រុស្ស៊ីចោទបស្ចិមលោកពីបទដាក់គំនាបមិនធ្លាប់មានលើក្រុមប្រទេសអាហ្រ្វិកមិនឲ្យមានជំនួបជាមួយរុស្ស៊ី
នៅថ្ងៃព្រហស្បតិ៍ ទី២៧ កក្កដាខាងមុខ ប្រធានាធិបតីរុស្ស៊ីលោកពូទីននឹងទទួលដៃគូអាហ្រ្វិកសម្រាប់កិច្ចប្រជុំកំពូលរុស្ស៊ី អាហ្រ្វិករៀបចំនៅក្នុងទីក្រុង Saint-Pétersbourg។ កិច្ចប្រជុំកំពូលនេះគ្រោងធ្វើឡើងចំពេលដែលរុស្ស៊ីកំពុងជាប់ដៃនៅក្នុងសង្រ្គាមអ៊ុយក្រែន និងក្នុងពេលដែលរុស្ស៊ីបានសម្រេចមិនបន្តកិច្ចព្រមព្រៀងជាមួយអ៊ុយក្រែនក្នុងនាំចេញគ្រាប់ធញ្ញជាតិអ៊ុយក្រែន។ ក្នុងថ្ងៃអង្គារ ទី២៥ កក្កដា ពោល ២ថ្ងៃមុនកិច្ចប្រជុំកំពូលមួយនេះ រុស្ស៊ីបានចោទបស្ចិមលោកពីបទបានដាក់គំនាបមិនធ្លាប់មាន និងបានប្រើមធ្យោបាយគ្រប់យ៉ាងដើម្បីរារាំងក្រុមប្រទេសអាហ្រ្វិកមិនឲ្យទៅចូលរួមកិច្ចប្រជុំកំពូលជាមួយរុស្ស៊ី។ ការចោទរបស់រុស្ស៊ីនេះបានធ្វើឡើងដោយលោកឌីមីទ្រី ប៉េស្កូវ អ្នកនាំពាក្យវិមានក្រឹមឡាំង។
ចុះផ្សាយនៅថ្ងៃ៖
ស្តាប់ - ០១:៤៩
« ពិតហើយ យើងបានដឹងយ៉ាងពិតប្រាកដថា រដ្ឋអាហ្វ្រិកស្ទើរតែទាំងអស់បានទទួលរងនូវសម្ពាធដែលមិនធ្លាប់មានពីមុនមកពីសហរដ្ឋអាមេរិក។ ស្ថានទូតបារាំងនៅបណ្តាប្រទេសអាហ្រ្វិកតែងបានធ្វើសកម្មភាពគ្រប់យ៉ាងដើម្បីធ្វើយ៉ាងណាកុំមានការរៀបចំកិច្ចប្រជុំកំពូលរុស្ស៊ី អាហ្រ្វិក និងរារាំងកុំឲ្យថ្នាក់ដឹកនាំអាហ្រ្វិកទៅចូលរួមកិច្ចប្រជុំកំពូលជាមួយរុស្ស៊ី។ ក្រៅពីសហរដ្ឋអាមេរិក និងបារាំង បណ្តាប្រទេសបស្ចិមលោកដទៃទៀតក៏បានព្យាយាមធ្វើសកម្មភាពដូចគ្នានេះដែរ។
យើងគិតថា ទង្វើ និងអាកប្បកិរិយារបស់សហរដ្ឋអាមេរិក បារាំង រួមទាំងបណ្តារដ្ឋបស្ចិមលោកផ្សេងទៀតគួរតែ និងត្រូវតែទទួលការផ្តន្ទាទោស។តាមពិតទៅ ពួកគេមិនអនុញ្ញាតឱ្យរដ្ឋអាហ្រ្វិកដែលជារដ្ឋអធិបតេយ្យជ្រើសរើសដៃគូរបស់ខ្លួនដោយខ្លួនឯង មិនអនុញ្ញាតឲ្យរដ្ឋអាហ្រ្វិកពង្រីកកិច្ចសហប្រតិបត្តិការជាមួយអ្នកដទៃនៅក្នុងវិស័យផ្សេងៗ និងមិនអនុញ្ញាតឲ្យរដ្ឋអាហ្រ្វិកលើកយកបញ្ហារបស់ខ្លួនទៅពិភាក្សាជាមួយអ្នកផ្សេង។
ថ្ងៃនេះ និងជាងពេលណាៗទាំងអស់ វាជារឿងសំខាន់ខ្លាំងណាស់សម្រាប់យើង និងសម្រាប់អាហ្រ្វិកដែលត្រូវរួបរួមគ្នា ដោះដូរគ្នា និងបន្តនិយាយគ្នាលើកិច្ចព្រមព្រៀងស្តីពីគ្រាប់ធញ្ញជាតិដែលត្រូវបានបញ្ចប់។ យើងជជែកគ្នាស្តីពីមូលហេតុនៃការបញ្ចប់កិច្ចព្រមព្រៀងនេះ ស្តីពីកិច្ចខិតខំប្រឹងប្រែងរបស់រុស្ស៊ីក្នុងការរក្សាទីផ្សារពិភពលោក ស្តីពីអាកប្បកិរិយាទទួលខុសត្រូវរបស់រុស្ស៊ីនៅក្នុងរឿងនេះ និងស្តីពីកាតព្វកិច្ចដែលអ្នកដទៃមិនបានគោរពពេញលេញ »៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ