បារាំង៖ រដ្ឋអាជ្ញាសម្រេចឃុំខ្លួនបណ្តោះអាសន្នមន្ត្រីនគរបាល ដែលបានបាញ់ស្លាប់យុវជនអាយុ១៧ឆ្នាំឈ្មោះNahel
២ថ្ងៃក្រោយករណីស្លាប់ក្មេងជំទង់អាយុ១៧ឆ្នាំ ឈ្មោះ ណាហ៊ែល (Nahel) ដែលត្រូវបាននរគបាលបារាំងបាញ់ស្លាប់ នៅជាយខាងលិចទីក្រុងបារីស ក្រុមគ្រួសារជនរងគ្រោះ បានរៀបចំក្បួនដង្ហែរមួយដ៏ធំ កាលពីរសៀលថ្ងៃព្រហស្បតិ៍ម្សិលមិញ ដើម្បីទាមទារយុត្តិធម៌ជូនយុវជនរូបនេះ។ ក្បួនដង្ហែរដែលមានមនុស្សចូលរួមជាច្រើនពាន់នាក់នេះ មានអមទៅដោយផ្ទាំងបដាក្រណាត់ពណ៌ស សរសេរថា “យុត្តិធម៌ដើម្បីណាហ៊ែល”។
ចុះផ្សាយនៅថ្ងៃ៖
សូមបញ្ជាក់ថា ក្រោយករណីស្លាប់យុវជនឈ្មោះ ណាហ៊ែល បាតុកម្មហិង្សាបានផ្ទុះឆេះនៅសឹងទូទាំងប្រទេស ៣ថ្ងៃជាប់គ្នាមកហើយ ដោយក្រុមបាតុករហិង្សា លាយឡំនិងក្រុមជនអន្ធពាលផង បានដុតបំផ្លាញរថយន្ត បង្កអគ្គីភ័យឆាបឆេះ និងបានវាយបំផ្លាញទ្រព្យសម្បតិ្តសាធារណៈ យ៉ាងអនាធិបតេយ្យបំផុត។ កំហិងក្រេវក្រោធ ដែលបានផុសផុលឡើង ជាមួយពាក្យចោទស្តីបន្ទោស ថា “នគរបាលបារាំងកាន់តែហិង្សា ប្រើអាវុធបាញ់សម្លាប់ប្រជាពលរដ្ឋ”។
ដោយឡែក កាលពីថ្ងៃព្រហស្បតិ៍ម្សិលមិញដែរ រដ្ឋអាជ្ញាបារាំង បានធ្វើសន្និសីទកាសែត ដោយបានលើកឡើងថា ក្នុងពេលកើតហេតុ គឺមិនមានលក្ខខណ្ឌគ្រប់គ្រាន់ អនុញ្ញាតឲ្យមន្ត្រីនគរបាលខ្មាន់កាំភ្លើង ប្រើប្រាស់អាវុធនោះទេ។ រដ្ឋអាជ្ញា បានសម្រេចបញ្ជូនខ្លួនមន្ត្រីនគរបាលរូបនេះ យកទៅដាក់ឃុំបណ្តោះអាសន្ន ដើម្បីរងចាំការចោទប្រកាន់ជាផ្លូវការ ពីបទ “មនុស្សឃាតដោយចេតនា” ។
សម្រង់សំដីរបស់លោក Pascal Prache រដ្ឋអាជ្ញាអមតុលាការ តំបន់Nanterre ថ្លែងក្នុងសន្និសីទកាសែត ថ្ងៃទី២៩មិថុនា២០២៣
“ឆ្លងកាត់ការស៊ើបអង្កេត ព្រមទាំងព័ត៌មានលំអិតនៃអង្គហេតុ រដ្ឋអាជ្ញាយល់ឃើញថា លក្ខខណ្ឌដែលអនុញ្ញាតឲ្យប្រើប្រាស់អាវុធ គឺមិនមានគ្រប់គ្រាន់ទេ។
ដោយហេតុនេះ បន្ទាប់ពីចប់នីតិវិធីឃាត់ខ្លួន មន្ត្រីនរគបាលដែលជាប់ចោទថាបានប្រើប្រាស់អាវុធនោះ នឹងត្រូវបញ្ជូនខ្លួន ទៅចំពោះមុខចៅក្រមចោទប្រកាន់ចំនួន២រូប ក្នុងក្របខណ្ឌនៃការឈានទៅចោទប្រកាន់ជននេះជាផ្លូវការ ពីបទ “មនុស្សឃាតដោយចេតនា”។
ដោយយោងទៅលើអង្គហេតុ ព្រមទាំងភាពចាំបាច់ដល់ការការពារការស៊ើបអង្កេតនេះ ស្ថាប័នរដ្ឋអាជ្ញា សូមសម្រេច បញ្ជូនខ្លួនមន្ត្រីនគរបាល ដែលជាអ្នកបានបាញ់គ្រាប់កាំភ្លើង យកទៅដាក់ឃុំបណ្តោះអាសន្ន។”
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ