ជនអន្តោប្រវេសន៍ជាង៤ម៉ឺននាក់ប្រថុយជីវិតឆ្លងសមុទ្រមរណៈ សំដៅអង់គ្លេសនៅឆ្នាំ ២០២២
ទោះត្រូវប្រថុយជីវិតឆ្លងសមុទ្រមរណៈពីបារាំងទៅអង់គ្លេស និងនយោបាយកាន់តែរឹតបន្តឹងរបស់រដ្ឋាភិបាលអង់គ្លេស ជនអន្តោប្រវេសន៍នៅតែមិនរារែក បោះបង់ចោលគោលដៅរបស់ខ្លួន។ តាមតួលេខរបស់ក្រសួងការពារជាតិអង់គ្លេសដកស្រង់ដោយទីភ្នាក់ងារព័ត៌មានបារាំង AFP នៅក្នុងរយៈពេលមួយឆ្នាំ ២០២២ មនុស្សជាង ៤៥០០០នាក់ប្រើមធ្យោបាយជិះទូកពោងដើម្បីធ្វើដំណើរខុសច្បាប់ចូលទឹកដីអង់គ្លេស។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:៤៥
២០២២ បំបែកឯតទគ្គកម្មជាឆ្នាំដែលសំបូរជនអន្តោប្រវេសន៍ជិះទូកខុសច្បាប់ចូលប្រទេសអង់គ្លេស។ នៅឆ្នាំ ២០២១ ជនអន្តោប្រវេសន៍ដែលធ្វើដំណើរឆ្លងសមុទ្រដោយខុសច្បាប់ចូលអង់គ្លេស មានចំនួន២៨ ៥២៦នាក់ ដែលនេះជាចំនួនដ៏ច្រើនមិនធ្លាប់មាន។ ប៉ុន្តែ នៅឆ្នាំ ២០២២ ចំនួនជនអន្តោប្រវេសន៍ដែលផ្សងគ្រោះថ្នាក់ជិះទូកឆ្លងសមុទ្រមរណៈពីឆ្នេរសមុទ្របារាំង ទៅកាន់ទឹកដីអង់គ្លេសបានកើនឡើងដល់កម្រិតកំពូល ៤៥ ៧៥៦នាក់។
តាមសមាគម និងអង្គការជួយសង្រ្គោះ នៅច្រកសមុទ្រLa Manche ដែលជាព្រំដែនទឹកបារាំង និងអង់គ្លេស ជនអន្តោប្រវេសន៍ដែលប៉ុនប៉ង ឆ្លងដែនខុសច្បាប់ចូលទៅអង់គ្លេស តាមមធ្យោបាយ ទូកពោងមានចំនួនកាន់តែច្រើន។ តាមធម្មតា សកម្មភាពដឹកមនុស្សតាមទូកពោង រមែងកើតមានច្រើននៅពេលមេឃស្រឡះ នៅរដូវក្តៅ ដើម្បីជៀសវាងគ្រោះថ្នាក់លិចក្នុងសមុទ្រ។ ប៉ុន្តែ នៅឆ្នាំ ២០២២ សូម្បីនៅរដូវរងារ ទឹកសមុទ្រត្រជាក់រឹងថ្គាម មេឃស្រអាប់ ពិបាកមើលផ្លូវ គេនៅតែសង្កេតឃើញទូកឈ្មួញលួចដឹកជនអន្តោប្រវេសន៍ខុសច្បាប់សំដៅឆ្នេរអង់គ្លេស។ នៅចុងខែវិច្ឆិកា ជនអន្តោប្រវេសន៍២៧នាក់ ស្លាប់នៅពេលទូកពោងលិចក្នុងសមុទ្រ។ ជនអន្តោប្រវេសន៍បានយកជម្រើសធ្វើដំណើរតាមទូកពោង ជាជម្រើសចុងក្រោយ ដើម្បីលួចឆ្លងដែនខុសច្បាប់ទៅអង់គ្លេស បន្ទាប់ពី អង់គ្លេស និងបារាំងបានរឹតបន្តឹងការត្រួតពិនិត្យ លំហូរជនអន្តោប្រវេសន៍តាមច្រកកំពង់ផែ។
ទប់ស្កាត់លំហូរជនអន្តោប្រវេសន៍ជានយោបាយអាទិភាពរបស់រដ្ឋាភិបាលនាយករដ្ឋមន្រ្តីថ្មីរបស់អង់គ្លេស។ នៅក្នុងសារអបអរឆ្នាំថ្មី ឆ្នាំ ២០២៣ លោកនាយករដ្ឋមន្រ្តី រីស៊ី ស៊ូណាក់បានសន្យាអនុវត្តនយោបាយរឹតបន្តឹងព្រំដែន។
នៅឆ្នាំ មុន អង់គ្លេសបានចុះកិច្ចព្រមព្រៀងដ៏ចម្រូងចម្រាសជាមួយប្រទេសរវ៉ាន់ដា ដើម្បីឲ្យរវ៉ាន់ដាទទួលយកជនអន្តោប្រវេសន៍ខុសច្បាប់ដែលអង់គ្លេសបណ្តេញចេញ ទាំងនៅមុនការដាក់ពាក្យសុំសិទ្ធិជ្រកកោន។ ដោយសារតុលាការសិទ្ធិមនុស្សអឺរ៉ុបប្រឆាំង គម្រោងការចាប់បញ្ជូនជនអន្តោប្រវេសន៍ខុសច្បាប់ទៅរវ៉ាន់ដា ត្រូវផ្អាកទៅវិញ ប៉ុន្តែ រដ្ឋាភិបាលអង់គ្លេសគ្រោងនឹងអនុវត្តឡើងវិញ នៅក្រោយការបើកភ្លើងខៀវរបស់តុលាការអង់គ្លេសកាលពីពេលថ្មីៗនេះ។
គោលដៅរបស់រដ្ឋាភិបាលអង់គ្លេសគឺបំបាក់ទឹកចិត្តកុំឲ្យជនអន្តោប្រវេសន៍ធ្វើដំណើរខុសច្បាប់តាមទូកចូលអង់គ្លេស។ ម្យ៉ាងដើម្បីបំផ្លាញប្រភពចំណូលរបស់ក្រុមឈ្មួញទុច្ចរិតដែលលួចដឹកមនុស្សខុសច្បាប់តាមទូកពោងគ្មានសុវត្ថិភាព។ ប៉ុន្តែ ការប៉ុនប៉ងរបស់រដ្ឋាភិបាលអង់គ្លេសនៅតែមិនសម្រេចជោគជ័យ។ ជនអន្តោប្រវេសន៍ខុសច្បាប់ដែលមានប្រភពមកពីប្រទេសអ៊ីរ៉ាក់ អាហ្វហ្កានីស្ថាន យេម៉ែន អាល់បានីជាដើម នៅតែប្រថុយជីវិតធ្វើដំណើរតាមទូកឆ្លងសមុទ្រសំដៅអង់គ្លេស។ ប្រឈមនឹងលំហូរជនអន្តោប្រវេសន៍ខុសច្បាប់ រដ្ឋាភិបាលរបស់លោកនាយករដ្ឋមន្រ្តីស៊ូណាក់ កាលពីពេលថ្មីៗនេះ បានប្រកាសវិធានការថ្មីៗបន្ថែមទៀត ដូចជាបង្កើតក្រុមពិសេសប្រឆាំងឈ្មួញដឹកមនុស្សខុសច្បាប់ និងការប្រើប្រាស់បន្ទាយទាហាន កន្លែងស្នាក់នៅរបស់និស្សិតសម្រាប់ដាក់ជនអន្តោប្រវេសន៍ខុសច្បាប់។ ជាវិធានការកាត់បន្ថយការចំណាយរបស់រដ្ឋាភិបាល ព្រោះថា រហូតមកដល់ពេលនេះ ជនអន្តោប្រវេសន៍ខុសច្បាប់ដែលកំពុងដាក់ពាក្យសុំសិទ្ធិជ្រកកោននៅអង់គ្លេស ត្រូវរដ្ឋាភិបាលយកទៅដាក់នៅសណ្ឋាគារ។
ដើម្បីប្រយុទ្ធប្រឆាំងនឹងលំហូរជនអន្តោប្រវេសន៍ អង់គ្លេសគ្រោងផងដែរថា នឹងបង្កើតច្បាប់ដែលរារាំងមិនឲ្យជនអន្តោប្រវេសន៍ដែលធ្វើដំណើរដោយខុសច្បាប់ចូលអង់គ្លេស អាចស្នាក់ ស្ថិតនៅក្នុងទឹកដីអង់គ្លេស នៅក្រោយការចាប់ខ្លួន៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ