គ្រោះថ្នាក់ផ្ទុះ រលំបាក់អគារមួយកណ្តាលក្រុងប៉ារីស របួសធ្ងន់ស្រាលជាង៣០នាក់
កាលពីរសៀលថ្ងៃពុធ ទី២១មិថុនា មានគ្រោះថ្នាក់ផ្ទុះនៅអគារមួយ កណ្តាលទីក្រុងប៉ារីស បណ្តាលឲ្យមានអគ្គីភ័យ និងបាក់រលំអគារ។ យ៉ាងហោចណាស់ មានមនុស្សរបួសធ្ងន់ស្រាល ជាង៣០នាក់។ យោងតាមការសង្ស័យ ហេតុការណ៍នេះ អាចបណ្តាលមកពីការផ្ទុះបណ្តាញបំពង់ឧស្ម័ន។
ចុះផ្សាយនៅថ្ងៃ៖
ស្តាប់ - ០២:០៥
ហេតុការណ៍បានកើតឡើង នៅវេលាម៉ោងប្រមាណជិត៥ល្ងាច នៅអគារបុរាណមួយ ស្ថិតលើវិថី Saint Jacques ក្នុងសង្កាត់លេខ៥ ទីក្រុងប៉ារីស ជាប់នឹងរបងព្រះវិហារកាតូលិក Notre-Dame de Val-de-Grâce។ អគារដែលរងគ្រោះដោយករណីផ្ទុះដ៏កក្រើកនេះ គឺជាទីតាំងសាលារៀនច្នៃម៉ូដឯកជនមួយ ឈ្មោះ Paris American Academy។
សាក្សីជាច្រើនបានអះអាងថា សំឡេងផ្ទះបានលាន់ឮខ្លាំង ប្រៀបបាននឹងការទម្លាក់គ្រាប់បែក នឹងបានធ្វើឲ្យរញ្ជួយដល់អាគារក្បែរនោះ។ កម្លាំងផ្ទុះ បានរុញបំបែកកញ្ចក់អគារជាច្រើនដែលស្ថិតនៅជុំវិញនោះដែរ។ ភ្លាមៗក្រោយក្រោយហេតុការណ៍នេះ សំឡេងស៊ីរ៉ែន ឡានទឹក និងរថយន្តសង្គ្រោះ បានបន្លឺកងរំពងសឹងពេញទីក្រុងប៉ារីស។ ក្រុមពន្លត់អគ្គីភ័យចំនួន ២៧០នាក់ ជាមួយនឹងរថយន្តសង្គ្រោះប្រមាណ៧០គ្រឿង បានទៅដល់កន្លែងកើតហេតុ។
ក្រោមកម្លាំងផ្ទុះ និងអគ្គីភ័យ អគារបុរាណរងគ្រោះ បានបាក់រលំដល់ដីទាំងស្រុង។ យ៉ាងហោចណាស់ មានមនុស្សរបួសធ្ងន់ស្រាល ចំនួន៣៣នាក់ និងមាន១នាក់ បាត់ខ្លួនមិនទាន់រកឃើញនៅឡើយ គិតត្រឹមព្រឹកថ្ងៃព្រហស្បតិ៍ទី២២មិថុនា។ យោងតាមសមត្ថកិច្ចបារាំង គេបានពន្លត់អគ្គីភ័យមិនឲ្យឆាបឆេះ ទៅអគារផ្សេងទៀត តែដោយឡែកអាគារដែលស្ថិតនៅជាប់និងអគារកើតហេតុ បានរងការប៉ះទង្គិចខ្លាំងដោយកម្លាំងផ្ទុះ ដែលតម្រូវឲ្យគេជម្លៀសមនុស្សជាច្រើនគ្រួសារ ដែលរស់នៅក្នុងអគារនោះ ទៅរកទីកន្លែងស្នាក់នៅបណ្តោះអាសន្ន។
ផ្អែកតាមតាមសាក្សីម្នាក់ស្ថិតនៅអាគារក្បែរនោះ គឺមុនពេលកើតហេតុប៉ុន្មាននាទី គេបានធុំក្លិនឧស្ម័នហ្កាសសាយភាយយ៉ាងចម្លែក។ ក្នុងពេលដែលស្រ្តីម្នាក់ កំពុងតែចុចលេខទូរស័ព្ទ ហៅក្រុមជំនាញមកពិនិត្យមែល ស្រាប់តែសំឡេងផ្ទុះបានបន្លឺកក្រើកឡើងតែម្តង។ លោកស្រី Laure Beccuauរដ្ឋអាជ្ញាអមតុលាការក្រុងប៉ារីស បានបញ្ជាក់ឲ្យដឹងថា យោងតាមធាតុផ្សំនានា គឺករណីនេះ ទំនងជាអាចបណ្តាលមកពី ការផ្ទុះបណ្តាញបំពង់ឧស្ម័ន។ សមត្ថកិច្ចបានបើកការស៊ើបអង្កេត ស្តីពីករណី “បង្ករបួសស្នាមដោយអចេតនា ដោយការធ្វេសប្រហែស ចំពោះកាតព្វកិច្ចសន្តិសុខសុវត្ថិភាព” ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ