អ.ស.ប. ៖ ចំនួនជនភៀសខ្លួននៅលើពិភពលោកកើនឡើងច្រើនបំផុតមិនធ្លាប់មាន
គិតត្រឹមខែឧសភា២០២៣ ចំនួនជនភៀសខ្លួន ដែលបានបង្ខំចិត្តចាកចេញពីផ្ទះសម្បែង កើនឡើងដល់១១០លាននាក់។ នេះបើតាមរបាយការណ៍ប្រចាំឆ្នាំ របស់ឧត្តមស្នងការអង្គការសហប្រជាជាតិដើម្បីជនភៀសខ្លួន ចេញផ្សាយ នៅថ្ងៃពុធទី ១៤ មិថុនា ដោយបញ្ជាក់ថា ជាចំនួនដ៏ច្រើនបំផុតមិនធ្លាប់មានពីមុនមកទេ។
ចុះផ្សាយនៅថ្ងៃ៖
ស្តាប់ - ០២:៣២
នៅចុងឆ្នាំ២០២២ ជនភៀសខ្លួនឬជនធ្វើបំលាស់ទី នៅលើពិភពលោក មានចំនួន ១០៨,៤លាននាក់ ត្រូវជាកំណើន១៩,១លាននាក់ បើប្រៀបទៅនឹងតួលេខកាលពីចុងឆ្នាំ២០២១ និងជាកំណើនដ៏ខ្ពស់ពុំធ្លាប់មានស្រេចទៅហើយ។ ថ្ងៃនេះ គិតត្រឹមខែឧសភា ចំនួនជនភៀសខ្លួននិងជនផ្លាស់ទីសរុប បានឡើងដល់១១០លាននាក់។ នេះបើតាមប្រសាសន៍របស់លោក Filippo Grandi ឧត្តមស្នងការជនភៀសខ្លួនអង្គការសហប្រជាជាតិ (UNHCR) ក្នុងសន្និសីទកាសែតពីទីក្រុងហ្សឺណែវ។
បើតាមឧត្តមស្នងការការពារជនភៀសខ្លួន ជម្លោះប្រដាប់អាវុធក្នុងប្រទេស អំពើហិង្សា អំពើបង្ក្រាបធ្វើបាប និងការរើងអើង បូកផ្សំនឹងហេតុផលជាច្រើនផ្សេងទៀតដូចជាផលវិបាកនៃការប្រែប្រួលអាកាសធាតុ គឺជាដើមហេតុជំរុញឱ្យមានកំណើនជនភៀសខ្លួនតាំងពីឆ្នាំមុនមក ហើយដែកលឡើងច្រើនខ្លាំង(១១០លាននាក់)មិនធ្លាប់ប្រទះ។ សង្គ្រាមនៅស៊ូដង់ បានធ្វើឱ្យស្ថានភាពពិភពលោកឆ្នាំ២០២២ ដែលកំពុងប្រឈមខ្លាំងនឹងវិបត្តិជនភៀសខ្លួនដ៏ហួសហេតុបង្កឡើងដោយសង្គ្រាមឈ្លានពានរុស្ស៊ីលើអ៊ុយក្រែន និងវិបត្តិមនុស្សធម៌នៅអាហ្វហ្កានីស្ថាន កាន់ធ្លាក់ដុនដាបបន្ថែមកាន់តែខ្លាំង។
ជាលម្អិត ក្នុងមួយឆ្នាំ២០២២ មាន៣៥,៣លាននាក់ជាជនភៀសខ្លួន និង៦២,៥លាននាក់ ជាជនធ្វើបំលាស់ទីក្នុងផ្ទៃប្រទេស។ ៥,៤លាននាក់ជាអ្នកបានដាក់ពាក្យសុំសិទ្ធិជ្រកកោន និង ៥,២លាននាក់ទៀត កំពុងត្រូវការការពារពីអន្តរជាតិ។ ជនទាំងអស់នោះ ត្រូវប្រឈមនឹងការបរិយាកាសស្អប់ខ្ពើមគ្រប់ទិសទី។ សម្រាប់លោកឧត្តមស្នងការ Grandi មានតែសហភាពអឺរ៉ុបទេ ដែលហាក់ដូចមានឆន្ទៈត្រឹមត្រូវ ដោយព្យាយាមធ្វើកំណែទម្រង់ប្រព័ន្ធសាមគ្គីភាពរវាងរដ្ឋជាសមាជិកក្នុងការទទួលបន្ទុកជនភៀសខ្លួន។ ប៉ុន្តែគេត្រូវគិតគូរដល់ចរន្តជនភៀសខ្លួន ឱ្យបានមុនពួកគេចេញផ្សងព្រេងដ៏សែនគ្រោះថ្នាក់ដើម្បីបានមកដល់អឺរ៉ុប។ ភៀសខ្លួនមិនមែនជាបទឧក្រិដ្ឋទេ ដូច្នេះមិនត្រូវចាប់ជននេះដាក់ពន្ធនាគារដូចអ្វីផែនការអង់គ្លេសឡើ។ នេះជាការថ្ងូចថ្ងូររបស់លោកGrandi ដែលក៏សម្តែងការព្រួយបារម្ភខ្លាំងដែរចំពោះនយោបាយអន្តោប្រវេសន៍របស់សហរដ្ឋអាមេរិក។
ជាចុងក្រោយ បើតាមលោកGrandi ស្ថាប័នការពារជនភៀសខ្លួនផ្ទាល់ ក៏មានស្ថានភាពមិនល្អដែរ។ ដូចជាអង្គការមនុស្សធម៌ផ្សេងទៀត ស្ថាប័នមានស្ថានភាពហិរញ្ញវត្ថុយ៉ាប់យឺនខ្លាំង។ ដោយហេតុតែស្ថានភាពសេដ្ឋកិច្ចពិភពលោកនិងអតិផរណា ជំនួយ-អំណោយហិរញ្ញវត្ថុក៏ខ្សត់៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ