លោកម៉ាក្រុង អះអាងថាបារាំងត្រូវតែពង្រឹងសណ្តាប់ធ្នាប់ឡើងវិញ ដើម្បីដោះស្រាយបញ្ហាហិង្សារបស់យុវជន
ពីទីក្រុងនូម៉េអា កោះនូវែលកាឡេដូនី លោកប្រធានាធិបតីម៉ាក្រុង បានផ្តល់បទសម្ភាសន៍ឲ្យទូរទស្សន៍បារាំង កាលពីរសៀលថ្ងៃចន្ទម្សិលមិញ។ គឺជាឱកាស ដែលលោកម៉ាក្រុង ត្រូវថ្លែងប្រាប់ប្រជាជនបារាំងអំពីគោលជំហរ ក៏ដូចជាការងារដឹកនាំរបស់លោកទៅថ្ងៃខាងមុខ បន្ទាប់ពីបារាំង បានពើបប្រទះនឹងភាពចលាចលហិង្សាយ៉ាងខ្លាំងក្លាបំផុត បង្កឡើងដោយយុវជនក្មេងៗ កាលពីចុងខែមិថុនា។
ចុះផ្សាយនៅថ្ងៃ៖
ឆ្លើយនឹងសំណួរអ្នកកាសែត ដែលចោទសួរថា អ្វីទៅជាមេរៀនដកពិសោធន៍ ក្រោយភាពចលាចលហិង្សាកន្លងមកនេះ លោកម៉ាក្រុង បានលើកឡើងថា ភាពចំបាច់បំផុតដែលលោកនឹងចាប់ផ្តើមធ្វើ គឺការស្តារ ពង្រឹងសណ្តាប់ធ្នាប់សង្គមឡើងវិញ។ ការពង្រឹងសណ្តាប់ធ្នាប់ ទប់ស្កាត់អំពើហិង្សារបស់យុវជនក្មេងៗ ដែលលោកម៉ាក្រុងអះអាងថា ត្រូវតែធ្វើដោយមានការចូលរួមពីឱពុកម្តាយអាណាព្យាបាល។
សម្រង់សំដីលោកម៉ាក្រុង ដែលផ្តល់បទសម្ភាសន៍ ពីក្រុងនូម៉េអា ថ្ងៃទី២៤កក្កដា២០២៣
"មេរៀនដែលខ្ញុំបានស្រង់មក ទី១គឺសណ្តាប់ធ្នាប់ សណ្តាប់ធ្នាប់! ទី២ គឺថាប្រទេសយើង ត្រូវការស្តារឲ្យមានឡើងវិញ នូវអាជ្ញាគ្រប់គ្រង នៅគ្រប់លំដាប់ថ្នាក់ទាំងអស់។ ជាបឋម គឺត្រូវចាប់ផ្តើម ពីក្នុងគ្រួសារនីមួយៗ។ ត្រង់នេះហើយ ដែលខ្ញុំនឹងចាប់ផ្តើមធ្វើការងារនេះ នៅចុងរដូវក្តៅនេះ ដើម្បីរៀបចំពង្រឹងអំណាចរបស់ឪពុកម្តាយ ក្នុងការអប់រំគ្រប់គ្រងកូន។
បញ្ហារបស់ក្មេងៗហិង្សាទាំងនេះ មិនមែនសាលារៀន ឬនគរបាលអាចទៅដោះស្រាយ កែប្រែពួកគេបានទេ។ យើងត្រូវដោះស្រាយបញ្ហា នៅឯប្រភពរបស់វា គឺក្នុងក្រុមគ្រួសាររបស់ពួកគេ។ គឺយើងត្រូវតែធ្វើឲ្យគ្រួសារ មានការទទួលខុសត្រូវ និងចាំជួយគ្រួសារទាំងនោះ។ ហើយយើងក៏ត្រូវតែ ចំណាយកម្លាំងថាមពល និងថវិកា ដើម្បីជួយយុវជនរបស់យើងឲ្យដើរលើផ្លូវល្អឡើងវិញ ឲ្យពួកគេមានក្របខណ្ឌមានវិន័យ។
មេរៀនមួយទៀត ដែលខ្ញុំបានដកពិសោធន៍ដែរ គឺថាវាអាចជាចំណុចខ្សោយរបស់ប្រទេសយើងក៏ថាបានដែរ គឺកន្លងមករាប់ទសវត្សហើយ ដែលយើងបានយកបញ្ហា ទៅប្រមូលផ្តុំនៅតែតាមទីតាំង ឬតំបន់ខ្លះមួយចំនួន។ ដូច្នេះការងារនេះ គឺយើងនឹងចាប់ផ្តើមធ្វើ ដើម្បីពិចារណារកដំណោះស្រាយ ដោយពិភាក្សាជាមួយមេឃុំ ចៅសង្កាត់ ចៅហ្វាយក្រុងនានា។
ហើយការងារទី៣មួយទៀត គឺការបង្ការបញ្ហាលំបាកទាំងអស់នេះ។ ក្នុងចំណុចនេះ គឺមានបញ្ហាចោទឡើងដោយការប្រើប្រាស់បណ្តាញសង្គម។ យើងត្រូវតែធ្វើការ សហការជាមួយក្រុមហ៊ុនគ្រប់គ្រងបណ្តាញសង្គមទាំងអស់ ឈានទៅកំណត់ក្រិត្យក្រមសណ្តាប់ធ្នាប់សាធារណៈនៅលើបណ្តាញសង្គម ដើម្បីធ្វើយ៉ាងណាបង្ការទប់ស្កាត់ឲ្យបានមុន កុំឲ្យឈានទៅកើតអំពើហិង្សាហួសប្រមាណបែបនេះ៕"
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ