម្រាប់និស្សិតErasmus។ ការប្រយុទ្ធប្រឆាំងនឹងជំនួញអន្តោប្រវេសន៍ខុសច្បាប់ ក៏មានចំណែកក្នុងផែនការ៥ចំណុចដែលអឺរ៉ុបនឹងចំណាយ១០០លានអឺរ៉ូសម្រាប់ឆ្នាំនេះ ឱ្យទុយនីស៊ីយកទៅប្រើសម្រាប់ការពារព្រំដែន ស្វែងរកនិងសង្គ្រោះជនអន្តោប្រវេសន៍។ ជាសរុបផែនការអាចនឹងនាំជំនួយម៉ាក្រូហិរញ្ញវត្ថុ រហូតដល់ទៅ ៩០០លានអឺរ៉ូ នៅពេលនិយាយត្រូវគ្នាភ្លាម។ តែអឺរ៉ុប ក៏អាចនឹងចាក់សាច់លុយជំនួយ ១៥០លានអឺរ៉ូចូលក្នុងប្រព័ន្ធថវិការដ្ឋទុយនីស៊ីភ្លាមតែម្តងផង។ នេះបើតាមប្រសាសន៍របស់លោកស្រី វ៉ុនឌ័រលីយែន ពីប្រទេសទុយនីស៊ី ដែលកំពុងលង់នឹងបំណុលវន្តក ឡើងដល់៨០%នៃផលិតផលសរុបរបស់ខ្លួន និងដែលភ្នាក់ងារវាយតម្លៃហានិភ័យបំណុលអាមេរិកទើបទម្លាក់ចំណាត់ថ្នាក់ ហើយលែងអាចខ្ចីលុយ នៅបរទេសបានទៀត៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ