លោកហ្សេឡេនស្គីសន្យាសងសិកវិញ ក្រោយរុស្ស៊ីវាយបំផ្លាញព្រះវិហារសម្បត្តិបេតិកភណ្ឌយូណេស្កូ នៅអូដេសា
នៅយប់ថ្ងៃសៅរ៍ ឈានចូលថ្ងៃអាទិត្យនេះ កងទ័ពរុស្ស៊ីបានវាយប្រហារយ៉ាងដំណំ ជាថ្មីម្តងទៀត មកលើទីក្រុងអូដេសា របស់អ៊ុយក្រែន។ យោងតាមអាជ្ញាធរអ៊ុយក្រែន គឺមានមនុស្សស្លាប់យ៉ាងហោច២នាក់ និងរបួសចំនួន២២នាក់។ បន្ថែមពីនេះ មីស៊ីលរបស់រុស្ស៊ី បានបណ្តាលឲ្យបាក់បែក ព្រះវិហារបុរាណធំបំផុត កណ្តាលក្រុងអូដេសា ដែលចុះបញ្ជីក្នុងសម្បត្តិបេតិកភណ្ឌពិភពលោក របស់អង្គការយូណេស្កូ។
ចុះផ្សាយនៅថ្ងៃ៖
ស្តាប់ - ០២:២៦
យោងតាមលោក Oleg Kiper អភិបាលក្រុងអូដេសា នៅវេលាម៉ោងប្រមាណ៣ទាបភ្លឺ រុស្ស៊ីបានបាញ់ប្លោងមីស៊ីលមកផ្ទួនៗ ចំនួនយ៉ាងហោច១៩គ្រាប់ សំដៅកំទេចទីក្រុងអូដេសា ដែលជាទីក្រុងចុះបញ្ជីក្នុងសម្បតិ្តបេតិកភណ្ឌរបស់យូណេស្កូ។ ព្រះវិហារ អកតូដុក្ស La Transfiguration ដែលជាសម្បតិ្តបេតិកភណ្ឌធំបំផុតនៃទីក្រុងនេះ បានរងការខូចខាតយ៉ាងដំណំ។ គិតត្រឹមព្រឹកថ្ងៃអាទិត្យ មានស្លាប់ប្រជាជនស៊ីវីលចំនួន២នាក់ របួស២២នាក់ ក្នុងនោះកុមារ៤នាក់។
នេះគឺជាលើកទី២ហើយ ដែលរុស្ស៊ីបានវាយប្រហារ បាញ់ប្លោងគ្រាប់មកកាន់ទីក្រុងអូដេសា ទីក្រុងកំពង់ផែភាគខាងត្បូងអ៊ុយក្រែន ជាប់មាត់សមុទ្រខ្មៅ បន្ទាប់ពីរុស្ស៊ីបានបិទបញ្ចប់កិច្ចព្រមព្រៀងនាំចេញគ្រាប់ធញ្ញជាតិ។ ក្រៅពីបានវាយប្រហារកាលពីយប់ថ្ងៃព្រហស្បតិ៍ មកលើទីតាំង ឃ្លាំងស្តុកគ្រាប់ធញ្ញជាតិរបស់អ៊ុយក្រែន រុស្ស៊ីបាន វាយប្រហារផងដែរ ទៅលើអគារបុរាណ និងសារៈមន្ទីរ នៃទីក្រុងអូដេសា ដែលជាទីក្រុងបុរាណចុះបញ្ជីបេតិកភណ្ឌពិភពលោក។ កាលពីថ្ងៃសុក្រ អង្គការយូណេស្កូ បានថ្កោលទោសចំពោះអំពើនេះ របស់រុស្ស៊ី។
ក្រោយការវាយប្រហារសារជាថ្មីរបស់រុស្ស៊ី នៅវេលាទាបភ្លឺថ្ងៃអាទិត្យនេះ ដែលបានបំផ្លាញព្រះវិហារសម្បតិ្តបេតិកភណ្ឌពិភពលោកនៅក្រុងអូដេសា លោករដ្ឋមន្ត្រីក្រសួងមហាផ្ទៃអ៊ុយក្រែន បានចាត់ទុកថា វាគឺជា ឧក្រិដ្ឋកម្មសង្គ្រាមយ៉ាងប្រាកដណាស់ ដែលរុស្ស៊ីកំពុងតែធ្វើ។ ឧក្រិដ្ឋកម្មសង្គ្រាម ដែលអ៊ុយក្រែននឹងមិនអាចបំភ្លេចបាន ហើយមិនអាចអភ័យទោសឲ្យបានជាដាច់ខាត។ លោកប្រធានាធិបតី វ្លូឌីមៀរ ហ្សេឡេនស្គី បានថ្លែងសារតាមវីដេអូ ដោយលោកសន្យាថា អ៊ុយក្រែននឹងសកសិកវិញ តាមរយៈការវាយប្រហារនៅក្នុងទឹកដីរុស្ស៊ី ចំពោះអ្វីដែលរុស្ស៊ីបានធ្វើមកលើក្រុងអូដេសា។
ដោយឡែក កងទ័ពរុស្ស៊ីបានអះអាងថា រុស្ស៊ីបានវាយប្រហារ ហើយនឹងបន្តការវាយប្រហារ នៅគ្រប់ទីតាំងទាំងអស់ ដោយមិនរើសមុខ ឲ្យតែទីតាំងនោះ ជាកន្លែងប្រភព រៀបចំប្រតិបត្តិការវាយប្រហារភេរវកម្ម មកលើទឹកដីរុស្ស៊ី។ គួរបញ្ជាក់ដែរថា នៅថ្ងៃអាទិត្យទី២៣កក្កដានេះ លោកពូទីន ប្រធានាធិបតីរុស្ស៊ី កំពុងតែជួបជាមួយលោកលូកាឆិនកូ ប្រធានាធិបតីបេឡារុស នៅក្រុងសាំងប៉េតេសបួរ ដើម្បីនិយាយអំពីសម្ព័ន្ធភាពយុទ្ធសាស្ត្រ។ ផ្អែកតាមបណ្តាញព័ត៌មានរុស្ស៊ី មេដឹកនាំទាំង២នឹងនិយាយគ្នាតែ២នាក់ រយៈពេល២ថ្ងៃឯណោះ ដោយលោកពូទីនបានបញ្ជាក់ប្រាប់ទៅលោកលូកាឆិនកូថា លោកបានប្តូរផែនការខ្លះ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ