បារាំងសាកល្បង យានសំកាំងល្បឿនអ៊ីពែរសូនិក ជាលើកដំបូង
បារាំងកំពុងតែឈានជើង ចូលក្នុងការប្រកួតប្រជែងអាវុធអ៊ីពែរសូនិក។ យោងតាមប្រភពពីក្រសួងការពារជាតិបារាំង កាលពីថ្ងៃចន្ទដើមសប្តាហ៍នេះ គឺបារាំងបានធ្វើការសាកល្បង បង្ហោះយានសំកាំងអ៊ីពែរសូនិក ជាលើកដំបូងបង្អស់ ដែលអាចហោះសំកាំង ក្នុងល្បឿនជាង៦ពាន់គីឡូម៉ែត្រ ក្នុងមួយម៉ោង។ ជាការហោះសាកល្បង ក្នុងទិសដៅប្រមូលទិន្នន័យ ស្តីពីភាពគួរឲ្យទុកចិត្ត នៃបច្ចេកវិទ្យាទំនើប ដែលគេប្រើនៅក្នុងយានដ៏លឿនបំផុតមួយនេះ។
ចុះផ្សាយនៅថ្ងៃ៖
ស្តាប់ - ០៣:១២
ផ្អែកតាមទីភ្នាក់ងារព័ត៌មានបារាំង AFP ដែលស្រង់ប្រភពពីអគ្គនាយកដ្ឋានគ្រឿងសព្វាវុធបារាំង DGA គឺបារាំងបានដាក់លិខិតជូនដំណឹង ទៅកាន់សមត្ថកិច្ចគ្រប់គ្រងចរាចរណ៍ផ្លូវសមុទ្រអន្តរជាតិ ព្រមទាំងផ្លូវអាកាសផង ដើម្បីបើកផ្លូវចំងាយប្រមាណ២០០០គីឡូម៉ែត្រ នៅខាងលើលំហនៃមហាសមុទ្រអាត្លង់ទិក ដើម្បីធ្វើការសាកល្បងយានអ៊ីពែរសូនិក ចន្លោះពីថ្ងៃទី២៦ ដល់ថ្ងៃទី៣០មិថុនា។ ការបង្ហោះសាកល្បងយានគម្រូនេះ ត្រូវបានធ្វើកាលពីល្ងាចថ្ងៃចន្ទ ទី២៦មិថុនា នៅឯមូលដ្ឋានអាកាស Biscarosse ភាគនិរតីបារាំង ដោយគេបានប្រើយានទម្រមួយ ហោះនាំវាឡើងទៅលើ ហើយបន្ទាប់មកព្រលែងវាឲ្យហោះសំកាំង ក្នុងល្បឿនអ៊ីពែរសូនិក ពោលគឺដល់ទៅជាង៦០០០គីឡូម៉ែត្រ ក្នុងមួយម៉ោង។
លោករដ្ឋមន្ត្រីក្រសួងការពារជាតិបារាំង បានបញ្ជាក់ថា ក្រុមការងារជំនាញ កំពុងតែប្រមូលទិន្នន័យបានមកពីការហោះសាកល្បងជាលើកដំបូងនេះ ដើម្បីពិនិត្យមើលលើដំណើរការទូទៅ ក៏ដូចជាចំណុចខ្វះខាត នៃបច្ចេកវិទ្យាទំនើបចុងក្រោយបង្អស់ ដែលគេប្រើក្នុងយាននេះ។
សូមរំលឹកថា គម្រោងស្ថាបនាយានអ៊ីពែរសូនិករបស់បារាំងនេះ មានឈ្មោះថា គម្រោង VMaX (Véhicule manœuvrant expérimental) ត្រូវបានផ្តួចផ្តើមឡើងនៅឆ្នាំ២០១៩។ គឺក្រុមហ៊ុន ArianeGroup ដែលជាអ្នកទទួលបន្ទុកស្ថាបនាផលិតយានដំបូងនេះ។ គម្រោងនេះ នឹងនាំបារាំង ឲ្យឈានជើងចូលក្នុងការប្រកួតប្រជែងគ្រឿងសព្វាវុធអ៊ីពែរសូនិក ក្នុងចំណោមមហាអំណាចធំៗសមាជិកក្រុមប្រឹក្សាសន្តិសុខ ដែលមាន ចិន រុស្ស៊ី និងអាមេរិក។ ទន្ទឹមគ្នានេះ បារាំងកំពុងតែធ្វើការសិក្សា អំពីលទ្ធភាពដាក់បញ្ចូលបច្ចេកវិទ្យាអ៊ីពែសូនិក ទៅក្នុងការទំនើបកម្មសព្វាវុធនុយក្លេអ៊ែរកំញើញ ដែលប្រើមីស៊ីលប្រភេទថ្មី ASN4G។
គួរបញ្ជាក់គ្រឿងសព្វាវុធបំពាក់ដោយបច្ចេកវិទ្យាអ៊ីពែរសូនិក មានលក្ខណៈពិសេស ល្អលើសបច្ចេកវិទ្យាបាលីស្ទិក ត្រង់ថា វារត់បានក្នុងយ៉ាងលឿន បូកបន្ថែមជាមួយលទ្ធភាពបញ្ជាពីចំងាយ បត់បែនប្តូរទិសដៅ ធ្វើមិនឲ្យគេអាចដឹងមុនបាន អំពីផ្លូវឆ្លងកាត់។ ផ្អែកតាមអ្នកជំនាញ ក្នុងរយៈពេលហោះប្រមាណជាង១០នាទី សត្រូវអាចមានពេលតែប៉ុន្មានវិនាទីតែប៉ុណ្ណោះ ដើម្បីវាយកម្ទេច។
សូមបញ្ជាក់ដែរថា បច្ចុប្បន្នគេដឹងថា រុស្ស៊ីមានអាវុធមីស៊ីលអ៊ីពែរសូនិក ចំនួនយ៉ាងហោច២ប្រភេទ គឺ Zircon និង Kinjal ដែលលោកពូទីនខ្លួនឯង ធ្លាប់បានអួត កាលពីឆ្នាំ២០១៨ថា គ្មាននរណាអាចចាប់ស្ទាក់កម្ទេចបានទេ។ តែយ៉ាងណា អ៊ុយក្រែនបានអះអាងថា បានបាញ់ស្ទាក់កម្ទេចបានជាច្រើនគ្រឿង។ យោងតាមជម្ឈមណ្ឌលស្រាវជ្រាវនៃសភាខុនហ្ក្រេសអាមេរិក គឺរុស្ស៊ីក៏មានយានសំកាំងអ៊ីពែរសូនិកមួយប្រភេទដែរ ឈ្មោះ Avangard។
ប្រភពដដែលនេះ អះអាងថា ចំណែកចិនវិញ បានសាកល្បងចំនួន៩លើក នូវយានសំកាំងអ៊ីពែរសូនិក ឈ្មោះ DF-ZF គិតចាប់តាំងពីឆ្នាំ២០១៤ ដោយប្រើមីស៊ីលបាលីស្ទីក DF-17 ជាអ្នកបាញ់បង្ហោះឡើង។ ដោយឡែកអាមេរិកបានទទួលស្គាល់ថាខ្លួនកំពុងដើរយឺតក្នុងវិស័យនេះ ហើយបានបញ្ចេញកញ្ចប់ថវិកាចំនួន២២០០លានដុល្លារ កាលពីឆ្នាំ២០២២ ដើម្បីពន្លឿនកម្មវិធីអាវុធអ៊ីពែរសូនិក៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ