ប្រជាជនស្វ៊ីស បោះឆ្នោតគាំទ្រច្បាប់ កំណត់កម្មវត្ថុអព្យាក្រិត្យភាពកាបូននៅឆ្នាំ២០៥០
កាលពីថ្ងៃអាទិត្យ ទី១៨មិថុនា ប្រជាជនស្វ៊ីសបានបោះឆ្នោតប្រជាមតិ គាំទ្រក្នុងសំឡេងភាគច្រើន ទៅលើច្បាប់ដែលកំណត់កម្មវត្ថុអព្យាក្រិត្យភាពកាបូន នៅរវាងឆ្នាំ២០៥០។ ទោះយ៉ាងណា ច្បាប់ថ្មីនេះ មិនបានកំណត់ជាការហាមឃាត់ទេ តែគ្រាន់តែកំណត់នូវយន្តការនានា ដើម្បីជំរុញឲ្យប្រទេសស្វ៊ីស ឈប់ប្រើបន្តិចម្តងៗ នូវប្រភពថាមពលដែលបញ្ចេញឧស្ម័នកាបូនិកទៅក្នុងបរិយាកាស។
ចុះផ្សាយនៅថ្ងៃ៖
ស្តាប់ - ០២:៣២
គណបក្សស្តាំនិយម UDC ដែលជាបក្សធំជាងគេបង្អស់នៅស្វ៊ីស បានធ្វើការឃោសនាប្រឆាំងនឹងច្បាប់អន្តរកម្មថាមពល ដោយលើកឡើងថា វានឹងធ្វើឲ្យប៉ះពាល់ដល់វិស័យផលិតចរន្តអគ្គិសនី ហើយប្រជាជនស្វ៊ីសអាចនឹងប្រឈមនឹងបញ្ហាគ្មានអគ្គិសនីគ្រប់គ្រាន់ប្រើ នៅរដូវរងារធ្លាក់ទឹកកក ឬមួយក៏តម្លៃចរន្តអគ្គិសនីនឹងឡើងថ្លៃខ្លាំងជាដើម។ យ៉ាងណាក៏ដោយ ការឃោសនាបំភ័យទាំងនេះ មិនបានធ្វើឲ្យប្រជាជនស្វ៊ីសភាគច្រើនគាំទ្រទេ ដោយលទ្ធផលប្រជាមតិបង្ហាញថា សម្លេងឆ្នោតគាំទ្រការធ្វើអន្តរកម្មថាមពល ឈានទៅប្រើថាមពលស្អាតស្អំ មានចំនួន ៥៧%។
សូមបញ្ជាក់ថា ច្បាប់ថ្មីនេះមិនបានកំណត់ហាមឃាត់ការប្រើប្រាស់ថាមពលបញ្ចេញឧស្ម័នកាបូនិក ដូចជាប្រេងឥន្ធនៈ ឬឧស្ម័នធម្មជាតិនោះទេ។ តែច្បាប់នេះ នឹងដាក់ចុះនូវវិធានការមួយចំនួន ដើម្បីជំរុញវិស័យថាមពល ឲ្យងាកចេញពីប្រភពថាមពលដែលមិនស្អាតស្អំ។ ដើម្បីសម្រេចកម្មវត្ថុអព្យាក្រិត្យភាពកាបូនឆ្នាំ២០៥០ ស្វ៊ីសនឹងបង្កើនការផលិតចរន្តអគ្គិសនីបានមកពីថាមពលកកើតឡើងវិញ ដែលមានជាអាទិ៍ ទំនប់វារីអគ្គិសនី និងផ្ទាំងសូឡាជាដើម។
ទន្ទឹមគ្នានេះដែរ រដ្ឋស្វ៊ីសនឹងចំណាយប្រាក់ ចំនួន២០០លានហ្វ្រង់ស្វ៊ីសក្នុងមួយឆ្នាំ ក្នុងរយៈពេល១០ឆ្នាំ ដើម្បីជំរុញលើកទឹកចិត្ត ជួយប្រជាជនស្វ៊ីស ឲ្យងាកមកប្រើម៉ាស៊ីនកំដៅ ដែលគោរពក្រិត្យក្រមបរិស្ថាន។ ក្រុមហ៊ុនឧស្សាហកម្មដែលស្រាវជ្រាវ រកឃើញវិធីសាស្ត្រ ឬផលិតផលបច្ចេកវិទ្យា ដែលអាចទប់ស្កាត់កុំឲ្យមានឧស្ម័នកាបូនិក អណ្តែតចូលបរិយាកាស ក៏នឹងអាចទទួលបាននូវថវិកាឧបត្ថម្ភដែរ។
គួរបញ្ជាក់ថា ស្វ៊ីសគឺជាប្រទេសសំបូរទៅដោយភ្នំ និងមានអាកាសធាតុត្រជាក់ ដែលតម្រូវឲ្យប្រើប្រាស់ចរន្តអគ្គិសនីច្រើន។ ចរន្តអគ្គីសនីស្វ៊ីសរំពឹងយ៉ាងខ្លាំង ទៅលើថាមពលនុយក្លេអ៊ែររបស់បារាំង ព្រមទាំងធ្យូងថ្មទិញពីអាល្លឺម៉ង់។ បញ្ហាថាមពលជាទូទៅ គឺជាចំណុចរសើបមួយសម្រាប់ស្វ៊ីស ដែលបច្ចុប្បន្ននាំចូលប្រេង និងឧស្ម័នប្រមាណជា៧៥% នៃតម្រូវការប្រើប្រាស់ក្នុងស្រុក។ តែយ៉ាងណា ប្រជាជនស្វ៊ីសបានឃើញច្បាស់នឹងផ្នែក អំពីផលវិបាកនៃវិបត្តិអាកាស ការកើនឡើងកំដៅផែនដី ដែលកំពុងគំរាមផ្ទាំងទឹកកកនៅលើភ្នំរបស់ស្វ៊ីស។ ទេសភាពភ្នំទឹកកកសក្បុស ដែលគេតែងតែឃើញនៅស្វ៊ីស ត្រូវបានអ្នកជំនាញព្រមានថា អាចនឹងមានសល់តែក្នុងរូបថតតែប៉ុណ្ណោះ ប្រសិនបើគ្មានវិធានការដោះស្រាយទេនោះ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ