កងទ័ពអាកាសបារាំងបញ្ជូនយន្តហោះជាង២០គ្រឿង ទៅតំបន់ឥណ្ឌូប៉ាស៊ីហ្វិក
ចាប់ពីថ្ងៃទី២៥មិថុនា រហូតដល់ថ្ងៃទី៣សីហា កងទ័ពអាកាសបារាំង នឹងបញ្ជូនយន្តហោះចំនួនជាង២០គ្រឿង ធ្វើដំណើរទៅកាន់តំបន់ឥណ្ឌូប៉ាស៊ីហ្វិក ដើម្បីធ្វើហាត់សមផង និងដោះដូរបទពិសោធន៍ ជាមួយប្រទេសជាដៃគូផង។ នេះបើផ្អែកតាមការបញ្ជាក់ ពីក្រសួងការពារជាតិបារាំង កាលពីថ្ងៃពុធម្សិលមិញ។ វត្តមានរបស់កងទ័ពអាកាសបារាំង នៅក្នុងតំបន់នេះ គឺជាផ្នែកមួយនៃចេតនាយុទ្ធសាស្ត្រ របស់លោកប្រធានាធិបតីម៉ាក្រុង ដែលចង់ឲ្យបារាំង ក្លាយជាជម្រើសកណ្តាល រវាងអាមេរិក និងចិន សម្រាប់ប្រទេសនៅក្នុងតំបន់ឥណ្ឌូប៉ាស៊ីហ្វិក។
ចុះផ្សាយនៅថ្ងៃ៖
ស្តាប់ - ០២:៣០
បេសកកម្មនេះមានឈ្មោះ Pégase 23 ដែលមានការចូលរួមវត្តមាន ដោយកងទ័ពជំនាញបើកយន្តហោះ ចំនួន៣២០នាក់ អមដោយទំនិញសម្ភារៈចំនួន ៥៥តោន យន្តហោះចម្បាំងប្រភេទ Rafale ចំនួន១០គ្រឿង យន្តហោះដឹកសម្ភារៈកងទ័ព ប្រភេទ A330 MRTT Phénix ៥គ្រឿង និងប្រភេទ A400M ៤គ្រឿង។ ក្រុមការងារបេសកកម្មនេះ នឹងចុះចតចំនួន១១ដង នៅតាមប្រទេសដៃគូ ចំនួន១០ប្រទេស និងផ្លាស់ប្តូរបទពិសោធន៍ ជាមួយកងទ័ពចំនួន១៤ប្រទេស។
បន្ទាប់ពីចុះចតបច្ចេកទេស នៅមូលដ្ឋានទ័ពបារាំង នៅអេមីរ៉ាតអារ៉ាប់រួម បេសកកម្មនេះនឹងបន្ត ទៅចូលរួមក្នុងសមយុទ្ធយោធា នៅឯកោះ Guam និងកោះ Hawaï នៅដើមខែកក្កដា មុននឹងបន្តដំណើរទៅកាន់ ដែនដីនាយសមុទ្ររបស់បារាំង កណ្តាលមហាសាគរប៉ាស៊ីហ្វិក គឺ តំបន់ Nouvelle-Calédonie និង Polynésie française។ ចេញដំណើរត្រលប់មកវិញ ចាប់ពីថ្ងៃទី២៤កក្កដា ដល់ថ្ងៃទី៣សីហា បេសកកម្មទ័ពអាកាសបារាំង នឹងចុះចតនៅកូរ៉េខាងត្បូង នៅជប៉ុន ឥណ្ឌូណេស៊ី កាតា និងជីប៊ូទី។ ក្នុងពេលចុះចតទាំងនេះ នឹងមានការ ហាត់សមរួមគ្នា ព្រមទាំងការជួបជជែក ដោះដូរបទពិសោធន៍ការងារ ទាក់ទិននឹងវិស័យអវកាស អន្តរាគមន៍មនុស្សធម៌ នឹងការគ្រប់គ្រងគ្រោះមហន្តរាយជាដើម។
សូមបញ្ជាក់ថា តំបន់ឥណ្ឌូប៉ាស៊ីហ្វិក កំពុងតែក្លាយជាទីប្រជែងឥទ្ធិពល ខ្លាំងទៅៗ រវាងចិន និង សហរដ្ឋអាមេរិក។ អាមេរិក អង់គ្លេស និងអូស្ត្រាលី បានរួមកម្លាំងគ្នាបង្កើតសម្ព័ន្ធភាព AUKUS ដើម្បីការពារសន្តិសុខតំបន់នេះ ទប់ទល់នឹងការគំរាមរបស់ចិន។ គឺសម្ព័ន្ធភាពនេះហើយ ដែលបានប្លន់កិច្ចសន្យាលក់នាវាបាតសមុទ្ររបស់បារាំងទៅឲ្យអូស្ត្រាលី កាលពីខែកញ្ញាឆ្នាំ២០២១។
នៅក្រោយការខកចិត្តនេះ លោកប្រធានាធិបតីបារាំង អេម៉ានុយអែល ម៉ាក្រុង បានប្រកាសអំពីគោលគំនិតយុទ្ធសាស្ត្រការបរទេសថ្មី ដើម្បីធ្វើយ៉ាងណា ឲ្យបារាំងមានវត្តមាននៅក្នុងតំបន់ឥណ្ឌូប៉ាស៊ីហ្វិកដ៏ធំល្វឹងល្វើយ ដោយរាប់ពីមហាសមុទ្រឥណ្ឌា ដល់មហាសមុទ្រប៉ាស៊ីហ្វិក។ ក្នុងនាម ជាមហាអំណាច ដែលមានដែនទឹកធំជាងគេបង្អស់លំដាប់ទី២ បារាំងមានដែនសមុទ្រផ្តាច់មុខ មួយផ្នែកធំនៅក្នុងតំបន់ឥណ្ឌូប៉ាស៊ីហ្វិក ជាទីដែលមានប្រជាជនបារាំង រស់នៅ ប្រមាណ ១,៦៥លាននាក់។ កត្តាទាំងនេះ បញ្ជាក់ពីភាពស្របច្បាប់ នៃវត្តមានរបស់កងទ័ពបារាំងនៅក្នុងតំបន់នេះ ក្នុងនាមជាមហាអំណាចតំណាងឲ្យតុល្យភាព ជាជាងការជ្រើសរើសយកខាងអាមេរិក ឬ ខាងចិន៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ