អំពើហិង្សាផ្ទុះសឹងពាសពេញបារាំង នៅយប់ថ្ងៃទី២ក្រោយយុវជនNahel ត្រូវនគរបាលបាញ់
នៅបារាំង អំពើហិង្សាអនាធិបតេយ្យ ដុតរថយន្ត និងវាយបំផ្លាញទ្រព្យសម្បត្តិសាធារណៈ បានបន្តកក្រើកឡើងយ៉ាងខ្លាំង សឹងទូទាំងប្រទេស កាលពីយប់ថ្ងៃពុធ ឈានចូលថ្ងៃព្រហស្បតិ៍នេះ។ ជាចលនាហិង្សាយ៉ាងកម្រោល ដែលបានផុសផុលឡើង ក្រោយការស្លាប់របស់យុវជនអាយុ១៧ឆ្នាំម្នាក់ ឈ្មោះ Nahel ដែលត្រូវបាននគរបាលបារាំង បាញ់បណ្តាលឲ្យស្លាប់ ក្នុងពេលត្រួតពិនិត្យចរាចរណ៍ កាលពីថ្ងៃអង្គារទី២៧មិថុនា នៅជាយខាងលិចក្រុងប៉ារីស។ រដ្ឋាភិបាលបារាំង បានប្រជុំបន្ទាន់នៅព្រឹកថ្ងៃព្រហស្បតិ៍នេះ ដើម្បីរកវិធានការទប់ស្កាត់បាតុកម្មហិង្សាដ៏គ្រោះថ្នាក់នេះ។
ចុះផ្សាយនៅថ្ងៃ៖
ស្តាប់ - ០២:៤៧
យោងតាមលោករដ្ឋមន្ត្រីក្រសួងមហាផ្ទៃបារាំង យ៉ាងហោងណាស់ មានបាតុករហិង្សាចំនួន១៥០នាក់ ត្រូវបានចាប់ខ្លួន ក្នុងយប់ថ្ងៃពុធ ឈានចូលថ្ងៃព្រហស្បតិ៍។ បាតុកម្មចលាចលហិង្សា បានដុតយ៉ាងកក្រើកនៅក្នុងទីក្រុងប៉ារីស និងជាពិសេសជាយទីក្រុង សឹងតែគ្រប់ទីកន្លែង។ រថយន្តឯកជន រថយន្តក្រុង ជម្រកស្ថានីយ៍រថយន្តក្រុង ជាច្រើនទីតាំង ត្រូវបានដុតបំផ្លាញ។ ក្រុមបាតុករហិង្សា បានវាយបំផ្លាញអគារស្នងការដ្ឋាននគរបាលសង្កាត់ និងសាលារៀនជាដើម។
សាលាឃុំ សាលាក្រុងជាច្រើនកន្លែង បានរងនូវការវាយបំផ្លាញ និងត្រូវឆាបឆេះដោយអគ្គីភ័យ បង្កឡើយដោយការគុបភ្លើងកាំជ្រួចរបស់ពួកបាតុករ។ ទីតាំងយាមសន្តិសុខ នៅមន្ទីរឃុំឃាំងដ៏ធំមួយជាយក្រុងប៉ារីស ក៏ត្រូវបានក្រុមជនបិទមុខ ចូលមកវាយដុតបំផ្លាញដែរ។ នៅសង្កាត់Clamart ជាយខាងត្បូងក្រុងប៉ារីស ក្រុមបាតុករបានដុតបំផ្លាញ យានត្រាំវ៉ាមួយខ្សែ។ ចលនាបាតុកម្មដ៏កម្រោលនេះ បានកើតឡើងនៅតាមទីក្រុងផ្សេងៗទៀត សឹងពាសពេញប្រទេសបារាំង តួយ៉ាង នៅក្រុងរូអង់ នៅទូលូហ្ស និងលីយ៉ុង និងទីក្រុងនីស ជាដើម។ ជនឆក់ឱកាសខ្លះ បានវាយបំផ្លាញហាងទំនិញ និងបានចូលទៅប្រមូលយកទំនិញមានតម្លៃ យ៉ាងអនាធិបតេយ្យបំផុត។
លោកប្រធានាធិបតីម៉ាក្រុង បានថ្លែងថា អំពើហិង្សាដ៏កម្រោលទាំងនេះ គឺជារឿងដែលមិនអាចអត់ឱនឲ្យបានជាដាច់ខាត។ ព្រឹកថ្ងៃព្រហស្បតិ៍ លោកបានកោះប្រជុំបន្ទាន់ ដោះស្រាយវិបត្តិ ជាមួយរដ្ឋមន្ត្រីក្រសួងយុត្តិធម៌ រដ្ឋមន្ត្រីក្រសួងមហាផ្ទៃ ដើម្បីដាក់ចុះនូវវិធានការ ទប់ភ្លើងកំហឹងដ៏កម្រោលនេះ។
សូមបញ្ជាក់ថា ចលនាបាតុកម្មហិង្សាទូទាំងប្រទេសនេះ បានផ្ទុះឡើងបន្ទាប់ពីមានយុវជនម្នាក់ឈ្មោះ Nahel អាយុ១៧ឆ្នាំ ត្រូវបាននគរបាលបាញ់បណ្តាលឲ្យស្លាប់ នៅក្រុង Naterre ជាយខាងលិចក្រុងប៉ារីស ដោយសារយុវជននេះ មិនព្រមឈប់រថយន្តទៅតាមការឃាត់របស់នគរបាល។ ការប្រើប្រាស់អាវុធ ធ្ងន់ហួសប្រមាណរបស់សមត្ថកិច្ចនគរបាល ដែលបានបំផុសឲ្យកក្រើកនូវមតិរិះគន់ ថានគរបាលបារាំងកាន់តែហិង្សាដាក់ប្រជាពលរដ្ឋ។
ព្រឹកថ្ងៃព្រហស្បតិ៍ទី២៩មិថុនានេះ អយ្យការអមតុលាការ ក្រុងNanterre បានប្រកាសថា នឹងបន្តឃុំខ្លួននគរបាលដែលជាអ្នកបាញ់បណ្តាលឲ្យស្លាប់យុវជនឈ្មោះ Nahel។ នគរបាលនេះ កំពុងប្រឈមនឹងបទចោទប្រកាន់ មនុស្សឃាតដោយចេតនា។ ដោយឡែក ម្តាយរបស់ជនរងគ្រោះ បានប្រកាសរៀបចំការដើរក្បួនស្ងាត់ស្ងៀម ក្នុងពេលរសៀលថ្ងៃព្រហស្បតិ៍ ដើម្បីរំលឹកវិញ្ញាណក្ខន្ធ នៅទីតាំងកើតហេតុ។ មានការព្រួយបារម្ភថា បារាំងអាចនឹងឈានចូលទៅក្នុងកាលៈទេសៈ ហិង្សាចលាចលអនាធិបតេយ្យទប់លែងជាប់ ដោយសារតែក្រុមយុវជនក្មេងៗ លាយឡំនឹងក្រុមអន្ធពាលផង ចេញធ្វើសកម្មភាពហិង្សាវាយ ដុតបំផ្លាញទ្រព្យសម្បតិ្តសាធារណៈ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ