សង្គ្រាមអ៊ុយក្រែន ៖ ការិយាល័យអង្កេតបទឧក្រិដ្ឋឈ្លានពានអ៊ុយក្រែនចាប់ដំណើរការ
ការិយាល័យអន្តរជាតិ ទទួលបន្ទុកអង្កេត ទង្វើឈ្លានពានរបស់រុស្ស៊ីលើអ៊ុយក្រែន បានបើកទ្វារនៅថ្ងៃចន្ទទី ៣កក្កដានេះ នៅទីក្រុងឡាអេ ប្រទេសហូឡង់។ ដំណើរការរបស់ការិយល័យអង្កេត អាចចាត់ទុកបានថាជាដំណាក់កាលដំបូង មុននឹងឈានដល់ការបង្កើតតុលាការពិសេស សម្រាប់កាត់ទោសមេដឹកនាំរុស្ស៊ី។
ចុះផ្សាយនៅថ្ងៃ៖
ស្តាប់ - ០១:៥០
ផ្តួចផ្តើមបង្កើតឡើងដោយគណៈកម្មការអឺរ៉ុប ការិយាល័យអន្តរជាតិទទួលបន្ទុកអង្កេតបទឧក្រិដ្ឋឈ្លានពានលើអ៊ុយក្រែន ជាបណ្តុំក្រុមរដ្ឋអាជ្ញាអ៊ុយក្រែន សហភាពអឺរ៉ុប សហរដ្ឋអាមេរិក និងរដ្ឋអាជ្ញានៃតុលាការព្រហ្មទណ្ឌអន្តរជាតិ ហើយមានបេសកកម្មស្រាវជ្រាវ និងប្រមូល ភស្តុតាង។
ជាកិច្ចសម្ពោធ បើកឱ្យដំណើរការ អ្នកទទួលខុសត្រូវជាច្រើនរូប មានជាអាទិ៍ រដ្ឋអាជ្ញារបស់អ៊ុយក្រែន របស់តុលាការព្រហ្មទណ្ឌ និងរដ្ឋអាជ្ញារងអាមេរិក ព្រមទាំងស្នងការយុត្តិធម៌អឺរ៉ុប បានផ្តល់សន្និសីទកាសែត ពីទីស្នាក់ការរបស់ការិយាល័យអង្កេតអឺរ៉ុប ដែលមានទីតាំងនៅក្នុងទីក្រុងឡាអេ ប្រទេសហូឡង់។
ក្រុងកៀវបានដាក់សម្ពាធលើអន្តរជាតិឱ្យបង្កើតតុលាការពិសេស តាំងពីខែមេសាឆ្នាំ២០២២ នៅពេលរកឃើញគំនរសាកសពក្រោយពីវាយបណ្តេញទាហានរុស្ស៊ីចេញពីក្រុងបាក់មូដ ជិតរដ្ឋធានីបានវិញ។ សំឡេងអំពាវនាវឱ្យបង្កើតតុលាការពិសេសកាត់ទោសបទឧក្រិដ្ឋឈ្លានពានក្នុងសង្គ្រាមអ៊ុយក្រែន មានកាន់តែច្រើនឡើងៗ ប៉ុន្តែតុលាការព្រហ្មទណ្ឌអន្តរជាតិ គ្មានសមត្ថកិច្ចទេ ទើបអឺរ៉ុបប្រកាសបង្កើតការិយាល័យអន្តរជាតិនេះឡើង។ វត្តមានរបស់អាមេរិកដែលមិនមែនជាសមាជិករបស់តុលាការព្រហ្មទណ្ឌអន្តរជាតិ បានធ្វើឱ្យការិយាល័យអង្កេតអន្តរជាតិកាន់តែមានទម្ងន់។ ពោលគឺជាស្ថាប័ននេះជាដំណាក់កាលដំបូង មុននឹងឈានទៅដល់ការបង្កើតតុលាការពិសេស សម្រាប់កាត់ទោសមេដឹកនាំជាន់ខ្ពស់រុស្ស៊ី ដែលជាដើមហេតុនាំឱ្យមានសង្គ្រាមនៅអ៊ុយក្រែន។
ប៉ុន្តែចំណោទនៅត្រង់ថាតើត្រូវបង្កើតតុលាការពិសេសយ៉ាងដូចម្តេច ? អ៊ុយក្រែនចង់បានសេចក្តីសម្រេចពីមហាសន្និបាតអង្គការសហប្រជាជាតិ។ ឯក្រុមប្រទេសអ្នកគាំទ្រអ៊ុយក្រែនខ្លះ ព្រួយខ្លាចតែពុំមានការគាំទ្រច្រើនគ្រប់គ្រាន់ពីអន្តរជាតិ និងចង់ត្រឹមបង្កើតតុលាការកូនកាត់ ផ្គុំដោយចៅក្រមអ៊ុយក្រែននិងចៅក្រមជាតិសាសន៍ផ្សេងទៀត៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ