ក្រិក៖ លិចទូកដឹកជនភៀសខ្លួន មនុស្សស្លាប់ជិត៨០នាក់ ហើយបាត់ខ្លួន រាប់រយនាក់
សាកសពមនុស្ស យ៉ាងហោច ៧៨ នាក់ បានរកឃើញ បន្ទាប់ពីព្រឹត្តិការណ៍លិចទូកជនភៀសខ្លួននៅក្រិក កាលពីថ្ងៃពុធ ទី១៤មិថុនា។ អ្នកនាំពាក្យរដ្ឋាភិបាលក្រិក Ilias Siakantaris បានលើកឡើងប្រាប់អ្នកកាសែត ថា ទូកលិចនោះ ប្រហែលជាផ្ទុកមនុស្ស ជាង ៧៥០ នាក់។ តុល្យការបឋម ជនភៀសខ្លួន ប្រមាណ១២០នាក់ នៅរស់រានមានជីវិត ប៉ុន្តែ ចំនួនអ្នកបាត់ខ្លួន នៅមានចំនួនច្រើនសន្ធឹកណាស់ ហើយ អាជ្ញាធរក្រិច គ្មានសង្ឃឹមថា នឹងរកឃើញមនុស្សនៅរស់ នោះឡើយ។
ចុះផ្សាយនៅថ្ងៃ៖
ស្តាប់ - ០២:៣៩
ក្នុងចំណោមជនបាត់ខ្លួននៅក្នុងសមុទ្រ គឺមានក្មេងប្រុសម្នាក់ ពិការភ្នែកអាយុ ១៥ ដែលធ្វើដំណើរជាមួយបងស្រី។ ពូរបស់ពួកគេ ប្រាប់អ្នកកាសែតពីប្រទេសស៊ីរី ទៅថា ក្មួយប្រុសពិការភ្នែកនេះ អត់ចេះហែលទឹកទេ។ ក្រុមជនរងគ្រោះលិចទូក ភាគច្រើនជាជនជាតិស៊ីរី និង បានធ្វើដំណើរចេញពីប្រទេសស៊ីរី គេចចេញពីតំបន់សង្គ្រាម ឆ្លងចូលទៅប្រទេសលីប៊ី បន្តទៅ លីបង់ ហ្សកដានី អារ៉ាប៊ីសាអូឌីត និង អឺរ៉ុប។ នេះបើតាមប្រភពពីក្រុមគ្រួសារជនរងគ្រោះនិងអង្គការការពារសិទ្ធិជនភៀសខ្លួន ដែលទីភ្នាក់ងារព័ត៌មានបារាំងអាអែហ្វប៉េ សម្ភាសបាន ។
មុនហេតុការណ៍លិចទូក ១ថ្ងៃ គឺអង្គការ Frontex ភ្នាក់ងារការពារព្រំដែននិងឃ្លាំមើលលំហូរជនភៀសខ្លួននៅអឺរ៉ុប បានផ្តល់សញ្ញាទៅ ពួកឆ្មាំសមុទ្រក្រិក ឲ្យដឹងថា មានជនអន្តោប្រវេសន៍ ជិះទូកចូលកៀកក្បែរប្រទេសក្រិចហើយ។ ទន្ទឹមនឹងគ្នានេះ សកម្មជនម្នាក់ ដែលស្មគ្រចិត្តខាងជួយជនភៀសខ្លួន ឈ្មោះ Nawal Soufi បានទទួលជ្រាបដំណឹងពីប្រទេសលីប៊ីមក ថា ទូកជនភៀសខ្លួននោះ មានមនុស្សយ៉ាង ហោច ៧៥០នាក់ ហើយរូបគេបានទទូចឲ្យអាជ្ញាធរឆាប់ជួយសង្គ្រោះជាបន្ទាន់។ ផ្ទុយទៅវិញ អាជ្ញាធរដែនសមុទ្រក្រិក បានទទួលការផ្តល់ដំណឹងដែរ ប៉ុន្តែ ហាក់ពុំបានធ្វើប្រតិបត្តិសង្គ្រោះអ្វីមួយ ឲ្យទាន់ពេលវេលាឡើយ។
ទោះយ៉ាងនេះក្តី បើតាមអាជ្ញាធរសមុទ្រក្រិក គឺមាន ទូកអ្នកនេសាទក្រិក និង ទូកដឹកទំនិញ ដែលបានជួបប្រាស្រ័យនឹង ទូកដឹកជនភៀសខ្លួននោះ ដែរ។ ក្រុមអ្នកនេសាទ បានស្នើជួយអាសាដែរ ប៉ុន្តែ មនុស្សនៅលើទូកជនភៀសខ្លួន បានឆ្លើយថា កុំឲ្យជួយ ព្រោះគោលដៅរបស់ពួកគេ គឺចង់បន្តឆ្ពោះទៅប្រទេសអ៊ីតាលីឯណោះ។
អង្គការសង្គមស៊ីវិល និងក្រុមអ្នកការពារសិទ្ធិជនភៀសខ្លួន បានបន្ទោសអាជ្ញាធរក្រិក ដែលពុំចេញចំណាត់ការជួយសង្គ្រោះជនភៀសខ្លួនទាំងនោះ ឲ្យទាន់ពេលវេលា។ អ្នកជំនាញសង្កត់ធ្ងន់ថា ក្នុងករណីណាក្តី អាជ្ញាធរក្រិក ចាំបាច់ត្រូវសង្គ្រោះ ព្រោះស្ថានភាពពួកគេទាំងនោះ ប្រឈមមុខនឹងសេចក្តីស្លាប់ខ្លាំងសម្បើមណាស់។
ជាមួយគ្នានេះដែរ អ្នកនាំពាក្យឧត្តមស្នងការសិទ្ធិមនុស្សរបស់អង្គការសហប្រជាតិ Jeremy Laurence គូសបង្ហាញថា ករណីគ្រោះថ្នាក់លិចទូកជនភៀសខ្លួននេះ ចាំបាច់ត្រូវតែបើកការស៊ើបអង្កេតស៊ីជម្រៅ ឈានទៅដល់ការយល់ព្រឹត្តិការណ៍សោកនាដកម្មឲ្យបានច្បាស់លាស់ និងជៀសវាងហេតុការគ្រោះថ្នាក់បែបនេះ កើតមានជាថ្មី ហើយនិងទាញបទពិសោធទុកជាមេរៀន និងទុកជាចំណាត់ការទៅថ្ងៃមុខ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ