Unicef៖មានស្លាប់កូនក្មេងចំនួន ២៨៩នាក់ដែលឆ្លងកាត់សមុទ្រមេឌីទែរ៉ាណេក្នុងឆ្នាំ ២០២៣
អង្គការ Unicef បានប្រកាសឲ្យដឹងក្នុងថ្ងៃសុក្រ ទី១៤ កក្កដាថា មានស្លាប់កូនក្មេងចំនួន ២៨៩នាក់នៅ ៦ខែដើមឆ្នាំ ២០២៣ ដោយសារតែពួកគេបានព្យាយាមធ្វើដំណើរតាមសមុទ្រមេឌីទែរ៉ាណេទៅកាន់ទឹកដីអឺរ៉ុប។ តាម Unicef ចំនួននេះបានកើនទ្វេដង បើធៀបនឹងរយៈពេលដូចគ្នាក្នុងឆ្នាំ ២០២២។ ដើម្បីបញ្ជៀសការផ្សងព្រេងរបស់កូនក្មេងតាមសមុទ្រមេឌីទែរ៉ាណេ Unicef បានអំពាវនាវឲ្យបង្កើតច្រករបៀងមនុស្សធម៌ដែលមានសុវត្ថិភាពអនុញ្ញាតឱ្យកូនក្មេងស្វែងរកទីជម្រកនៅទឹកដីអឺរ៉ុប។
ចុះផ្សាយនៅថ្ងៃ៖
ស្តាប់ - ០២:១៩
លោកស្រីវេរេណា ខ្នាអូស អ្នកទទួលខុសត្រូវចំពោះជនចំណាកស្រុក និងជនបម្លាស់ទីរបស់អង្គការ Unicef បានថ្លែងថា នៅ ៦ខែដើមឆ្នាំ ២០២៣ នេះ មានកូនក្មេងចំនួន ១១ ៦០០នាក់បានធ្វើដំណើរឆ្លងកាត់សមុទ្រមេឌីទែរ៉ាណេ។ ចំនួននេះបានកើនទ្វេដង បើធៀបនឹងរយៈពេលដូចគ្នាកាលពីឆ្នាំ ២០២២។ ចំណែកអ្នកស្លាប់ដែលមាន ២៨៩នាក់ក៏ជាចំនួនទ្វេដងដែរ បើធៀបនឹងរយៈពេលដូចគ្នាក្នុងឆ្នាំ ២០២២។ តែលោកស្រីវេរេណា ខ្នាអូសមិនភ្លេចបញ្ជាក់ថា តួលេខពិតប្រាកដអាចមានច្រើនជាងនេះ ព្រោះមានការលិចទូក ឬកាណូតជាច្រើននៅសមុទ្រមេឌីទែរ៉ាណេដែលមិនបានកត់ត្រាទុក ឬមួយក៏មិនបានបន្សល់ទុកអ្នកនៅរស់រានមានជីវិត។
តាមអង្គការ Unicef កូនក្មេងចំនួន ៣ ៣០០នាក់ដែលបានធ្វើដំណើរតាមសមុទ្រមេឌីទែរ៉ាណេក្នុងរយៈពេល ៣ខែដើមឆ្នាំ ២០២៣ មិនមានអ្នកអមដំណើរជាមួយ ឬមួយក៏ត្រូវបានបំបែកចេញពីគ្រួសាររបស់ពួកគេ។ ចំនួននេះមាន ៣ដងច្រើនជាង បើធៀបនឹងរយៈពេលដូចគ្នាក្នុងឆ្នាំ ២០២២។ មួយវិញទៀតនៅពេលកំពុងធ្វើដំណើរ កូនក្មេងទាំងនោះអាចប្រឈមនឹងការចាប់ខ្លួន ការធ្វើទារុណកម្ម ការជួញដូរ និងការចាប់រំលោភ ហើយក្មេងស្រីជាអ្នកងាយរងគ្រោះខ្លាំងជាងគេ។ លោកស្រីវេរេណា ខ្នាអូសបានបញ្ជាក់ថា រឿងរ៉ាវទាំងអស់ជាការពិតគួរឲ្យតក់ស្លុត។
តាមអ្នកទទួលខុសត្រូវចំពោះជនចំណាកស្រុក និងជនបម្លាស់ទីរបស់អង្គការ Unicef រូបនេះដដែល កូនក្មេងទាំងនេះមិនមែនកំពុងស្លាប់នៅក្រោមក្រសែភ្នែករបស់យើងប៉ុណ្ណោះទេ តែពួកគេហាក់កំពុងស្លាប់នៅពេលដែលយើងបិទភ្នែកធ្វើជាមិនឃើញទៀតផង។ នៅក្នុងន័យនេះ លោកស្រីវេរេណា ខ្នាអូសបានអំពាវនាវឲ្យពិភពលោកចាត់វិធានការទប់ស្កាត់ជាបន្ទាន់។ អ្វីដែលលោកស្រីវេរេណា ខ្នាអូសចង់បាន គឺការបង្កើតឲ្យមានច្រករបៀងមនុស្សធម៌សុវត្ថិភាពដែលអនុញ្ញាតឲ្យកូនក្មេងស្វែងរកទីជម្រកនៅលើទឹកដីអឺរ៉ុប៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ