លោកម៉ាក្រុងចង់ឲ្យគេរើរោងចក្រផលិតឱសថយុទ្ធសាស្រ្ត មកក្នុងទឹកដីបារាំង
វិបត្តិកូវីដជាមេរៀនដកបទពិសោធន៍ដ៏សំខាន់មួយសម្រាប់ប្រទេសបារាំង នៅពេលនិយាយពីសន្តិសុខថ្នាំ។ ដើម្បីជៀសវាង វិបត្តិខ្វះថ្នាំសង្កូវ ដូចក្នុងអំឡុងវិបត្តិជំងឺកូវីដ ប្រធានាធិបតីបារាំង លោកអេម៉ានុយអែល ម៉ាក្រុង បានប្រកាសកាលពីថ្ងៃអង្គារម្សិលមិញ ពីគម្រោង រើទីតាំងរោងចក្រផលិតថ្នាំសំខាន់ៗ ប្រមាណ ៥០ប្រភេទ មកនៅក្នុងប្រទេសបារាំង។ នៅក្នុងចំណោមថ្នាំយុទ្ធសាស្រ្ត ដែលប្រធានាធិបតីបារាំងចង់ជំរុញ ឲ្យមានការផលិតក្នុងទឹកដីបារាំង មានថ្នាំ ផ្សះ ហើយនិងថ្នាំ ប៉ារ៉ាសេតាម៉ុល។
ចុះផ្សាយនៅថ្ងៃ៖
ស្តាប់ - ០១:៥៨
លោកប្រធានាធិបតីបារាំង អេម៉ានុយអែល ម៉ាក្រុងបានធ្វើទស្សនកិច្ចនៅរោងចក្រផលិតឱសថមួយកន្លែង នៅខេត្តArdèche ដែលស្ថិតក្នុងគម្រោងពង្រឹងការផលិតឱសថយុទ្ធសាស្រ្ត និងបន្ទាន់ ដែលបារាំង ធ្លាប់ត្រូវការខ្លាំង ប៉ុន្តែ ខ្វះខាត ក្នុងសម័យកូវីដ។ នៅទីនោះ លោកម៉ាក្រុងឆ្លៀតនិយាយពីបញ្ជីឈ្មោះថ្នាំ ប្រមាណ៤៥០ប្រភេទ ដែលរដ្ឋាភិបាលចាត់ទុកជាអាទិភាព ផ្តោតសំខាន់ដើម្បីធានាសន្តិសុខឱសថសម្រាប់ប្រជាជនបារាំង។
នៅក្នុងចំណោមថ្នាំប្រមាណ៤៥០ប្រភេទ មានថ្នាំជាង៥០ប្រភេទ ដែលបារាំងពឹងផ្អែក ត្រូវការទិញនាំចូលពីប្រទេស ក្រៅរង្វង់សហភាពអឺរ៉ុប នៅពេលបារាំងមិនអាចផលិតគ្រប់គ្រាន់ សម្រាប់ឆ្លើយតបនឹងតម្រូវការក្នុងស្រុក។
ដូច្នេះ ដើម្បីជៀសវាងការខ្វះខាតថ្នាំ និងត្រូវឈប់ពឹងផ្អែកលើដង្ហើមដករបស់ប្រទេសដទៃ ប្រមុខរដ្ឋបារាំងបានដាក់បញ្ចូលថ្នាំ ជាង ៥០ប្រភេទ ទៅបញ្ជីថ្នាំអាទិភាព ដែលគេត្រូវរើទីតាំងរោងចក្រផលិតមកនៅក្នុងទឹកដីបារាំង។ ថ្នាំផ្សះ ថ្នាំប៉ារ៉ាសេតាម៉ុល ថ្នាំសណ្តំ និងប្រពោធនកម្ម ថ្នាំបំបាត់ការឈឺចាប់ និងថ្នាំព្យាបាលជំងឺមហារីក សុទ្ធសឹងជាថ្នាំដែលប្រមុខរដ្ឋាភិបាលបារាំង ចាត់ចូលក្នុងបញ្ជីមុខថ្នាំយុទ្ធសាស្រ្ត។
តាមប្រធានាធិបតីបារាំង នៅប៉ុន្មានសប្តាហ៍ខាងមុខ រោងចក្រផលិតថ្នាំ ប្រមាណ ២៥ប្រភេទ នឹងរើផ្លាស់ទីមកនៅបារាំង ឬក៏បង្កើនការផលិតក្នុងបរិមាណច្រើន គួរឲ្យកត់សំគាល់។ បច្ចុប្បន្ននេះ រដ្ឋបារាំងចំណាយថវិកាជាង ១៦០លានអឺរ៉ូ សម្រាប់ជួយគម្រោងចំនួន ៨ ដែលផ្តោតទៅលើការរើផ្លាស់ទីរោងចក្រផលិតឱសថមកនៅប្រទេសបារាំង។
ជាប្រទេសមួយ ដែលល្បីល្បាញខាងផ្នែកស្រាវជ្រាវវេជ្ជសាស្រ្ត បារាំងពឹងផ្អែកខ្លាំងលើការនាំចូលថ្នាំពីបរទេស។ ៦០ ទៅ៨០%នៃថ្នាំដែលមានលក់នៅទីផ្សារបារាំង នាំចូលពីបរទេស ដែលនៅក្នុងនោះ មានចិន និងឥណ្ឌា ដែលបារាំងត្រូវការសម្រាប់ផលិតថ្នាំសំខាន់ៗ ដូចជាថ្នាំផ្សះ និងថ្នាំសណ្តំ។ ការសិក្សារបស់ទីភ្នាក់ងារFrance Assos Santé កាលពីខែមីនា កន្លងទៅបង្ហាញថា ប្រជាជនបារាំង ៣៧%កំពុងប្រឈមនឹងដាច់ថ្នាំ នៅតាមឱសថស្ថាន៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ